Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Teknosexua

Ikasitakoa desikasten ikasten

Markinako bidegorria OpenStreetMap proiektuan

Gari Araolaza 2009/10/06 12:50
Igandean lagun batzuei esker Markinako bidegorria ezagutu nuen. Izen eibartarra du gainera: Urko-bidea.
Zubia Markinako bidegorrian

Asko gustatu zitzaidan bidegorria:

  • Aparkaleku zabala, Ansotegi hotel-jatetxe alboan.
  • 3 kilometro dira guztira, Markinatik Etxebarriako industrialdea bukatzen den tokiraino. Joan eta etorri 6 kilometro beraz.
  • Lurzoru oso egokia, baita patinatzeko ere.
  • Toki oso ederra, Urko erreka bazterrean, harrizko zubi zoragarriak, amuarrainak errekan, zati handia zuhaitz artean...

GPS-a eraman nuenez, ibilbide osoa grabatu eta OSM proiektura kargatu ahal izan nuen.

OpenCycleMap

OpenStreetMap proiektua erabiliz, bizikletan ibiltzeko munduko mapa egiten ari dira, datuak beste modu batean erakutsita. Oraindik bide hau ez da azaldu, baina hurrengo egunetan baietz hemen ere ikusi!

 

Zarata isiltzeko kaskoak

Gari Araolaza 2009/09/20 23:18
Atzo Mr. Big taldearen kontzertuan egon nintzen. Taldeko gitarra jole Paul Gilbertek beti kaskoekin jotzen du, zarata kentzen diote kasko horiek. Nolabait esateko, isiltasuna "sortzen" dute.

Noise Cancelling headphones

Horrela esaten zaie: kanpoko zarata ezeztatzen duten aurikular edo kaskoak. Bose markak asmatu zituen duela zenbait urte eta orain denda askotan aurkituko dituzu.

Paul Gilbert in Bilbao

Paul Gilbert gitarra joleak entzumen arazoak ditu eta babesteko erabiltzen ditu kasko horiek. Bide batez, kasko horiek monitore moduan erabiltzen ditu, eta hobeto kantatu eta gitarra jotzen laguntzen diote,

Oinarria

Oinarri sinplea da, baina teknikoki egiteko zaila: imajina dezagun entzuten ari garen soinu uhin bat. Orain, sor dezagun beste soinu uhin bat, berdin berdina, baina kontrakoa. Hau da, bat gora doanean bestea behera joango da, ispilu batean bezala. Sinplifikatuz, bigarren uhin hori ongi sortzea lortzen badugu, ez dugu ezer entzungo, bi uhinen gehiketa beti 0 izango bait da.

Gaia hau baino konplexuagoa da bozgorailuekin gela batean gaudenean, zer ikusia izango dutelako soinu iturriarenganako distantziek eta hormek sortutako erreboteek. Aldiz, kasko edo aurikularren kasuan, ingurune askoz kontrolatuagoa da eta merkatuan lan hori egiten duten produktu asko daude jadanik. Zenbait autotan ere ezarri da sistema, eta motorraren zarata gutxitzeko balio du.

Gehiago:

Zer eskatu daiteke ardorik gustatzen ez zaizunean?

Gari Araolaza 2009/09/14 18:00
Ba dago hor kanpoan ardorik gustatzen ez zaion norbait? Zer eskatzen duzu jatetxe batetara zoazenean?

Jatetxe batera koadrilan noanean ez dut arazorik izaten. Ura ere beti eskatzen denez, harekin egiten ditut otorduak. Batetik alkoholak ez dit onik egiten eta bestetik gehiegi gustatu ere ez. Hala ere, ulertzen dut ardoaren inguruan dagoen "kultura" hori eta saiatzen naiz pausoak ematen, ezagutze eta ohitze aldera. Urarekin jarraitu aurretik hartzen dut ardo basoerdia beraz, zer esanik ez ardo ona bada.

Baina bakarrik edo ni bezalakoa den beste norbaitekin noanean izaten ditut "arazoak". Ardo botila onez hornituta ikusten ditut alboko mahai guztiak, eta nik ura eskatu behar. Lotsatu egiten naiz eta azkenean sagardoa edo horrelakoren bat eskatzen dut. On askorik ez dit egiten, baina ardoa baino gehiago gustatzen zait.

Duela aste pare bat ere tokatu zait. Jatetxe tradizional baina berrikuntzetan sartutakoa, urteko afari ederra egitera joan gara neskalaguna eta biok. Hark ardo basoerdirik ere ez du edaten. Mahai guztietan euskal aborijenak zeuden, txuleta, legatz eta xapoak irensten, bakoitzak bere mahaian errioxako botila ardo ederra duela, erreserbatik gorakoak ziurrenez. Guk, erdi lotsatuta, sagardo botila eskatu eta hura edan dugu.

Jatetxe horretan ordaindu beharrekoa ahoz eta bolumen altuaz esateko ohitura dutenez, jakin ahal izan dugu gurea ez zaigula ingurukoena baino merkeagoa atera; Batazbestekoan ibili gara inguruko mahaiekin alderatuta. Horrek lasaitu nau, pentsatu izan bait dut jatetxeetan nahi izaten dutela botila garestiak eskatzea, uzten duten marjena dela eta.

Zer egin? Honelako gauzetaz arduratzeagatik xinple bat naiz? Lotsatu behar nuke euskalduna izan eta ardorik ez edateagatik? Zuek zer edaten duzue ardorik ez baduzue edaten? Lasai-lasai amerikarrek bezala Kokakola eskatu behar nuke?

Mutrikuko txurruka plaza eta kontzertuak

Gari Araolaza 2009/08/24 13:10
Aurtengo Malen jaietan Gatibu taldeak Mutrikun kontzertua jotzeari uko egin zion, kontzerturako denbora gutxi falta zela, muntaia bukatu eta soinu probak egitera etorri zirenean.

Gatibu taldearen management enpresak azalpen hau eman zuen:

Gatibu musika taldeak atzo, uztailak 22, Mutrikuko jaien barruan eskaini behar zuen kontzertua, bertan behera geratu zen ez Gatiburekin ezta bere management enpresarekin (baga-biga s.l.) zerikusirik zuten arazoengatik.

Kontzertua bertan behera ustearen arrazoia taldearekin  adostutako baldintzak bete ez izana da.

Asko sentitzen dugu kontzertua bertan behera utzi behar izana, baina gure esku ez zeuden arrazoiak eraman gaituzte erabaki hau hartzera.

Eskerrik asko.

Herrian komentatu denaren arabera, arazoa Txurrukaren estatua zen, eskenatokiaren zati bat estaltzen zuelako.

Gauza jakina da Txurrukaren estatua pare-parean tokatzen dela:


Argazkiak.org | Txurruka plazako eskenatokia © cc-by-sa: garaolaza

 


Argazkiak.org | Txurruka plaza © cc-by-sa: garaolaza

Plaza horretan kontzertua egiten duen guztiak "jasan" du egoera hori, Ertzaintzaren bandatik hasi eta Niko Etxarteraino (asteburuan kantatu du hor).

Bestetik, jakin badakit musikariek askotan ez dituztela oinarrizko baldintzak izaten eta horren alde lan asko egin dutela segurtasunarekin, modu egoki eta txukunean beraien musika aurkeztu ahal izateko. Eta txalotzen dut intentzio hori.

Nik ez dakit zer adostu zuten kontratuan eta zer hitz egin zen aurretik (agian bereziki hitz egin zen Txurrukaren estatuaren inguruan), baina gauzak gelditu diren moduan Gatibuk ez du oso irudi onik utzi.

Uste dut komeni zela beste azalpenen bat ematea, gauzak argi eta garbi esanez. Arazoa estatua izan da, bai ala ez. Zer zegoen adostuta eta nork ez zuen bete emandako hitza. Gero bakoitzak aterako ditu bere kontuak.

200 Euroko kabia

Gari Araolaza 2009/07/19 23:55
Gaur goizean ur berogailu bat ordezkatu dugu. Izorratuta zegoen.

Duela hilabete bat inguru gure udako egoitzan geundela, zarata arraroa entzun nuen kanpoan jarrita daukagun ur berogailu barrutik. 20 urte izango zituen Otsein markako berogailuak, baina bazebilen:


Argazkiak.org | Ur berogailua © cc-by-sa: garaolaza

Ixil-ixilik karabana barruan sartu eta leihotik begira gelditu nintzen. 5 minutu baino lehen ikusi nuen zer gertatzen zen. Txori txiki bat tximiniatik sartu eta atera zebilen, honelakoa zen:

Kaskabeltza

Argazkia: Sławomir Staszczuk

Ogi apur batzuk jarri eta ur berogailu barrura sartzen zituen guztiak. Nahiko garbi zegoen kabia zutela barruan. Asierrek esan zidanez kaskabeltzak ziren, eta 21 egun egoten ziren txitak kabian jaio ondoren. Barruan txioka entzuten nituenez, ez zen asko falta eta zai egon gara, okupak joan diren arte.

Pasa den astean saiatu nintzen ur berogailua garbitzen, baina oso gaizki erretzen zuen, sua kanpora ateratzen zitzaion berogailuari.

Gaur ur berogailu berria jarri behar izan dugu beraz. Alboan bizi den ojalateroak lagundu dit lan horretan eta asko ikasi dut, baina 150-200 Euro kostatuko zaigu kabia! Hala ere esperientzia polita, baina hurrengo urtean plastiko batekin babestuko dugu ur berogailua.


Argazkiak.org | Txori kabia ur berogailu barruan © cc-by-sa: garaolaza

Mapapel.com : Inprimatzeko mapak

Gari Araolaza 2009/07/14 07:17
Ideia berri bat jarri dugu martxan azken egunotan. Hiri bat bisitatzera doazenek paperezko mapa bat izateko aukera eskaintzen digu mapapel.com-ek.

Zergatik mapapel.com?

Jendeak Googlen mapa de san sebastian eta plano san sebastian

bezalakoak bilatzen ditu. Horretaz konturatuta geunden.

 Mapapel.com: mapas para imprimir

Tokiren bat bisitatzera zoazenean, joan aurretik tokiko mapa lortzea zaila izaten da. Google Maps-etik inprimatzea ere ez da soluzio ona izaten, ez bait da erraza izaten zoom mailarekin azertatzea: edo bista orokorra (eta detaile gutxi) edo bista detailatua (eta ingurune oso txikia). Horretan laguntzera dator mapapel.com.

Helburua da DIN A-4 batean toki batetako mapa ikuspegi erabilgarrienak inprimatu ahal izatea, beste informazio gehigarriekin hornituta.

Oraingoz Donostiako mapa bakarrik jarri dugu eta gaztelaniaz dabilen publikoari zuzenduta atera dugu. Etorkizunean joango gara horiek denak osatzen, baina oraindik proiektuaren bideragarritasuna ere aztertzen ari gara.

Prototipo bat da

Orain ikusten dena ez da gero izango den zerbitzua, inolaz ere. Mapapel-entzat ideia asko ditugu kutxan gordeta. Webgune eta mapa hori prototipo bat dira, eta publikatu eta lehen asteotan ematen ari den emaitzak neurtzen ari gara. Horretarako erabiltzen ari gara.

Prototipoa La Personnalité-ko lagunekin batera prestatu dugu, esperimentu honetan parte hartzeko prest agertu dira eta.

Mapak zuzenean OpenStreetMap-etik atera ditugu, bere lizentziak edozein erabilera baimentzen duela aprobetxatuz. Konturatuko zineten kale izen guztiak euskaraz daudela, ez da?

Proiektu txikiak eta frogak Interneten

Sarearen abantailetako bat da hau. Ideia bat duzula? Ez egon zai eta egin froga bat, ea emaitzarik lortzeko aukerarik dagoen ala ez. Horrela aztertu ahal izango duzu zein zailtasun dauden, konpetentzia askorik dagoen, eta abar. Frogak egitea merkea da sarean. Ez egon proiektu handien zai!

Urtebete motorrean

Gari Araolaza 2009/07/04 08:12
Oraintxe betetzen ditu urtebete nire lagun txinatarrak.

Astean zehar nire bizitzaren zati handiena Eibarren bertan egiten dudanez (3-4 kilometroko ibilbideak egunean 4 aldiz), pasa den urtean motorra erosi nuen Jatsu eta Lur lankideekin animatuta. Ez da beste munduko gauza, baina izugarri erraztu dit bizitza.

Huatian Speedfight III  (125 cc)

Urtebetean 2000 kilometro inguru egin ditut Eibarren gora eta behera. Neguan hilabete eta erdi bakarrik izan dut gordeta, eguraldi gordinena egin duen garaian. Osterantzean, urtebetetzean erregalatu zidaten txamarra eta fraka inpermeable batzuei esker, ez naiz inoiz busti eta lasai joan ahal izan naiz lanera, nahiz eta euria egin.

Inoiz motoan ibili gabe nengoen, eta benetan gomendatzeko moduko esperientzia da. Damutu zaidan gauza bakarra, diru pixka bat gehiago ez gastatu izana. Baina ez nengoen ziur, ea hilabeteko hegoaize bat bakarrik ala luzarorako laguna izango ote zen. Hurrengoa hobea!

Mikroformatuak itzuli dira!

Gari Araolaza 2009/05/21 16:53
Badirudi mikroformatuak oraingoan indarrez datozela, Google bera ari bait da bultzatzen.

Euskal SEOn irakurri dut behingoz Google hasi dela mikroformatuak irakurri eta prozesatzen.

Mikroformatuak zer diren

Mikroformatuak edo microformats, HTML kode zatiak dira. Gure webgunean idaztean kode zati hauek erabiltzen baditugu Google bezalako robotentzat informazio gehigarria ematen ari gara, informazio egituratua, gero bilaketak eta konparaketak egiteko balioko duena.

Erabiltzaile arruntek ez dute ezer berezirik nabarituko. Aldiz, programa bereziren batekin webgunea irakurtzen duen batek, datu zehatz asko aterako ditu orri horretatik.

Gure aspaldiko lagunak dira mikroformatuak. Blogean idatzi izan dut gaiaren inguruan:

 

Geroago, gure inguruan Teketen ibili da gaia bultzatzen. Ordurako nik esperantzak galduta nituen apur bat, ez niolako gauzari aurrerapenik ikusten, baina Teketenek tresna politak egin zituen mikroformatuen inguruan. Hainbeste, microformats.org webgunean ere publikatu diotela mikroformatuen ideia eta Twitter lotzen dituen proposamen bat: Microblogging Nanoformats

 

Googlek mikroformatuak bultzatzea izugarrizko albistea da. Kontutan izan datubase batetik sortzen bada zure webgunea, oso erraza da mikroformatuak sortzea, eta onura handiak jaso daitezke zure edukiari bisibilitatea gehituz. Ez izan alferra eta aztertu pixka bat gaia.

Oraingoz, nire hCard txartela jarri behar dut berriz ere nire blogean.

Irakurri osorik Googleren blogean: Introducing Rich Snippets

 

Español ala Castellano?

Gari Araolaza 2009/05/07 10:15
Webguneak sortzen gabiltzanoi beti ateratzen digute eztabaida. Hizkuntza aukerak jarri behar izaten ditugu, webgunearen bertsioetara lotuta. Baina nola deitu gaztelaniari?

Hizkuntza bakoitza, bakoitzaren hizkuntzan

Hori da lehenengo erregela. Norberak bere hizkuntza azkar aurkitzeko komeni da bere hizkuntzan azaltzea. Ez dugu jarriko:

Ingelesa | Frantsesa | Gaztelania | Alemana | Euskara

Baizik eta:

English | Français | Español | Deutsch | Euskara

Elementu gutxi direnean ordenak ez du gehiegi axola. Bakoitzak bere hizkuntza azkar aurkituko du.

Erregela honen salbuespena da hizkuntza aukera asko dauzkagunean. Kasu horretan komeni da hizkuntza guztien izenak hizkuntza bakarrean egotea eta alfabetikoki ordenatzea, erraz aurkitu ahal izateko.

Español da izen internazionala

Español eta castellano hitzak baliokideak dira, sinonimoak. Aldiz, joan hegoameriketako edozein tokitara eta ikusiko duzu nola denek español esaten duten, berdin Mexicon edo AEBn. Europan zehar ere gaztelania ikasteko "Clases de Español" irakurtzen duzu han eta hemen.

