Harrikadak

En castellano

Hegoaldeko askok gogoratzen ditugun Espainiako telebisten bi une.

Fernando Arrabal, hordituta, milenarismoaz hitz egin nahian, Fernando Sánchez Dragóren TVEko saio batean.

Francisco Umbral, haserre, Antena 3 telebistaren beste saio batean, bere liburuari buruz berba egin nahian. Aurkezle lanetan Mercedes Milá.

Mozkorra desagertu egin da panoramatik. Beste hirurak, nola edo hala, jarraitzen dute lehen lerroan.

En castellano

Victoria Eugenia Antzokian egon naiz Elkano Browning Cream taldearen emanaldia ikusten. Azken aldiz, 2000ko udaberrian egon nintzen teatroan. Gaur euria ari zuen sartzerakoan. Beraz, korrika eta presaka egin dugu barrurantz. Kanpoko obrak amaitu gabe daude oraindik eta eguraldi honekin ez zen giro (itoginak pergolan). Barrukoari ere gutxi erreparatu diot, baina uste dut jende asko zegoela.

Mikel Azpiroz donostiarraren proiektua da Elkano Browning Cream. Duela bi urteko formatua aldatuz (Fran Iturbe eta Karlos Aranzegi), kanpoko bi musikarirekin elkartu da diskoa grabatzeko: aspaldiko laguna duen Matt Harding, New Yorken bizi den Salt Lake Citytarra, eta Frank Mantegari paristarra, Alpha Blondy reggae taldeko bateria izandakoa zortzi urtez.

Gaztelumendiri irakurri diogu Berri Txarrak rock talde nafarra hemendik kanpo dabilela gora eta behera. Ez da makala ere Azpirozek gidatzen duen hirukoteak daraman bidea. Txina-AEB-EHn grabatutako diskoa, Europan eta Amerikan ari dira aurkezten (ikusi bira). Hilabete honetan Estatu espainiarrean ariko dira eta aukera izango duzue zuzenean ikusteko.

Zer eskaintzen duen EBCk? Musika beltza. Groovy, man! Ez zuten jende aproposena gaur aurrean (publikoa irrikitan dago antzoki berritua ikusteko eta askori bost axola zaio eskaintza), baina gozatu dutelakoan nago. Organoa, bateria eta gitarra, denak maila berean lerratuta. Argi gutxi, gehienetan estatikoa. Nahikoa zen gaur musika.

Bateriari begirik kendu gabe egon naiz ia emanaldi guztian. Izugarri gustatu zait.

En castellano

Igande goiz honetan alferkeriaz ordenagailuaren aurrean harrapatutakoak.

Bittori

Aurkeztu ez badute ere, gaur ikusi dut sarean dagoela Victoria Eugenia antzokiaren webgunea.

Doka

Lagun batek esan zidan Antiguako Kandela zena kafe antzoki bihurtzekotan dagoela. Izena ere aipatu zidan: Doka. Webgunearen erregistroa egina dago, enpresa sortuta dago ere: Doka Kafe Antzokia.

Laster jakingo da ekimen honen bultzatzaile direnen izen-abizenak, euskal kultura eta kirolaren bueltakoak, kontatzen dutenez. Zorterik onena opa nahi diet.

Fermin

Never say never again. 2004koa azken bira izango zela esan ostean, aurten ere ekingo dio Muguruzak lau hilabeteko tourrari. Europan abiatuko da apirilean (Paris, Durango, Donibane Garazi, Viña Rock…) eta Amerikan izango du jarraipena maiatzean (Mexiko, Kuba, Venezuela).

Laboa

Donostian ere ez. Bertan behera geratu da apirilean Laboak egitekoa zuen kontzertua. Martxoan Tolosan egitekoa zuena erori ondoren, apirileko guztiak geratu dira bazterrean.

Gertuko norbaitek, maitasunez, esango al dio, bapo, amaitu da? Eszenatoki gainean zenbat sufritzen duen jakinda, mediku-arrazoiak argudiatzen dituztela ikusita.

Zapiain

Ez da gaurkoa, baina astekoa bai. Garraio publikoaren aldeko mezu argia, gure filosofo kontenplalariak Bilboko metroan entzundakoa hamasei urteko neska bati: "vamos a ponernos de pie tía porque entre el tracatrá este y el piercin que llevo en el coño es que me voy a correr".

En castellano

Garai bateko Betis gustuko nuen; talde atsegina, zalego are atseginagoa (manque pierda). López Ufartek aste honetan kontatu du taldea Bigarren Mailara jaitsi zenean, abonatu eta bazkide kopurua igo egin zela laurogeigarren hamarkadaren bukaeran.

Gaur egungo jabeak boterea hartu zuenetik, gauzak asko aldatu dira. Ez da han bakarrik gertatu, futbola (eta ingurua) asko kakaztu baitira, han eta hemen.

Gehienok jakinaren gainean egongo zarete. Pasa den asteazkenean, otsailaren 28an, Betis eta Sevilla taldeen arteko norgehiagoka jokatu zen lehenengoaren zelaian. Jokoan Kopan urrats bat ematea, finala jomugan. Kanouték kanpoko taldea aurreratu zuenean, bigarren zatiaren hasieran, norbaitek botila bat jaurti eta buruan seko jo zion Juande Ramosi, Sevilla taldearen egungo entrenatzaileari, lehenagotik Betisen prestatzaile izandakoari. Ramosek konortea galdu zuen eta esku-ohe batean atera behar izan zuten bertatik. Partida bertan behera utzi zuen epaileak.

Gau hartan telebista kate ezberdinetan bota zuten irudia. Etxeko taldearen presidente den José León Gómez jaunak komunikatua irakurri zuen kameren aurrean:

"El Consejo de Administración del Real Betis Balompié, sus técnicos y jugadores lamentan el incidente que de forma puntual y aislada ha ocasionado la suspensión del partido de cuartos de final de la Copa del Rey entre el Real Betis Balompié y el Sevilla Fútbol Club".

Hori baino puntu gehiago ditu agiriak, baina hemen egingo dut planto.

Galdera: edozein biolentzia-motaren aurrean, behin eta berriro gaitzespenak eskatzen dituztenek, ahorik zabaldu al dute oraingoan?

En castellano

Irutxuloko Hitzan martxoaren 2an argitaratutakoa.

Nahi baino gehiago iraun duten berritze lanen bueltan, hilabete honetan abiatuko da XXI. mendeko Victoria Eugenia Antzokia. Etxafuegoak inaugurazio gala bakarrean edo publiko anitzaren gustuko programa osatuz izan behar ote duen polemika antzua alde batera utzita, 2006ko maiatzean Donostiako Kultur Proiektuen berri emateko Topaketetan Miguel Martínek adierazi bezala, beste hiri batekin egingo du topo teatroak.

Victoria Eugeniaren kudeaketari dagokionez formula berri baten bila aritu dira agintariak azken hilabeteotan. Urrian zurrumurru zena, San Sebastian egunaren ondoren behin-betiko erabakia izateko bidean da. PSE-EE eta EAJ alderdiek Donostia Kultura enpresa-erakunde publikoa egiteko akordioa hartu zutela jakinarazi zuten. Horrek zer esan nahi duen? Funtsean, Zuzenbide Pribatuaren eremupean sartzea aipatu erakundea.

Bertako langilea izanik, nire ikuspegia ez da objektiboa, baina beste zenbait udal elkarteren ibilbideari erreparatuz gero, ez dakit ezer onik ekar dezakeen erabakiak. Badakigu ere asko aldatzen ari direla gauzak eta bizitza guztirako enplegua pasa den mendeko kontua izango dugula laster. Malgutasunak agintzen du, besteak beste.

Nortasun juridiko berria legegintzaldi honetan gauzatu nahi dute eta hain garrantzitsua den erabakia presaka aplikatu. Gauzak horrela, kezkatuta utzi nau aldaketa prozesua nola komunikatu diguten langileei. Felipe González bezala, langileen ordezkariak komunikabideen bidez enteratu omen ziren bi alderdien arteko akordioaz.

Otsailean kezka iturri izan zen ere Urgulleko magalean dagoen Guardetxea norbaitek erre egin duela jakitea. Pena hartu nuen horren berri izandakoan. Toki atsegina delako, jarduera interesgarri asko egiten dituztelako, auto-kudeaketaren kultura hirian bizirik mantentzeko balio duelako. Besteak beste.

