Harrikadak

Apirilaren 15ean idatzi zuen bere blogean Gorka Juliok, Bloga sortu nahi? apuntea.

"Niretzako garrantzitsuenak, azken urteetan sortu ditugun milaka blogak. Beharbada zuetako batzuk bloga duzue dohaineko zerbitzu batean edo ez duzue baina blog bat nahi duzue zuen domeinuarekin. Apirilaren 24ean itzalagunea.com -en urteurrena ere izango da, denon artean hosting merke bat hartu eta erabiltzaile guztien artean kudeatzeko ardurarekin, bakoitzak bere blog propioa eta domeinuarekin sortzeko tailer bat egin dezakegu. Zer iruditzen, zenbatek emango luke izena?"

Jende ezberdinak utzi zituen aldeko komentarioak (nik ere bai) eta iritsi da eguna. Bertara joateko asmoa izanez gero, Larunbatean blogak sortzeko sovieta apuntean eman behar da izena. Komentario bat utzita nahikoa da. Goizeko 11:00etan da hitzordua, Andoaingo Itzalagunean.

Oraindik ez dakit joaterik izango ote dudan, baina gustatuko litzaidake agertzea. Gorkarekin beti ikasten baita zerbait.

Honen harira, Ander Izagirreri esker, jakin dut Juan Varelak diola herritarrek eginiko kazetaritza ez dela esistitzen. Nik ez dut oso garbi. Eta kazetaritza? Esistitzen al da kazetaritza gaur egun?

Un soviet para crear blogs soberanos, este apunte en castellano.

Larunbatean, bazkalostean, Mailu Odriozolak Asier Altunari aste honetan bertan egin zion elkarrizketaren zatiak errepikatu zituzten Euskadi Irratian. Beste gauza batzuk ari nintzen egiten, baina harritu ninduen Asierrek esatea Bertsolari dokumentalaren pilotua kasualitate hutsez jarri zutela sarean. Izan ere, bertan ageri den John Miles Folley adituari erakutsi nahi ziotela eta, horregatik, dagoela Vimeon.

Asierrek gehitu zuen finantzabidea lortzeko egiten direla gaur egun horrelako pilotuak. Ea zortea duten behintzat. Emaitza politta izan baitaiteke.

BERTSOLARI PILOTO SPANISH SUB. from txintxua on Vimeo.

Hemen paratzen ditudan lerro hauek irakurtzeko ohitura duzuenok, jakingo duzue Javier Ortiz kazetaria behin baino gehiagotan aipatu izan dudala txoko honetan. Are gehiago, gaztelaniazko Pedradas blogak haren etxe digitalean du ostatu.

Pasa den Alternatiba taldeak Javier Ortiz omentzeko eskabidea aurkeztu zuen Gipuzkoako Batzar Nagusietako erregistroan. Herri hau den bezalakoa da eta hilabete batzuk pasa dira data finkatu arte. Apirilaren 30ean izango da Donostiako Koldo Mitxelena Kulturunean, iluntzeko 19:00etan.

Ekitaldiari hasiera emango diote erakundeetako ordezkariek. Ondoren, mahai-ingurua antolatu da. Izenburua: El compromiso de Javier Ortiz (Javier Ortizen konpromisoa). Moderatzaile lanetan Mariano Ferrer kazetari ezaguna arituko da eta parte hartzaileak ondorengo hauek izango dira: Arantxa Gurmendi (kazetari eta ekintzailea), Garbiñe Biurrun (epailea), Rafael Chirbes (idazlea), Ignacio Escolar (blogari eta kazetaria) eta Mikel Iturria (bai, ni neu, javierortiz.net webgunearen koordinatzaile gisa). Gainera, Jabier Muguruzak pare bat kanta egingo ditu zuzenean, Angel Unzuren laguntzaz. Joateko asmoa izanez gero, bertan elkar ikusiko dugu.

Denbora arin pasa da eta, esan bezala, urtebete joan zaigu 2009ko apirilaren 28tik.

Egunero akordatzen naiz berarekin.

"Oso triste gaude taldean. Oso triste. Ia inork ez du ikusi, baina Robert Gesink ere erori egin da Amets Txurruka erori den bihurgune berean. Ondoren Kevin Seeldrayers ere hortxe erori dela uste dut, eta horrek badauka zergati bat. Lasterketaren aurretik ibiltzen diren autoak ziztu bizian joaten dira, bidegurutze guztiak itxita egoten direla baliatuta. Bihurguneetan ero moduan joaten dira, rallyetan ibiliko balira bezala, eta errepide bazterreko hartxintxar guztia bide erdian uzten dute. Aiako jaitsierako bihurgune guztiak artxintxarrez beteta zeuden. Astean zehar bide horietatik pasaz gero, dena garbi egoten da, baina lasterketetan ez. Eta aurreko autoengatik da hori".

Juanma Garate. Rallyetan dabiltzala uste dute. Berria egunkarian sinaturiko zutabea. 2010eko apirilak 10.

