Xabiroi 22 atera da
e-gor
2011/05/16 21:55
Eta aurrerantzean, komiki-aldizkaria hainbat komikidendatan eskuratu ahal izango da!
Irudia: Xabiroi
Ziurrenik eramango du hilabete pare bat-edo kalean, baina orain arte ez dudanez eskuratu... Ikastolen Elkartearen Xabiroi komiki-aldizkariaren 22. zenbakia, iazko aurtengo otsailekoa hain zuzen ere, kalean da.
Hau da bertan aurkituko dugun edukia:
- Zuen zerbitzari leial honek egiten duen Albisteen txokoa
- Manu Ortegaren Haizea banda
- Auzomorro umorezko orri bikoitza, Guaikaipuroren gidoia eta Sanviren irudiekin
- Haur besoetakoa sailaren 6 orri, Unai Iturriagaren gidoia eta Sanviren irudiekin
- Asiskoren gidoia eta Adur Larrearen irudiak dituen 4 orriko Andr@id istorioa
- Alex Orberen 4 orriko Labirintoa istorioa
- Asiskoren Hor Konpost banda
- Xabiroiko troupeak Angulemako aurtengo azokara egindako espedizioaren argazkiak ;-)
- KomikITAUN elkarrizketen orri bikoitza, oraingoan Asisko eta Adur Larrearekin
- ZaldiEroaren Arranotxuren beste bi orri
- Iñaki G. Holgadoren irudiak eta Harkaitz Canoren gidoia duen Zebra efektua istorioaren beste emanaldi bat, 6 orrikoa
- Loperen Behien Tarzanen 3 orri
Eta berri on bat: 22. zenbaki honetatik aurrera, Xabiroi aldizkaria (eta baita bertatik ateratako Saiak, Piztia Otzanak eta TeleAtoi albumak ere) Euskal Herriko hainbat komikidendetan eskuratu ahal izango da! Zehazki hauetan:
- Bilboko Joker (Urkijo zumardia, 27)
- Donostiako Armagedon (Marzelino Soroa kalea, 2)
- Gasteizko Zuloa (Correria kalea, 21)
- Irungo Tinta Comics (Jose Egino kalea, 10)
- Iruñeko TBO (Merced kalea, 28)
Gainera, aurrerantzean toki gehiagora iristeko ahalegina egingo dute. Aupa Xabiroi! Eta zu, zeren zain zaude erosteko?
