Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Bidean . . .

Hizkuntzak eta obren iraupena

Mikel Lizarralde 2011/06/16 23:45

Gure herrian egiten diren obrek ez daukate iraupen berdina euskaldunentzat edo erdaldunentzat.

Argazki hau maiatzaren bukaeran atera nuen gure pegoran:

null

Gaur beste hau atera dut, pegoran baita ere:

null

Pertsona elebidun bezala... zenbat irauten dute obrek? Ze batzutan nahiago dut euskalduna izan, eta bestetan erdalduna.

Ah, eta euskararen zuzentasunari... hobe ez begiratzea.

Send to Kindle

Mikel Lizarralde 2011/05/10 14:59

Kindle irakurgailua dugunontzat gehigarri interesgarria da Send to Kindle. Chrome-rentzat eginiko plugina da (Firefox-en bookmarklet moduan erabil daiteke).

Webgune batean nabigatzen ari garenean, egin klik botoian eta epostaz bidaliko dizu artikulua zure Kindle irakurgailura. Egokia da artikulu luzeak (edota momentuak irakurri ezin ditugunak) gure Kindle-ean eroso-eroso irakurtzeko.

Instalatzeko

  1. Sartu Send to Kindle webgunera eta jaitsi gehigarria.
  2. Pluginaren konfigurazio orria irekiko zaizu zure Chrome nabigatzailean. Zure Kindle eposta gehitzean aukeratu @free.kindle.com helbidea (hauxe da eta doako helbidea; @kindle.com helbidera bidalketak kobratu egingo dizkizu bestela Amazonek).
  3. null
  4. Sartu zure Amazon kontuan eta baimendu Send to Kindle zure epostara idazteko (gehitu kindle@klip.me helbidea baimendutako bidaltzaileen artean).
  5. Zure nabigatzailean botoi laranja bat ikusiko duzu orain nabigazioko tresna-barraren eskuman. Demagun Xabier Mendigurenen Sakonetaren lehen kapituluan zaudela; egin klik botoi laranjan. Lehenengo testu betsioan ikusiko duzu artikulua. Egin klik "Send" botoian.
  6. null
    null
  7. Artikulua zure Kindle-era iritsiko zaizu, Wifi-ra konektatzen duzunean. Hona Xabierren artikuluaren adibidea:
  8. null

 

Ama

Mikel Lizarralde 2011/05/09 23:56

Gure amak ez zuen bart lorik egin. Badaki erosi ditudala jada hegazkin txartelak. Urduri dago. "Nahiago nuke iraila balitz", esan dit. Aita ere urduri egongo da, seguru; baina ama, ama da.

Banana Pancake Trail

Mikel Lizarralde 2011/04/29 14:22

Paco Nadalek aspaldi aipatu zuen bere blogean lehengo motxileroak erdi-desagertuta daudela. Gaur egun, motxilarekin batetik bestera dabiltzan gehienak tankerako asmoekin dabiltza, tankerako lekuetan gainera. Utikan lehengo abentura, gora parranda eta sexua (ordaindu gabe, ahal bada).

Sarri pentsatzen dugu Laos edo Kanbodian mundu garatu-gabe eta basatia topatuko dugula. Baina ez, Vang Vieng (Laos) edo Siam Reap (Kanbodia) turismoarentzako prestatuak daude, eta, batez ere, guztiz egokituak. Conil edota Salouren tankerakoak dira, kale traketsago eta abandonatuekin.

Mendebaldeko estiloko taberna mordoa; chill out edo techno musika topera; jatetxeetan hanburgesa, pizza edo pancake-ak; giriak telebistetan Premier League, Friends edo Simpson-ak ikusten eta abar.

Asia hego-ekialdean aurki daitezkeen gune turistiko hauek denek Banana pancake trail deritzona osatzen dute (hemen Banana pancake trail-aren mapa). Herrialde osoak ez dira horrelakoak; ezta hiri eta gune zehatz horiek ere. Inguru haietan ezagutzen ditudan lekuetan nahi izanez gero Banana pancake trail giroa aurki dezakezu, edota paso egin.

Hori bai, oso deigarria egiten da Angkor miresgarritik bueltan Siem Reap-en sartzea; edota egun osoa arroztietan zehar pasiatu ostean tubbing-aren ondorioz pasa-pasa egindakoak ikustea Vang Vieng-en. Banana pancake trail-a osatzen duten lekuetan ugaldu egiten dira girientzako eskaintzak.

