Harrikadak

Dear JOR:

Atzo, Zapaterok gobernu-aldaketa egin behar zuela jakin nuenean, zutaz oroitu nintzen. Burutik pasa zitzaidan, beste behin, zer pentsatuko zenukeen Zapaterok gobernu-krisia egin zuela jakiterakoan. Hau da, ministro eta ministerio batzuk kendu eta boterea zure lagun Rubalcabari eman ziola ikusitakoan. Twitter-en galdetu nuen ea zertaz idatziko zenukeen gaurko egunez eta Samuelek erantzun zidan agian Rubalcabaz idatziko zenukeela.

Jordi Barbetak La Vanguardian argitaratutako analisian dio: Zapatero se rinde al felipismo (Zapaterok amore eman du felipismoaren aurrean). Ez da gutxiagorako: Kantabriakoaz gain, Jauregui sartu da eta hortxe darrai Chavesek ere.

Periodiko berean, Montserrat Domínguezek zioen, kargugabetutako ministroez eta Leire Pajínez gain, bidean geratu den beste bat Patxi López lehendakaria dela. EAJrekin loturiko akordioaz ari zen, noski.

Eta lehendakaria aipatzen dugula, ez zaizu iruditzen EAJko hurrengo lehendakarigaia izateko aukera asko dituela Josu Erkorekak?

Duela gutxi ikusi dut telebista kate batean, ministerio ezberdinetan egindako kartera-aldaketetan jendetza zegoela. Harrigarria iruditu zait datu hori.

Beno ba, Javier, ikusiko dugu zer eragin duen aldaketa honek gure herri ttiki honetan. Otegik, behintzat, gauza interesgarriak bota zizkion Carlini El Paísek pasa den igandean publikaturiko elkarrizketan.

Jaso ezazu nire besarkada tristea, lagun. Faltan botatzen zaitugu.

Parece que el cambio de gobierno lo ha hecho Felipe, este apunte en castellano

Hona ekarri nahi ditut No Format zigiluko buru den Laurent Bizot-en hitzak. Diskoetxe frantziarrak katalogo laburra baina fina du (15 erreferentzia horietan, besteak beste, Mélissa Laveaux eta Gonzales). Hilabete honetako Rock de Lux aldizkariaren zenbakian elkarrizketatu dute. Hara zer dioen zigiluaren estrategiari buruz:

"Gogor aritzea lanean, ahal diren disko hoberenak egitea, modaz eta denboraz kanpo, eta konfiantza izatea. Egunen batean modelo berri bat sortuko da eta joera aldatuko da. Ez gara irtenbide mirarizkoaren jabe, baina bai dugula fede asko urte amaieran botako dugun ideian. Abonu-formula bat da, jendeak aldez aurretik erosiko ditu hurrengo gure produkzio guztiak eta horrela zigiluko proiektuak finantzatzen lagunduko digu".

"Inoiz ez genuen orain bezainbeste CD eta binilo saldu korreoz. Horrek ez du baztertzen nik pentsatzea gazteak debaldeko gauzetara ohitu direla eta ez da erraza haiei esplikatzea musika ekoizteak kostu bat duela".

"(Spotify) mundiala da entzulearentzat, baina guretzat interesa urria du diru-sarreren aldetik. Ez dakit plataforma hauek ahalbidetuko duten egunen batean produkzio berriak finantzatzea; publikoa masiboki bildu beharko litzateke itzulkin ekonomikoak garrantzitsuak izan daitezen. Oraintxe bertan promozioa da, beste ezer baino gehiago".

"Musika behin baino gehiagotan aldatu da euskarriz eta paradigmaz. Doakoak den-dena zanpatzea da ekidin behar duguna soilik eta sormenezko ekonomia ez pobretzea. Garai zailak pasatzeko prest egon beharra dago. Gure osasuna banaketa-kate handiekiko dugun independentziaren araberakoa da. (...) Auzoko jatetxe txiki on baten moduan, zeinak ´fast food´ kateen aldamenean beti izango baituen bere tokia".

Ikusiko dugu, baina aurre-ordainketaren formula iritsi dela ikusi dut eta ez zait ideia txarra iruditzen. Honela, Bidehuts diskoetxeak formula hori erabiltzen ari da Mikel Laboaren omenezko Txinaurriak diskoa aurrera ateratzeko.

Eta doakotasunari buruz aste honetan Koldo Almandozek bota du harribitxiren bat.

Ikusten duzuenez, ezer berririk ez, baina norabaitera jo beharko da.