Badirudi beraz munduan zehar español dela hitza, eta bihotzari begiratu gabe horixe da termino neutroena. Hizkuntza aukera hauek egitean ideologia alde batetara utzi beharko genuke, baina jarraituko dugu pentsatzen: ideologiari begiratzen badiogu?

Ikuspegi abertzale espainola

Hemen zalantza gutxi dago. Espainol sentitzen direnek uste dut nahiago dutela España eta español hitzak erabiltzea. España, España! esaten dute libre sentitzen direnean futbol partiduetan eta la defensa del español manifestuetan.

España integradora

Castellano hitza bultzatzea Espainia integratzeko saiakeretan kokatzen dut nik, edo hala azaldu zigun gutxienez batxilergoko Lengua y Literatura Española ikasgaiko irakasleak,  "ya que el catalán, el gallego y el vascuence también son lenguas españolas". Gure burua ez gutxiesteko eta Espainian integratuak senti arazteko castellano hitzaren erabilpena bultzatu omen zen.

Ikuspegi abertzalea

Aldiz, ikuspegi abertzaletik lotsa edo beldur bat sentitzen da España eta español hitzen inguruan, batez ere ikuspegi abertzale basko edo ez euskaldunetik. "En el resto del estado" edo "castellano" bezalakoak ia derrigorrezkoak dirudite Radio Euskadin edo ETB2an. Vaya Semanitakoak ere egin zituzten horren inguruko txisteak.

Baina zergatik lotsa edo errezelo hau? Ikuspegi abertzale batetik oraindik zentzu gehiago luke España eta español hitzak erabiltzeak, kanpoko zerbait, gurekin loturarik ez duena izendatu ahal izateko, ez?

Are gehiago ikuspegi abertzalea euskalduna bada: gure hizkuntza euskara da, eta menu batean español hitzean klik egiten duenak berak izango du (norbaitek izatekotan) konplexu edo lotsa apurra, ez? Zenbat eta abertzale erradikalagoa izan, orduan eta lotsa gutxiago eman beharko luke español hitza erabiltzeak. Norbait lotsatzen bada, berak jakingo du zergatik lotsatzen den eta zergatik nahiago duen castellano hitz itxuraz neutroagoa.

 

Ondorioz, aukera garbi daukat nik eta horixe erabiltzen dugu:  ESPAÑOL da erabili beharreko hitza.

Telesailekin txoratuta

Gari Araolaza 2009/05/04 09:24
Azken urtebetean ikusi ditudan telesailen zerrenda.

Hauek denak BitTorrent bidez deskargatzen ditut eta azpitituluekin ikusten ditut gauetan, telebistan zer ematen duten zai egon gabe:

  • Band of Brothers. Bigarren mundu gerrako paraka batzuk Normandiatik Alemaniarako bidean. Kalitate oso ona.
  • Generation Kill. Hau ere belikoa. Irakeko gerrakoa, marine talde bat Bagdaderako bidean.
  • Lost. 4. denboraldia.
  • Prison Break.  1 eta 2. denboraldiak. Jarraitu behar dut hurrengo denboraldiekin
  • IT Crowd . 1, 2 eta 3. denboraldiak. Umore ingelesa. Enpresa batetako informatika saila.
  • The Wire. Polizia telesaila. Oraintxe ari naiz 1. denboraldia bukatzen. Oso ona, poliki-poliki doa baina tentsioa mantenduz. Gozatzen ari naiz.

 

Telesail horietako edozein izango duzu aukera ona.

 

  1. Nahi dudan orduan ikusten ditut
  2. Publizitaterik gabe
  3. Azpitituluekin ikusten ditut. Ingelesa ikasten ari naiz beraz.
  4. Ikusi nahi ez ditudan programekin zapping tontoa egiten orduak emateko tentazioari ihes egitea lortzen dut.

 

Gehiago hemen:  Espoiler.tv

 

Aurkezpena

naiz. Teknogauza guzti hauetaz idazteko sortu nuen bloga, baina orain gai eta maiztasun librean nabil.