Pertsonalki, ez zait gaizki iruditzen oporrak horrela pasatzea. Baina ni neu, ez noa munduaren ipurdiraino parrandara. Horretarako, nahiago Euskal Herriko udako jaietan ibiltzea.

Jarraituko du.

Lehen aipatu dudan tubbing-a zer den?

Paraje eder batean, hartu kamioi baten neumatikoa eta hasi ibaian behera jaisten. Ertzak girientzako tabernaz beteta daude. Dibertigarria da. Kilometroak bezala, baina ibaian behera.

IMGP0315

Laos 152

Tubing in the Vang Vieng

Tubing in the Vang Vieng

Abentura berri bat

Mikel Lizarralde 2011/04/27 18:40

Abentura berri baten aurrean nago. Gaur goizean erosi dut udan Bangkok-a joateko hegaldia. Lehenago ere izan naiz han. Oraingoa desberdina izan da ordea. Bakarrik noa, hilabete pasatxorako, bizikletarekin eta inolako planik gabe, oraingoz. Plana eta bidea, pixkanaka. Eskerrik asko CodeSyntax opor-egunen malgutasunagatik. Eskerrik asko Maria zure babesagatik. Biba gu!

Krisialdi ziklikoak

Mikel Lizarralde 2011/04/06 00:33

Duela hilabete batzuk Las uvas de la ira jaitsi nuen, Steinbeck-ena. Aitak etxean dituen liburu mordoskaren artean ikusia nuen, kasu larregi egin gabe. Inolako erreferentziarik gabe irakurtzen hasi nintzen.

Hasieran larregi katiatu ez arren kapituluak igaro ahala geroz eta interesgarriagoa egin zitzaidan. Tartean, gainera, Gorkak amaiera biribila iragarri zidan, irakurtzeko gogoa bizituz.

Gaur-gaurko gaiak ziruditen gainera. Euren jabetzak galtzen dituzten nekazariak. Banketxe eta enpresa handien berekoikeri eta diru-gose mugagabe. Pobrezia eta emigratzeko beharra. Inmigrazioa jasotzen dutenen arrazakeria eta beldurra. Emakumearen paperaren garrantzia. Familia.

Gezurra dirudi 70 urte dituenik liburuak. Sekulako gaurkotasuneko gaiak. Bereziki gustatu zait langile esplotatuek bat egin beharraren aldarrikapena. Baita egoera txarrenean emakumeek aurrera egiteko erakusten duten adorea.

Oso liburu interesgarria. Gomendatzeko modukoa.

Zaborrarekin zer egin

Mikel Lizarralde 2011/03/10 09:45

Gure lantokia dagoen poligonoa zabortegia zen lehen. Alboko eskolan nengoen poligonoa eraiki zutenean.

Abendua edo urtarrila inguruan, gure gainean dagoen lur-sail batean zuhaitzak moztu eta lurra mugitu zuten, ur-hodi berriak edo sartzeko. Lurra mugitzean, hara non agertu ziren orain ia hogei urte zabortegira botatako plastiko, botila eta abarrak.

Lanak bukatu eta berehala zaborra ezkutatu egin zuten, badaezpada, ez eskandalizatzeko edo. Orain gutxi belarra ere landatu dute, berdeagoa edo politagoa izan dadin lur-saila.

Nik neuk ez dakit zein den zaborrarekin egin beharrekoa. Atez ate jaso, edukiontzi marroia, erraustegia, gutxiago kontsumitu eta ondorioz zabor gutxiago sortu, ... ez dakit. Hori bai, zerbait egin behar dela bai, nahita nahiez. Ikusi ez arren, zaborra hor dago, lurra pixka bat mugituta agertzeko prest.

Botereen banaketa

Mikel Lizarralde 2011/02/23 00:37

Unibertsitate sasoian Ignacio Ramoneten La tirania de la comunicación liburua irakurri nuen. Ohikoa den botere banaketa klasikoa, legegilea, judiziala eta exekutiboa, atzean geratua zela pentsatzen zuen Ramonetek.

Botere horizontal eta parekideak izan beharrean, piramide moduan antolatuak daude bere ustetan:

  • Goian, gainerakoak dominatzen, botere ekonomikoa
  • Ondoren, botere mediatikoa
  • Hauen azpian, botere politikoa

Botere ekonomikoak komunikabideak kontrolatzen ditu, eta biek batera botere politikoa.