Erykah Badu abeslariaren disko bakarra dudala uste dut. Zuzeneko bat ez dakit non eta noiz erositakoa.

Herenegun ikusi nuen arazoak zituela eginiko bideo batekin. Windows Seat kantari eginiko bideoarekin izan ditu arazoak Dallasko abeslariak. Izan ere, JFK zenak hil aurretik eginiko azken metroak egin baititu Baduk. Baina bidea egin bitartean soinean zituen arropak kentzen ditu. Eta bi nahasketa horiek (JFK gehi biluztea) gehiegizkoa dira AEBetan.

Ez dut nahikoa ezagutzen emakume hau eta susmagarria da bideo hau azaltzea disko berri bat argitaratzen duen une berean (New Amerykah Part Two. Return of the Ankh).

Kanta gustatzen zait eta meritua ematen diot jendaurrean biluzi eta, estetikak hainbeste agintzen duen gizartean, gorputz hori erakusteagatik. Bejondeiola Badu andereari!

;

Joan den asteko Argia astekarian Mikel Asurmendik egin zion, nolabait, galdera hori Lokarri-ko koordinatzaile den Paul Riosi:

Brian Currin ez da bitartekaria, prozesuan dauden zailtasunak errazten dituen pertsona baizik. Rol hori jokatu du lehenago eta orain ere ezker abertzalearekin arlo hori lantzen ari da. Estrategia bat ari da diseinatzen ezker abertzaleak prozesu demokratikoan baldintza berdinetan leku izan dezan.

Argazkiak.org | Herri Batasu... © cc-by-sa: iturri

Ondorengo galderan, Asurmendik esaten dio Rodolfo Aresen ustez, Brian Currin oker dabilela. Eta Paulek zera gaineratu:

Oker dabilena Ares da, uste ustel batetik ari baita. Aresek uste du Brian Currin bitartekari aritzeko premisarekin etorri dela. Aresek eta beste askok ez dute ulertzen Currin ezker abertzalearekin kolaboratzen ari dela etorkizuneko estrategia definitzeko, gatazka eraldatzea bilatzen duela, irtenbiderako eszenategia eraiki nahi duela. Tira, eta oker badago, zer? Ez al da okerrago oraingo egoeran segitzea?

Amaieran, Paulek dio,

Ez dut ikusten ETA armak behin betiko uzteko moduan, ezta su-eten iraunkor bat emateko ere. Urrats berriak eman daitezke, baina izatekotan ezker abertzalearen aldetik emango dira, ez ETAren aldetik.

Ea ba.

Zein da Brian Currin-en rola? Aktan jasoa. Sustatu. 2010eko apirilak 5.

Lance Armstrong txirrindularia puntako twitterlaria ere bada (une honetan, 2.466.000 jarraitzailetik gora ditu). Ostegun arratsaldean zera idatzi du:

What do you get when you have a Texan, Belgian, Frenchman, Basque, Kazak, Lithuanian, Ukranian, and a Swissman?

Hau da, gutxi gora behera:

Zer egin dezakezu tejano, belgiar, frantses, euskaldun, kazakiar, lituaniar, ukraniar eta suitzar banarekin?

Horiekin guztiekin dago Armstrong karrera bat korritzekotan, hain zuzen ere igande honetan korrituko den Flandriako Tourra. Bi euskaldun daude taldean: Markel Irizar eta Haimar Zubeldia. Bietako bat izango da. Bien izen-abizenen gainean klik eginez gero, Basque Countrykoak direla dio taldearen guneak.

Amaitzeko, nonbaiten ikusi nuen noizbait twitter-eko ranking bat, baina gaur ez dut topatu. Oker ez banago, mundu mailako lehen hamarren artean zegoen garai hartan Armstrong, Estatu Batuetako beste aktore eta kirolariekin batera. Ranking-a ez dut aurkitu, baina bai Celebtwitter, Celebrities on twitter jarraitzeko gunea.

Zenbat balio du Lance Armstrong-en tweet batek? Aktan jasoa. Sustatu. 2010eko apirilak 2.

Duela ia bost urte lerro hauek publikatu nituen blog honetan:

"Ezagun batekin geratuta nengoen taberna batean. Zain nengoen bitartean, leihotik edo atetik plazara begira nengoen. Eta nire talaiatik ijito koadrila ikusten nuen. Hara begira ari nintzela, laguna iritsi zen eta nire lehenengo hitzak:

'Zenbat ijito dabilen inguru honetan, kopon!'

'Ijito asko... Payo gehiago ikusten dut nik'.

Arrazoi zeukan lagunak. Bost ijito eta dozenaka gizon-emakume payo. Eta nik zeri jarriko arreta eta ijitoei."

Ekar dezagun apuntea beste testuinguru batera. Gaur goizean Brian Currin buru duen taldeak Bruselan publiko egin du agiri bat. Eta pertsona asko sumatu dut nekatuta gatazkak konpontzetik (saiatzetik, behintzat) bizi den jendearekin. Ados.

