Badator berriz ere Euskarazko Komikiaren Eguna! Prest egon irailaren 29rako!
Irudia: Asier Iturralde "Gaston"
Iaz, euskarazko komikigintza sustatu asmoz, hainbat komikizale eta komikigilek Euskarazko Komikiaren Eguna ekimena abiarazi zuten. Irailaren 29a aukeratu zen horretarako. Sektoreko denetariko eragileek (egileek, zaleek, erakundeek, kultur etxeek, ikastetxeek, dendek...) tokian tokiko hainbat ekitaldi antolatu zituzten, eta norbanakoek ere sare sozialetan modu askotara presentzia eman zioten euskal komikiari. Eguna arrakastatsua suertatu zen, eta guztion artean euskal komikia lehen planoan jartzea lortu zen. Eta urtero egun berean jarraipena ematea da asmoa.
Bada, bertan dugu aurtengo edizioa! Berriz ere modu deszentralizatuan eta norberak bere eremuan ekitaldiak eta jarduerak antolatzera animatu nahi zaituztegu berriz ere. Ideiak iazko ekitaldien zerrendatik har ditzakezue.
Liburutegietan, dendetan, ikastetxeetan, Interneten... euskarazko komikia ikusgai egotea da xedea, eta zale eta gainontzeko haur, gazte zein helduek euskarazko komikia irakurri eta erostea. Komiki sortzaileek ere (gidoilariak, irudigileak, koloristak, itzultzaileak...) parte hartuko dute, euren lanaren berri sareetan emanez. Eta euskarazko komikia sustatzen duten aldizkari eta argitaletxeek ere merezi duten protagonismoa izatea nahi dugu. Eta zuk ere ospatu dezakezu 2026ko Euskal Komiki Eguna, zure herrian edo interneten ekimenen bat antolatuz!
Zergatik irailaren 29an? Data horretan 1977 urtean argitaratu baitzen Zakilixut komiki pertsonaiaren lehen zinta, ia 50 urte geroago bizirik jarraitzen duena. Eta 70eko hamarkadan hasi zen euskal komikigintza garaikidea (egunkarietako zintagintza eta Ipurbeltz bezalakoekin), gero 80ko hamarkadan Habeko Mik eta Napartheid modukoekin jarraitu zuena, mende honetan Xabiroi aldizkariaren sorrerarentzat oinarria jarri zutenak, eta gaur egun urtero euskarazko 50 komiki inguru argitaratzera eraman gaituztenak. Horregatik, orainean ekinez etorkizuna lotzeko egokia iruditu zitzaigun iragana ere oroituz egitea.
Irabazi asmorik gabeko ekimen honi buruzko informazio gehiago nahi baduzu, idatzi euskalkomikieguna@gmail.com helbidera. Idatzi baita zure herrian antolatutakoak ezagutarazteko edo sare sozialetan gertatzen direnen berri emateko ere! Eta antolatutako ekitaldiak iragartzeko logoak eta bestelako materiala hemendik jaitsi ditzakezue.
Informazio gehiagorako:
