Andra Mari abesbatza, demasa, urbitsetan
Amatiño
2015/08/03 23:50
Musika-zaletasuna eragiten duten kontzertu horietakoa, bart, Donostiako Musika Hamabostaldiaren lehen asteburuan. Hayden-en Re maiorreko 93. Sinfonia, batetik, eta Mozart-en Do minorreko Meza Nagusia, bestetik. Sekulakoak gero, bata zein bestea, eta demasak, Mahler Chamber Orchestra eta Andra Mari Abesbatza, Manfred Honeck zuzendariaren batutapean.
Eliza-musikaren tradizioa, Mozarten berrikuntza alaia, austriar biolin-airea eta euskal polifoniaren maila… Dena, elkarrekin, Kursaaleko lapikoan sartu eta, horra, lantzean behin baino plazaratzen ez den gutizia. Urbitsetan.
Entzulegoak gogotik txalotu zuen ikuskizuna eta zeharo nabarmen azpimarratu, berriz, Andra Mari errenteriar abesbatzaren lan zaila bezain bikaina.
Mahler Chamber Orchestra eta Andra Mari Abesbatza, bart, Kursaalean* elkarrekin.
* Itxuraz, behintzat, urtez urte aldatzen ari da Donostiako Hamabostaldiaren entzulegoa. Gero eta gutxiago gara jakadun gizonezkoak eta gero eta gehiago, emeak zein arrak, euskaldunak.