Xabiroira harpidetzeko aukera!
Irudia: Dani Fano
Xabiroi euskaraz dagoen komiki-aldizkari bakarra da, baina ez da hori bakarrik. Kalitate ikaragarria duen komiki-aldizkaria da, eta benetako luxua da euskaldunontzat horrelako bat izatea. Eta hau ez diot nik bertan kolaboratzen dudalako (albisteen txokoa daramat eta elkarrizketa batzuk egin izan ditut). Bertan argitaratzen diren istorioetan idazleak eta marrazkigileak aritzen dira elkarlanean, eta horiek bilduz ateratzen diren albumak bikainak dira. Iban Zaldua eta Julen Ribasen Azken garaipenak, kasu, sari asko irabazi ditu, Euskadi Literatura Saria adibidez. Ikastolen Elkarteak argitaratzen du Xabiroi eta bertako DBHko ikasleen artean banatzen da, baina ez da gaztetxoentzako aldizkaria soilik, helduok ere izugarri gozatzen dugu irakurtzen.
Alabaina, Xabiroi ez da hain ezaguna, Ikastoletako ikasle izan ezean orain arte ez baitzen erraza eskuratzea, soilik euskal hiriburu batzuetako liburudenda batzuetan eros zitekeen. Baina hori bukatu da! Orain harpidetzeko aukera dago, eta gure etxean jaso ditzakegu urteroko lau zenbakiak 12 eurotan, bidalketa gastuak barne! Zeren zain zaude? Zoaz orain bertan Ikastolen Elkateko webgunera harpidetza egitera!
