Harrikadak

Irutxuloko Hitzan urriaren 27an argitaratutakoa.

Juancar Landak, Jocanok, erronka polita jarri zion bere buruari duela urtebete-edo: Serge Gainsbourg artista frantsesaren heriotzaren hamabosgarren urteurrena bete zenean, kontzertu bat egin nahi izan zuen bere lagun gainsbourgzaleekin. Ez ziren bete jarritako epeak, baina proiektua hazten joan zen Juancarren buruan. Euskaraz Gainsbourg-en kantarik ez zegoela ikusita, hutsune hori tapatzea erabaki zuen.

Luisa Etxenikeren eta Joxe Anjel Landaren laguntza izan zuen letrak frantsesetik gaztelerara eta euskarara itzultzeko orduan (Luisak gaztelerara eta hortik euskarara Joxe Anjelek). Ez dira horiek proiektuan inplikatu dituen pertsona bakarrak. Ezinbesteko zutabe izan da ere Juan Zulaika ingeniari eta produktorea. Musikari eta abeslari asko egon dira tartean. Besteak beste: Gari, Mikel Aguirre (La Buena Vida), Diego Vasallo, Saioa, Rafa Berrio, Ione Gabarain, Txuma Murugarren, Giorgio Bassmatti, etab.

Martxoan karrikaratuko du diskoa Gaztelupeko Hotsakek eta asmoa da Euskal Herriko hiri nagusietako antzokietan lana aurkeztea. Horren aurrerapena egin zuten pasa den astean Ernest Lluch Kultur Etxean.

Aurrerapen honek oihartzuna izan zuen komunikabideetan, baina sentsazio arraroarekin geratu naiz. Gazteleraz abesten duen musikaria izanik bere zaleei interesatu zaio ekimena eta ez hainbeste euskal kulturaren kontsumitzaile (dastatzaile) izan daitekeen jendeari. Hau da, zuk badakizu euskaraz abesten duen musikari baten kontzertura zoazenean gutxi gorabehera zer publikoarekin egingo duzun topo. Ba jende hori ez zegoen pasa den asteko emanaldian. Kasualitatea? Agian bai, beste zenbait ekitaldi egon zirelako hirian eta horiek eraman ahal zutelako publiko mota hori.

Diario Vasco egunkarian, Mikel Markezek zioen proiektu erakargarria suertatu zaiola, "pasioak eragindako proiektua" izan delako eta, gainera, "Euskal Herrian oso elkargune gutxi ditugu espainolez eta euskaraz abesten dugun kantariok. Denda berdinetan erosten ditugu gitarrarako sokak eta horietantxe gurutzatzen gara, baina ez dugu bestelako harremanik, eta nik uste dut oso interesgarriak direla honelako esperientziak alderdi horretatik".

Musika dendetan egoteaz aparte, bandako musikariak konpartitzen dituzte askotan, baina arrazoi du Markezek: falta dira horrelako topaguneak. Idazle batzuek ere antzeko diskurtsoa dute.

Musikari dagokionez, eskertuko nioke euskal musikaren dastatzaile-kontsumitzaileari Jocanori eta konpainiari arreta gehiago eskaintzea datorren udaberrian. Mereziko duelakoan nago.

En castellano

Asteazkenean egin zuten publiko Ondas Saria eman diotela Javier Vizcaínori Madrilgo tertulietan entzundako astakeriekin astero cociditoa prestatzeagatik. Saria Irratigintzako Berrikuntza atalean lortu du.

Albistearen berri izan ondorengo lehen elkarrizketan, Javierrek aitortu zuen hautagaitza bere iritziaren kontra aurkeztu zutela. Berandu enteratu nintzen, baina poztu egin nintzen berarengatik, batez ere, eta berarekin batera irratian aritu (aritzen) direnengatik.

Ondas Saria niri bost, baina irakurritako datu hau egia bada kontutan hartzekoa iruditzen zait. Iaz Vaya Semanita telebista saioari eman zioten sari bat. Orduan, 276 hautagaitza aurkeztu omen ziren. Aurten, berriz, 696.