Uste dut 1993. urtearen bueltan sindikatu nintzela. Dena esan behar bada ere, ez oso konbentzitua. Gaur arte, afiliatu soila izan naiz.

Urriaren 25ean hauteskundeak ditugu enpresan eta, sindikatuan jende berria dagoenez, lista berritu baten parte izateko gonbitea jaso nuen. Zalantzak alde batera utzi ondoren, baiezkoa eman nuen.

Gaur, ostirala, izan dugu hautagaitza osatzen dugunon bilera. Ez dakigu zer nolako emaitzak lortuko ditugun, baina jendearen partehartzea nahitaezkoa dela uste dugu aurrera egitearren.

Urteak pasatu ditugu gure atea zaintzen zuen atezaina aldatu gabe eta, ez bere erruz bakarrik, gol piloa jaso du gure taldeak. Enpresak abantaila darama, baina gure esku dago egoera horri buelta ematea.

Esan bezala, hilaren 25ean dira hauteskundeak. Egoerari buelta ematea nahi baduzu, segi botoa ematera. Berdin du nori, baina segi botoa ematera.

Hona hemen The Redskins taldearen Unionize kanta. Negu Gorriak-ek egin zuen euskarazko bertsioa, baina ez dut sarean topatu (oharra: Spotifyn bai, Unionize). Hona hemen Sindikatu abestiaren letra euskaraz eta gaztelaniaz.

Elecciones sindicales, este apunte en castellano.

Morales futbolaria (Guerra Eternan ikusia).

Chávez esataria.

Soberan daukat kaka jaki goxo gisa saltzen saiatzen den jendea.

Soberan daukat norberaren onura soilik ikusten duen jende berekoia.

Soberan daukat ezer egiteko gai ez den jendea (ez hitz onik, ezta ekintza kaskarrik ere), baina boligrafo gorria beti prest duena inoiz hobetuko ez duen gauza kakazteko.

Soberan ditut benetako zigiluak jartzen ibiltzen diren komisario politikoak (zentzu zabalean), gutarrak eta ez-gutarrak desberdindu asmoz.

Soberan dut besteen kontura bizi den jendea, boteretsuaren edozein memelokeriari irribarre egiten diona.

Soberan dut, finean, errespetua ez dizun jendea. Hau da, garai batean Mariano Ferrerek esaten zuen moduan, errotarriak irenstera eraman nahi zaituena.

Ez dakit berrogei urte betetakoan gizonezkook izaten dugun krisiaren ondorio den, baina gauza hauek jada jasaten ez ditudan bizitzaren garaira iritsi naizelakoan nago.

Nire gorputzak jada ezin ditu onartu aipatu errotarriak.

2006ko irailean EH 2.0 jardunaldiak antolatu zituen ekintzaile talde batek Artelekun. Jardunaldi haietan egon zen Vicent Partal. Nik kronika hau idatzi nuen: "Euskaldunek ez duzue zuen burua gehiegi estimatzen". Dirudienez, jardunaldi haien ondorioz sortu zen puntueus ekimena.

Atzo, 2010eko irailak 29, Partal jauna Gipuzkoa 2.0 elkarlanean programaren baitan ekarri zuen Donostiara Gipuzkoako Foru Aldundiak. Aski gustura entzun ditut, berriro ere, Vicenten hitzak. Hona hemen Lander Arbelaitz kazetariak hartutako apunteak: Euskal komunitatea Interneten indartzeko zenbait irizpide.

Lau urte pasa dira parlamentu batetik bestera. Partal beti bezain animoso sumatu dut, baina hemen ez dirudi gauzak asko aldatu direnik.

Martxa honetan, lau urte barru, hurrengo hauteskundeen atarian, Partal berriro etorriko da gurera eta batzuek behiak trenari so bezala geratuko dira.

Vicent Partal en las jornadas "Gipuzkoa 2.0 elkarlanean", este apunte en castellano.

Eguneraketa. Irailak 30. 9:15. Hasier Etxeberriak 2009ko beste erreferentzia hau utzi dit: Puntu eus lortzearen eta google euskaratzearen garrantziaz.

Urtean zehar pelikula gutxi ikusten dituen horietakoa naiz. Telebistaren agintea azkar astintzen dut etxean eta kosta egiten zait zinema aretoetara joatea.

Normalean, Zinemaldiaren garaian hiruzpalau ikusten ditut. Aurten, berriz, bi jai-egun hartu eta filmak ikusten egon naiz: lehenengoan, hiru; bigarrenean, lau. Uste dut muga-mugan egon naizela, hortik aurrera erokeria baita film gehiago ikustea. Ondo pasa dut eta, ahal badut behintzat, datorren urtean ere antzekoa egiteko asmoa daukat.

