Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / 1965eko haziak, egungo hortentsiak

1965eko haziak, egungo hortentsiak

Amatiño 2020/07/28 14:45
Kalamuarako bidean, Deportivoaren iturririk zaharrenetakoa baino lehentxoago, hortentsia mordoa dago loretan. Normala al da 600 m. inguruan, txara eta elorri artean, arrosa ordenako horrenbeste lore-aldra bat-batean sortzea? Hura ikusi eta, duela 55 urteko argazkia bururatu zitzaidan. Bihotzak ba omen ditu buruak ulertzen ez dituen arrazoiak.

Egungo hortentsiek ezkutarazten duten borda zahartu eta alferrik galduan makinatxo bat bider bildu izaten ginen, 1965 urte inguruan, umeen euskal jaiaren antolatzaileok.

Bestela  nekez elkartuko ginatekeen neska-mutilak euskarak eta euskal-gurariak batzen gintuzten Joxe Mari Ormaetxea zenaren kuadrillaren mendi-soziedadean. Segurutik "Panpo" bera genuen nagusiena eta gainerako guztiok 19-22 urte besterik ez.  

Begi bistakoa da hogeitaka lagunen argazkia bazkalostekoa dela. Mikel Larrañaga zigarro-purua erretzen eta Mireia Viteri, artean, amantala kentzear... zalantza gutxi, gero. 

Bizpahiruren izenak ahaztu ditudanez, ez dut zerrendarik ezarriko. Hala ere, norbaitek denak gogoan balitu, esan baino ez du.  

Eskuinean, Kalamuara bidean, soziedadea baino hogeitaka metro gorago,  1945ean jaio ginenontzako "betidanik"  ur-emaritan dirauen iturria.

Kalamua 1965
Lehen ilaran, urdin ilunez, Jose Mari Ormaetxea, gure Panpo zena, guztion gatzagi eta legamia.

Auskalo orduko gazteok ezer egin ote genuen, primeran pasatzeaz gainera, baina nik pentsatu nahi nuke oraingo zenbait lore orduko hazien fruitu direla, eta, urteak joan eta urteak etorri, hainbeste txara, elorri eta arantzen artean hortentsiek ere asmatu dutela euren bidea egiten.

Hortentsiak
Leku berberean, 1965eko haziak, oraingo hortentsiak
Mikel
Mikel dio:
2020/07/28 20:02
Jope, azken bi asteotan hortik pasatzean buruan erabili dut ba zergatik ete daren hor hortentsiok erdi ezkutuan dagon txabola onduan... hara!

Eskerrik asjo
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna: