Harriet argitaletxearen eskutik, Markoren lan berria euskaraz: "Flanchin anaien abentura ikaragarrizkoa"
Irudia: Marko
Ezaguna da Mark Armspach Marko marrazkigile euskaldunak mendiarekiko eta, bereziki, Pirinioekiko duen zaletasuna eta maitasuna. Philippe Charlot gidoigile biarnotarrak ere partekatzen ditu horiek. Eta bion artean Flanchin anaien abentura ikaragarrizkoa komikia ondu dute, Harriet argitaletxearen eskutik euskaraz gozatzeko aukera dugula.
XIX. mende amaieran Pirinioetan kokatutako istorioan, topaketa batzuen lekuko izango gara: batetik, hartz bat, haren hezitzaileak hil dituen indiarra eta aita ankerrarengandik ihes egindako bi anaia gazteak; bestetik, haien atzetik dabiltzan soldadu-taldea eta aita; eta zer gertatuko da bi taldeek ere topo egitean?
Baina horiez gain, lan honetako protagonista nagusietakoa Pirinioak dira. Izan ere, Markoren ohiko marrazki bizien artean Auñamendi, Midi d’Ossau eta beste mendi batzuen irudi ederrak ere ikusiko ditugu, akuarela elegantez koloreztatuta. Komiki polita benetan, inondik begiratuta ere.