Orain, goian ijito jartzen duen tokian jarri bakegilea. Payo jartzen duenean, berriz, gerragilea.

Zenbat jende bizi da hemen gerra egitetik? Zenbat jende, aldiz, pakea egin nahian?

A quien corresponda, este apunte en castellano

Asko maite dut Herri Irratia eta oraindik ere dezente entzuten dut (irratian ere zappinzalea bainaiz). Horregatik izango da blog honen lehenengo apuntea Mariano Ferrer handiaren erretiroari buruzkoa.

Ostiralean Lugaritzen egon nintzen Bide Ertzean laukotearen emanaldian. Aretoa beteta, kontzertu majoa eskaini zuen Toxic Twins anaiek gidatzen duten taldeak. Imanol Ubeda abeslariak detaile polita izan zuen bertaratutako hainbat lankiderekin (bera ere Herri Irratian aritzen baita beharrean) eta azken kanta beraiei eskaini zien: “nik ezin dizuet lanpostu bat eman, baina kanta hau zuentzat da”.

Auskalo zer egingo duen Grupo Noticias-ek Herri Irratiarekin. EAJ deseroso baitago Ajuria-Eneako jauregian agintzen ez duenetik eta kontua ei da Onda Vasca irratiarekin uztartzea edo.

Atzera begira, Mariano Ferreren "El kiosko de la Rosi"z gain, Josean Alkorta zenaren ahotsean entzundako Realaren partida haiek etorri zaizkit gogora. Tito Irazustaren garaiak ziren (Herri Irratian eta Eginen aritzen baitzen gure Leandro laurogeigarren hamarkadan). Gero, 1987an edo 1988an, Iñaki de Mujikak hartu zuen honen lekukoa. Edo Gregorio Gálvez eta Forkiren musika tarteak, besteak beste, gaur egun ere jarraitzen dutenak.

Orain, goizetan, Felipe Retamalek gidatzen duen saioarekin esnatzea gustatzen zait (nahiz eta jarraitu “informazio praktikoa” esaten trafikoari eta eguraldiari eskainitako tarteari) eta, arratsaldeetan, noizean behin bada ere, Jon Martijaren saioa ere entzuten dut. Karmele Aranbururen solasaldia, berriz, ezin izaten dut askotan entzun, baina esatari beterano honen eguerdiko informatibo haiek gogoan ditut ere ("Euskadin gaur"). 

Esan bezala, ikusiko dugu zer geldituko den udazkenean.

Herri Irratia, este apunte en castellano

Badut lagun bat epaile lanetan aritutakoa laurogeita hamargarren hamarkadaren hasieran. Orain, jada ez da epaile, baina hori beste kontu bat da.

Lanean hasi berritan, Guardia Zibila etorri zitzaion pertsona bati telefono entzuketak egiteko baimen-eske. Gauzak esaten zituzten bezain garbi izanez gero, beren kabuz Corcuera legea (atean ostikoa emateko aukera errazten zuena) aplikatzeko aholkatu omen zien. Dena den, azkenik, baimena eman eta bidali zituen bulegotik. Ustez. Handik bi egunetara etorri zitzaion pikoletoa barkamen eske. Akatsa egin zutela: pisu berean, ezker-eskubi, bi etxebizitza zeudela eta albokoari ari zitzaizkiola entzuketak egiten.

Kontu horrekin gogoratu naiz Benemeritako zuzendari izandako Luis Roldán presondegitik atera den egun berean. Komunikabide askok hankasartze itzela egin duten egunean, Frantziako polizia indarrek botatako amua irensteagatik (Kataluniako bost suhiltzaileen auziaz ari naiz, noski). Aurreko egunetan, ez da atzean geratu Efe albiste agentzia: Joseba Fernández bakarra izango balitz bezala jokatzeagatik. Eta zer nahi duzue esatea Jon Anza auziaz.

Lotsagarria izan da komunikabideek nola zabaldu duten lau haizetara suhiltzaileen gaia. Bertsio ofizialari men eginez. Eskerrak suhiltzaileak ez zirela euskaldunak eta, gainera, jende ezaguna zela bere komunitatean. Bestelakoan, agian ziega batean egongo lirateke auskalo zer egoeratan.

Javier Ortizen En el nombre del padre apuntea irakurri berri dut, 2004koa, eta oso aproposa hona ekartzeko. Bertan, Javierrek Ainara Gorostiaga eta beste hiru kideri gertatutakoa kontatzen du. Kasu honetan, euskaldunak izateaz gain, ezker abertzalekoak izaki, bi urte eman zituzten kartzelan egin ez zuten erailketagatik.

Zenbat gauza galdu ditugun bidean azken urte hauetan dermokrazia honetan. Eta hemen jende gutxiri axola zaio. Tamalez.

¿Versiones oficiales? No, gracias. Este apunte en castellano