Nahiz eta jakin egunetik egunera kaka hertzianoaren maila igotzen ari dela, Cociditoaren zikloa amaitu dela uste dut. Javier: aitzakiarik gabe geratu zara. Laster atera behar duzun bigarren liburuarekin eta sari honekin, barraka ixteko tenorea iritsi da. (Bere jefeek hau irakurtzen badute, zera pentsatuko dute, porloscojones).

Portzierto, irrati esatariaren blogean gabiltzanok duela zenbait aste jaso genuen urriaren 27an irratiaren egoitza berria bisitatzeko gonbitea. Horrela, sariarena ospatuko dugu larunbatean. Norbaitek joan nahi badu, goiko loturan agertzen den e-postara idatzi beharko luke.

Bide batez, dagokionari zuzendutako premiazko mezua: norbaitek egingo al du zerbait Javierren bloga, baita EITBko gainerakoak, hobeto funtziona dezaten? Amorragarria da intermitentzia: batzutan erantzunak onartzen ditu, beste batzutan ez; idatzi eta dena pikutara doa; ustez, galdu egin denean, hara non bikoiztua agertzen den zuk idatzitakoa. Enpin.

Kontatuko dizuet zer iruditzen zaidan hain handia den egoitza berria.

Eguneratzea: 23:35: oraintxe entzun berri dut urriaren 24an Graffitin eginiko elkarrizketatxoa. Javik dio hautagaitza ia bere iritziaren kontra aurkeztu zutela eta aitortzen du eutanasia egin nahi diola cociditoari.

En castellano

Gaurkoan kontatu digute Sustatun Bernardo Atxagak webgune berria duela. CodeSyntax enpresa eibartarrak egin du lana eta jada jaso ditu kritika on batzuk. Ez naiz ni kontrakoa esaten hasiko: ederra da, bai.

Euskaraz, gazteleraz eta ingelesez dago webgunea, baina Atxaga blogaria euskaldun jendeak ulertuko du bakarrik: euskaraz aritzekoa baita Asteasuko semea. Renon omen dabil ikasturte hau pasatzen, liburu berriren bat idazten, bloga astean behin elikatzen.

Gaur goizean mezu bat bidali didate 2003ko otsailaren 26an argitaratu zen Atxagaren artikulu bati buruzkoa. Euskaldunon Egunkaria itxi zuen Entzutegi Nazionaleko epaile batek eta gauza asko idatzi ziren garai hartan. Horien artean Atxagaren "Bertan goxo?". Egunero izeneko egunkarian publikatu zuten eta sarean ere egon zen ikusgai. Ez dakit zergatik, baina kadukatu egin da egunero.info. Eskerrak Sustatun gorde zuela Luistxok.

Artikulu hura irakurri nuenean, korrika eta presaka itzuli nuen gaztelerara. Hemen jarri zuen Javier Ortizek eta handik hartu zuten Rebelión-ekoek. Horrelakoak nik Pedradas-en jartzen ditut, baina hau pasa egin zitzaidan. Eta ez da makala. Oraintxe jarri dut.

Sustatuko erantzunetan, badago Joxe Aranzabalen bat oso ona. Sustatu kenduta orduan ez zegoen blogarik euskaraz. Hona hemen Joxeren hitzak. Zoritxarrez, ez dute batere gaurkotasunik galdu.

Zergatik gara bakarrik?

Benetan ederra Atxagaren artikulua eta, betiko legez, zer pentsatua ematen duten horietakoa. Guztiz bat nator berarekin, baina aukera aprobetxatu nahiko nuke haritik tiraka egiteko.

Jende asko mobilizatu da Egunkariaren alde egunotan. Baina nabarmena izan da, oso, nola askok beste alde batera begiratu duten, ezikusiarena eginez, Egunkariaren inguruan bidegabekeriarik egin izan ez balitz bezala.

Eta neure buruari galdetu diot behin eta berriro zergatik egiten duten beste aldera, zeren horietako guztiak ez baitira fanatikoak. Eta erantzun bat aurkitu uste dut, erantzun bat, izugarri kezkatzen nauena.

Uste dut orain ezikusiarena egiten duten horietako asko zapuztuta daudela euskalgintzan gabiltzan askorekin, gure babesa behar izan dutenean, gu beste inora begira jarri garelako, ez dugulako argi eta ozen aldarrikatu hemen eta bakean bizi izateko duten eskubidea eta ez ditugulako gaitzetsi jasan dituzten erasoak eta hilketak. Hitz batean esateko, ez ditugulako behar beste babestu.