Guztien artean gehien gustatu zaidana atzo arratsaldean ikusi nuen: Barney´s version. Bikaina Paul Giamatti eta pare-parean Rosamund Pike (bertatik bertara ikusi nuen eta ze guapa, gainera). Aurretik, Chicogrande, 2010eko Kimuak uzta, Cirkus Columbia, Amigo, Aita, Cerro Bayo, Agua fría de mar, Addicted to love eta, ondoren, Poetry ikusi ditut.

1.- John Sayles-ena kenduta, ez dago Estatu Batuetako filmik zerrenda horretan: Kanada, Mexiko, Euskal Herria, Bosnia, Argentina, Costa Rica, Txina, Hego Korea.

2.- Hiru filmetan alzheimerra ageri da gai gisa (pisu gutxiago edo gehiagorekin): Addicted to love, Poetry eta Barney´s version. Eta Pasqual Maragalli buruzko Bicicleta, cullera, poma ikusi ez dudala.

3.- Gehienak erritmo motelekoak izan dira. Aita filmeko etxezainak dioen bezala: Mantso doa Historia, azkarregi bizitza. Zinemak motelduko gaitu?

4.- Maila honetako zinemaldi batek dirua behar du, konpetentzia gero eta handiagoa baita. Futbol talde batek Champions League-a jokatzeko gutxieneko aurrekontu bat behar duen bezala. 6 milioiren bueltan dabil zinemaldia, baina beste 1 edo 2 beharko lituzke.

5.- Mikel Olacireguik hamar urte egin ditu zuzendari gisa (zorionak egindako lanagatik). Jose Luis Rebordinosek hartuko du lekukoa. Pertsonarik egokiena Donostiako Zinemaldia aurrera eramateko.

Larunbat arratsaldean jakin genuen Gara eta Berria egunkariek igandean ETAren komunikatu berri bat publikatuko zutela. Igande arratsaldean baina, Madrilgo lagun bat galdezka zebilen ea non zegoen komunikatu horren gaztelaniazko bertsioa, agiria bere osotasunean irakurri nahi zuelako. Saiatu nintzen aurkitzen, baina ez nuen inon topatu.

Gauerdian, berriz, Izaskun Pérez-ek twitter bidez adierazi zuen gaztelaniazko itzulpenarekin hastekoa zela bera. Nik esku bat botako niola esan eta bion artean itzuli genuen komunikatua: Traducción del nuevo comunicado de ETA (Alderrai); Una traducción del nuevo comunicado de ETA (Pedradas). Astelehen goizean, berriz, jakin genuen El Periódicok bezperan, iluntzean, zintzilikatuta zuela gaztelaniazko bertsio bat.

Hasiera batetik harritu nau inon ez (El Periódicorena kenduta) agertzea agiri hori gaztelaniaz. Garak euskarazko bertsioa jarri zuen eta beste komunikabideak ez dakit hari begira geratu ziren edo zer kristo. Kazetari batek komentatu dit pribatuan bere periodikoan eguerdirako egina zutela itzulpena, baina edizio-politika tarteko, ez omen dute horrelako dokumenturik argitaratzen. Ez dakit, ulergarria egiten zait medio batekin, baina inork ez argitaratzea?

Ez al dute Espainiako irakurleek komunikatu hori gaztelaniaz irakurtzeko eskubiderik? Eta hori horrela bada, nork publikatu beharko luke?

Aste honetan zehar ikusi nuen twitter-en Lobo Eléctrico taldearen Mutante kantaren bideoa. Aritz Moreno da erruduna. Berak dioenez, rotoskopia teknika erabiliz 4.536 fotograma egin ditu eskuz (bideoak segunduko 25 fotograma ditu). Kontatu didatenez, 7 hilabeteko lana izan da.

Ez du meritu makala egileak, ordainezina den lana baita eta adiskide ona izan beharra dago ahalegin hori beste baten proiektuari eskaintzeko, musutruk. Zorionak, Aritz.

Bide batez, Lobo Eléctrico taldearen MySpacen ikusi ditut zeintzuk diren hurrengo kontzertuak: urriaren 2an, Donostiako Bukowskin; urriaren 15ean, Iruñeko Infernu tabernan; urriaren 23an, Bilboko Rincón de la Lolan.

Lobo Eléctrico - Mutante from Moreno on Vimeo.