Interesgarria iruditu zitzaidan, baina horixe, besterik ez. Aspaldian, ordea, geroz eta argiago daukat Ramonetek bete-betean asmatu zuela. Ez du inporta nora begiratu, dela Espainiaren kanpo-politika, finantza merkatuen erreskate neurriak edota zenbait udaletxeren erabaki xelebreak (horra Bukowski Donostian edo Errebal Eibarren), denen atzean enpresa handien interesak.

Honetan xahutu diru publikoa?

Mikel Lizarralde 2011/02/01 09:40

Atzo Paco Nadalen blogean Fitur turismo feriari buruzko artikulua zetorren, bideo xelebre eta guzti. Ikusi, ikusi:

Bideoa 2007koa da, baina ez dut uste egoera larregi aldatuko zenik aurten.

Argi daukat profesionalei zuzendutako turismo feria bat baliagarria izan daitekeela. Bidaia-antolatzaileek hornitzaile eta destino berriak ezagutu, elkarlana eta abar, bai, arrazoiak egon daitezke. Baina zenbat norbanako joan ote dira Galizia edota Nepala turismo feria batean egon ostean? Egongo dira bakarren batzuk, baina horrek konpentsatzen du egindako inbertsioa?

Baten batek esango dit bideoko aterki horiek kalean ikusiko direla eta horrela Galiziaren promozioa ikusgai egongo dela. Edota txakolina doan ematen diogun horrek lagunei esango diela zein ona zegoen eta Getariako txakolindegira joan behar direla. Auskalo. Ni neu ez naiz iritzi horretakoa

Aspaldian sarea bilakatu da gure informazio iturri eta bidaia-agentzia. Aukeran interesgarriagoa iruditzen zait interneten turismo baliabideak era argi eta erakargarrian erakustea. Aprobetxatu sarearen aukerak. Seguru Islandiak bisitari gehiago lortu dituela bideo honekin Fiturren baino:

 

Moleskine koadernoa

Mikel Lizarralde 2011/01/11 21:30

Zenbait produktuk sekulako lana egin dute beren inguruan istorio bat sortzeko. Produktua, zerbait generikoa bezala ulertu ordez, balio erantsi jakin batekin ikusia izatea lortu dute. Horren adibide da Moleskine koadernoa.

Moleskinek ez du izan nahi kaiera soil bat, hamaika orri, huts-hutsak edota marradunak, tapa gogorra edota bigunarekin. Ez. Moleskinek istorio bat sortu du bere markaren inguruan, bere markaren historia. Hemingwayk Moleskineetan idazten zuen, beste famatu batzuk ere bai. Eta klaro, guk ere Hemingway izan nahi dugu, idazterako orduan bederen.

Historia horrek Moleskine marka sortzen lagundu du. Bezeroek koaderno soil bat besterik erosten ez dutela pentsatzeko. Ez delako koaderno soil batean idaztea bezala. Eta noski, koaderno soil batek baino prezio garestiagoan.

Eta kontuz, ez pentsatu gero Moleskinek Eroskin saltzen diren koaderno merkeekin lehiatzen duenik.

Ekoizpen oso merkeko produktuekin lehia ezin da prezioan egin, marketinarekin baizik.

Trouristen Moleskinea

Trouristeko lagunek Moleskine berezi eta pertsonalizatu bat atera dute, La Personnaliteren laguntzaz. Bidaiei oso lotua dago Moleskinea, askok eguneroko moduan erabili izan dugu eta. Ekintza polita eta interesgarria da bidaien inguruko sare-soziala koaderno eder hauekin promozionatzea. Sarea eta papera elkarlanean.

Moleskine para Trourist.com

 

Ondorengo bideo honetan Trouristen Moleskinea nola egin zuten ikus dezakegu:

Aurkezpena

Bidean...

Mikel Lizarralde naiz, 80an jaiotako eibartarra. Marketin lanak edo egiten ditut CodeSyntax enpresan. Hemen idazteaz gain beste CodeSyntax-en blogean eta Twitterren ere banabil txio-txioka.

Hemengo eduki guztiak CC-BY-NC-SA lizentzia dauka.

 

Nabigatu euskaraz