Zurtz utzi genituen eta, ordainetan, bakarrik utzi gaituzte. Konturatu garenerako, amildegi bat egin da gure artean, zulo ikaragarri bat. Eta horrela nekez aterako dugu euskal kultura aurrera, zer esanik ez herri hau.

Bai, beharbada 2003ko otsailaren 20an aldi, denbora eta garai baten bukaera izan da gure artean. Gerora begira hausnarketa egin beharko dugu eta egiteko modu berriak landu, non ikusmolde desberdinetako jendeak elkarren errespetuan eta elkar hartuta egiten duen aitzina.

En castellano

2006aren hasieran bisita bat egin nuen Algortara, bertan egiten duten Kontularien Kluba ezagutzeko asmoz. Orduan hamar urte betetzear zegoen esperientziarekin harrituta geratu nintzen. Antzeko zerbait genuen buruan hemen eta 2006-2007an abiatu genuen Narratzaileen Txokoa kultur etxean. Urriaren 24an hasiko da 2007-2008 denboraldiko lehen saioa, arratsaldeko 18:30etan, areto nagusian (Anoeta Estadioko 7. eta 8. ateen artean). Sarrera doakoa da eta ez da izena eman beharrik.

2006ko udaberrian Rai Buenok emandako ikastaro baten ondorio da Narratzaileen Txokoa. Aurreko ikasturtean egitasmoa sendotuz joan da eta ikasturte honi begira aurrerapauso bat ematea erabaki dugu.

Zein da helburua? Kontatzea eta, taldekideen narrazioak entzuteaz gain, hausnarketarako gune bat izatea: kontatutako istorioetaz hitz egiteko, kontatzeko maneraz, nori zuzendu, kultur etxeaz kanpo egin daitezkeen saioak prestatzea...

Ernest Lluch Kultur Etxeko areto nagusian nahi duen orok du zita hileko laugarren asteazkenean. Rai Buenoren gidaritzapean garatuko dira saioak eta noizean behin taldetik kanpoko kontalariak gonbidatuko ditugu bertan beren eskarmentuaren berri eman dezaten.

Hiruhileko honen deialdiak urriaren 24an, azaroaren 28an eta abenduaren 26an izango dira. Beti 18:30etan.

Zabaldu mezua.

En castellano

Atzo irakurri nuen Pasqual Maragallek PSC alderdia utzi zuela eta gaur, berriz, jendaurrean agertu da alzheimer duela esateko. Lehenengo albisteari buruz ezer gutxi dut esateko, baina bigarrenak atentzioa deitu eta hunkitu egin nau. Alukeria galanta baita gaixotasun hori. Urrats garrantzitsua eman du gizonak eta zoriondu behar da une honetan aurrera ausart egiteagatik. Animoak ere bere sendiari.

Gainera, Salamancako paperak direla-eta bihar dago deitua ekitaldi (ustez) jendetsua Palau Sant Jordin. Goizean entzun dut Toni Strubell, Comissió de la Dignitat taldeko partaidea Más que palabras irratsaioan. Salamancan oraindik paperen % 90a dagoela adierazi du. Bertan geratzen direnak agiri pertsonalenak direla, gainera.

La Tafaneran irakurri nuen aurreko batean Jordi Pujol president ohiaren esaldi famatua: Papers? Ara no toca. Paperak? Ez, orain ez. Orain españolena zein den baita kontua.

Bestalde, youtuberi esker segitu dut Carod-Roviraren partehartzea TVEko Tengo una pregunta para usted saioan. Ondo egon zen tipoa. Josep Lluís zela bera izena zioenean, bikain. Gaztela-Leongo ikasleak eta señora rubiak Espainiako estereotipo apartak, portzierto.

Carod-Rovirak esan bezala, ez bazaizue interesatzen gure nortasuna, gure kultura, nola nahi duzue harremanak izatea. Normal gero eta jende gehiago independentista izatea.

Bukatzeko, E-notícies-en duela ordu erdi irakurritako albistea. Savater eta enparauen alderdia Katalunian bere kabuz arituko omen da, Ciutadansen saretik at. Hona lerroburua: "UPD aterra a Catalunya al marge de Ciutadans". Lurreratu edo terrorea zabaldu. Hor dago koxka. Ni Pello Zubiriarekin bat nator. Terrorea? Ez, eskerrik asko.

