Artikulu baten erantzunetara harpidetzeko aukera e-gorblogen
Gogoan al duzue, Bloglines edo RSS irakurgailurik ez zegoenean (edo ezagutzen ez genituenean), nola ibili behar izaten genuen gure gustoko blogetan egunero sartzen, ea ezer berririk zegoen ikusteko? Ia prehistoria iruditzen zaigu... Baina oraindik ere horrela ibili behar izaten dugu blog bateko artikulu interesgarriren baten erantzunak jarraitu nahi baditugu, guk zerbait erantzun dugunean adibidez! Ba hemendik aurrera blog honetan artikulu baten erantzunetara harpidetzeko aukera izango duzue, lehen aldiz euskal blogosferan!
Asmo hau aspaldi banuen ere, Eibar.org-i XML jarioen trafikoa (berez handia dena) ez gehitzearren ez nuen egin. Orain RSS-a FeedBurner zerbitzura pasatuta, hori egin dezaket.
Orain blogean zerbait idazten dudan bakoitzean, lan pixka bat gehiago egin beharko dut, artikuluaren feed-a FeedBurner-en alta eman behar baitut, baina merezi duela uste dut. Denbora pixka baten utziko dut artikulu baten harpidetza aukera hori, baina gero, artikulu batek jada erantzunik ez duela denboratxo bat pasatu denean, kendu egingo dut, infinituki luzatzea ez baitu zentzurik eta ez baitut FeedBurner-eko nire kontuko feed kopurua gehiegi handitzerik nahi badaezpada ere.
Beno, mezu hau izango da euskal blogosferan lehena (nik dakidala behintzat) bere erantzunetara harpidetzen uzten duena. Ea beste blog batzuk ere bide bera hartzen duten!
EGUNERATZEA: nirea ez da izango lehen blog euskalduna artikulu baten erantzunetara harpidetzeko aukera ematen duena. Ikusi dut blogthing-ek behintzat aukera hori ematen duela, eta hor daude ostatatuta hainbat euskal blog, Patxi Gaztelumendirena kasu. Barkatu handiustea.
> Badakizu gu KISS-aren aldekoak garela (Keep It Simple, Stupid!) eta kasu honetan ere uste dut aplikatu dezakezula.
Stupid deitu dizazula ulertu behar dut?! ;-)
> Nik uste dut hobe dela komentario guztien feed bat sortzea, artikulu bakoitzarekin feed bat sortu beharrean. Azken finean ez daukazu 100 erantzun egunean, eta... Horrela lan gutxiago, sinpleagoa, ez duzu feed zaharrak borratzen ibili beharrik. Egunen batean egunean 50-100 komentario etortzen bazaizkizu, orduan bakoitzarentzat feed-a jar dezakezu.
Beno, nire ustez erabilgarriagoa da horrela, norberak interesatzen zaizkion artikuluen erantzunetara bakarrik harpidetzea duelako. Eta niri ez dit horrenbesteko lana suposatzen... Kodea DTMLMethod bakarra da, egin behar dudan bakarra da artikulu bat idazten dudan bakoitzean artikuluaren zenbakia aktibo dauden artikuluen zerrendan idatzi (hor daudenei soilik jartzen diet linka) eta FeedBurner-en alta eman.
> Nik horrela egingo nuke.
Nik diodan modura edo zurera, baduzu egitea, nik badakizu utziko dizudala kodea eta nahi dituzun argibide eta laguntza guztiak eman. Eta egin dezakezu ez bakarrik zure blogean, zure ardura teknikoaren edo influentziaren pean daudenetan ere bai (Eibar.org-ekoak, Sustatu, Goienakoak...) Asko eskertuko nuke aukera hori izatea Sustatun!