En castellano

Atentzioa deitu dit Jon Iraundegik aitaren heriotzaren berri nola eman dion bere koadrila digitalari. Gizonaren argazkia paratu du bere fotologean, eta hiru esaldi labur lotu ditu: "Muchas gracias por todos los ánimos recibidos. El Aita falleció el jueves 11. Agur Aita".

Egile eskubideak

Agur hori irakurri, aitaren erretratuari erreparatu eta ez dakizu zer esan (sentitzen duzula eta animo mezuak bidaltzeaz aparte).

Jonen aita hil zen egunean, urriaren 11n, aurkeztu zuen azken diskoa Irungo beste bizilagun batek, Jabier Muguruzak. Lanaren titulua "Konplizeak" da eta aitaren heriotzak utzitako hutsuneak markatu du grabazio prozesua.

Bertan badago Jabierrek idatzitako letra bat, honela dioena:

"Antxillesko arkupean

Eta hantxe nengoen ni
bakarrik, Antxillesko arkupean
aita gogora ekartzen
baita egun horretan ere
guztietan bezalaxe
hil zenetik, hain
bat batean, hain
latza izan zelarik guretzat,
ezustean izateagatik
eta hainbeste
maitatzeagatik
eta hainbeste
maitatzeagatik.

Eta trinketean gogoratzen nuen
pilotan, elkarrekin
eginak genituen
hogeita lau urte haietako
edozein egunetan
kantxan oldartzen,
berak zekien latzean. Ondoren
dutxan xaboia ematen
mugimendu delikatuan
indarra eta samurtasunaren
osatze harrigarri hura,
indarra eta samurtasunaren
osatze harrigarri hura.

Orduan, oroimenaren baitan
osorik sartua nintzela
berarekin bat egiten saiatu nintzen
artean aipatu gabe nizkion
kontu batzuk esaten: lehendabizi,
zenbat gogoratzen naizen berarekin
zein gaitza zaidan
haren hutsa, utzi gintuenetik,
baina bera, joanda bezala zegoen
egiazki urrun, beste nonbait
eta bapatean negarrari eman nion
baina aspaldi egiten ez nuen bezala,
ume abandonatuak egiten duen eran".

En castellano

Eguneratzea, 21:20etan:

Gaurko Noticias de Gipuzkoan eman dute honen berri. Bertan Juancarrek kontatzen du diskoa 2008ko martxoan argitaratuko duela.

Erakusleihoa programaren barruan, Ernest Lluch Kultur Etxean , Gainsbourg gainbegiratuz aurkeztuko du estreinakoz Juancar Landa (Jocanok) urriaren 18an. Lan horretan Dinbi Danba taldearen laguntza izango du. Ekitaldia arratsaldeko 19:30etan hasiko da areto nagusian (Anoeta Estadioko 7. eta 8. ateen artean) eta sarrera doakoa izango da. Gonbidatu bereziak ere espero ditugu.

Egun hauetan Euskal Herrian kantaren bat boladan baldin bada hori Lau Teilatu da, EITBren bozgorailu guztietatik jaurtitzen diguten bertsioan. Ondo da artista horiek euskararen eremura ekartzea, ikusiko dugu beren publikoa ba ote datorren, baina pagatu beharreko prezioa garestiegia dela deritzot.

Askoz ere interesgarriagoa iruditzen zait Jocanok azken urtean egindako esfortzua: euskaratu egin ditu Serge Gainsbourg artista frantsesaren kanta batzuk eta musikari lagun koadrila politarekin grabatu egin ditu. Diskoa bukatu gabe dago oraindik eta ezin esan noiz eta norekin aterako den.

Hau da Jocanok euskaraz egin duen lehen diskoa. Erentxun eta Amaia Monteroren kasuan bezala, lan honetan abestu duten kantari gehienak gazteleraz abesten ohituak daude. Ez ditut kanta guztiak entzun, baina emaitza ederra izan dela esatera ausartuko naiz.

Gainsbourg gainbegiratuz

Juancarrek dio "2006an Serge Gainsbourg-en heriotzaren hamabosgarren urteurrena bete zenean, nire lagun gainsbourzaleak bildu nahi izan nituen kontzertu-omenaldia prestatzeko. Ez genuen nahikoa denborarik izan, baina nik aurrera egin nuen, proiektua handituz. Gainsbourg-en bertsioak entzunak nituen ingelesez, italieraz, gazteleraz (gutxi)… beraz, bagenuen euskaraz egiterik".

Urtebete eman dute itzulpen (Jose Anjel Landa), egokitzapen eta grabaketa prozesuetan. Juan Zulaika, Xulai, ingeniari eta ekoizlearen aginduetara, hamabost abesti grabatu dituzte: Gari, Mikel Aguirre (La Buena Vida), Diego Vasallo, Estanis (Natural Project), Saioa, Amaia, Rafa Berrio, Virginia, Txuma Murugarren, Luisa Etxenike, Jorge Carrero, Mikel Markez, Enrique Mingo, Sanchís, Giorgio Bassmatti, Ione Gabarain, Rosita eta Harriet. Beste musikari hauek ere hartu dute parte: Aitor Unanue, David Soriazu, Iñaki Huarte, Txeli, Agus, Joserra Senperena eta Javier Sun.

Hurrengo Erakusleihoak

Azaroaren 29an, musika garaikidea, elektronika eta bertsoak nahasten dituen Ornitorrinkus lana eskainiko dute Maialen Lujanbiok eta Judith Monterok gidatzen duten taldeak. Gainera, abenduaren 20an, Pablo Casares poeta donostiarrak irakurtaldi poetikoa eskainiko du.

En castellano

Mediku kaskarrek bezala soilik betiko errezetak ematen dituen jende gehiegi dago euskal aberian. Eta ni ez nago ados errezeta hauekin, ezta beste hauekin ere.

Tunelaren barruan murgildu gaituzten honetan, argi pizarra ematen duten proiektu batzuei egingo diegu kasu pixka bat. Polemika sanoa egon da azken egunetan 8. probintzian youtube edo euskaltube behar ote dugun kontuarekin. Biak behar ditugula uste dut nik, baina nirea iritzi arrunta da.

Haritzek abiatu zuen duela zenbait aste Euskaltube, youtube-ren euskal klona.

Pravda Txikiko nagusia ez dago klonen kontra, baina "zer irudituko litzaizueke hauek garatzen erabiltzen dugun denbora eta hosting-a zerbait berria, erabilgarria eta polita sortzen erabiliko bagenu?" bota zuen aurreko batean. Pentsakor geratu nintzen. Zer esan nahiko du Anak horrekin?

Atzo jakin nuen hitz horien zergatia. Bide horretatik jo baitu ZeBehar martxan jartzeko. Oinutsik faktoriaren lehen ekoizpena, "ideia sinplea da. Erabiltzaileak bere beharrak argitaratu eta beste erabiltzaileek lagundu diezaiokete erantzun lagungarriak bidaliz".

Behar asko ditugu-eta 8. probintzian bizi garenok. Zazpi probintzietan bizi direnekin batuz gero, hosting arazoak seguru.

En castellano

Vizcaínoren blogean ikusi nuen atzo bideo hau. Lasarte-Oriako alkate den Ana Urchueguía anderea ageri da bertan. 2007ko uztailean, Nikaraguako Somoto herrian hartutako irudiak omen dira. Sei minutura iristen ez den dokumentuan, Epoca aldizkariak eginiko akusazioak aipatzen ditu (baina Diagonal-en ere atera zen zerbait). Diru publikoak bidegabeki erabiltzea leporatzen diote.

Telepredikatzaile estiloan oinarritutako diskurtsoa maneiatzen du, Tina Turner latina baten zenbait zipriztinez.

Lehenengo bideoaren transkripzioa jarri dut pedradas-en, baina bigarrena are larriagoa iruditu zait: Urchueguíak "bere" diruak omen direnak banatzen ditu bertako elkarte eta erakundeen artean, kirol txapelketa baten garaikur banaketa izango balitz bezala.

To eta no. Kooperazioa.

Twitter boladan dagoenean, Davidi irakurri nion 20palabras egunkaria sortu zutela BAiresen. Jozulinek aipatutako Jordi Cebrian-en ahalegin literarioaz akordatu naiz.

Castellano