Egun horretan bertan betiko Donostiak atsegin handiz hartuko zuen beste albiste batek zer pentsatua eman zidan: Orfeoi Donostiarrak gune berria eraiki nahi duela Miramonen. Tartean, 1500 lagunentzako auditorioa. Harrigarria egin zitzaidan, iazko maiatzean izandako jardunaldi haietan proiektu horren berri inork eman ez zuelako. Gizarte-mota honek hain gustuko dituen beste proiektu erraldoi bat?

Hiriaren sinbolo diren elkarte eta erakundeek bezala, Reala kasu, Orfeoiak politikarien ateak joko ditu. Hauteskunde atarian, ate horiek argazkia egiteko zabalduko dira. Gero, gerokoak.

Guardetxeari dagokionez, berriz, zenbait udal agintarik trabak jartzen hasi dira jada. Soberan dute gune hori.

Igual ez da hainbeste aldatu hiria, Bittori.

En castellano

Gero eta telebista gehiago ikusten dut ordenagailuaren aurrean. Errua Youtube bezalako zerbitzuek dute eta han bideoak eskegitzen dituztenek.

Alta emanda nago blog honetan eta bertatik jarraitzen ditut Kataluniako telebistan emititzen dituzten Polónia saioaren asteko bideorik onenak.

Hau da otsailaren 23ko saioari dagokion bat. PPkoen bulego nagusira doa SGAEko kobratzailea.

Telebista programa honek ere badu jarraitzaileentzako posta zerrenda bat

En castellano

Aspalditik nuen Atabal aretora joateko gogoa eta atzo bete nuen nahia. Aitzakia: U-Roy jamaikarraren emanaldia.

Miarritzeko tren geltokitik gertu, ez da zaila inguruan aparkatzea eta, gainera, kontzertu-areto bikaina du (700 lagunentzako edukiera). Pega bakarra da eszenatokia ez dagoela oso altu eta hori arazo da gaur egungo belaunaldi lepoluzeak kontutan hartuz. Eraikinean badaude taberna bat, estudioa, entsaiatzeko gelak, multimedia-gela....

Jakina da Iparraldean reggae zaletasunak hegoaldean baino tradizio gehiago duela eta nabarmen geratu zen hori atzo. Aretoa betetzetik gertu zegoen gu iristerako.

Telonero lanak Junior Marvinek egin zituen eta bero utzi zion publikoa maisuari. Lehenengo artistarekin batera aritutako bandari (haizeak, gitarra, baxua, bateria, teklatuak) bi emakume gehitu zitzaizkion. Traje elegantea soinean eta kapela buruan sartu zen U-Roy ordubeteko showa egitera. Gustura egon nintzen.

Bihar, larunbata, Bilboko Santana 27 aretoan egongo dira musikariak. Portzierto, Miarritzen kontzertu-egunean sarrera 16 eurotan zegoen; bihar Bilbon erosiz gero, 21 euro. Iparraldean 700 lagun sar daitezke gehienez; Bilbon, berriz, 2000. Zergatik prezio diferentzia hori?

Hor behean uzten dizuet zaharrari buruzko pare bat lotura.

En castellano

Atzo goizean bidali zuen Garik mezu hau eibartarrak posta zerrendara:

"Ez dakit ezaguna izango den, baina badago kontzertuetako argazki piloa dituen argazkilari (itxuran) irundar bat. Agian Iturrik ezagutuko du eta agian Ibanek, Iturrik edo Poxpolok planteatuko diote erakusketaren bat, benetan argazki majoak ikusi ditut eta (...) Kortatu, Negu Gorriak, Angeles del Infierno, Rory Gallagher, La Polla, MCD, Scorpions eta beste pila bat".

Sartu naiz hemen eta konturatu naiz Jon Iraundegi zela fotografoa, Irungo Aterpe tabernakoa (Tren geltokiaren aldamenean dagoena).

Jonekin harremana izan nuen Bertso-hop Info aldizkaria egin genuen garaian (1993-1994). Oker ez banago garai hartakoa da Henry Rollinsen argazki hau; seguraski Bordelen ateratakoa.

Egile eskubideak: Jon Iraundegi

Oso tipo jatorra da eta oraindik ere kamera soinean ibiltzea gustatzen zaiola konprobatu dut. Une honetan 162 argazki igo ditu Flickr zerbitzura. Gaizki begiratu ez badut, denak 2007an zintzilikatuak.

Zenbait rockzalek utzitako komentarioak irakurtzeko aukera dago haren argazkietan eta denek flipatzen dute garai bateko argazkiak ikusita. Ideia ona litzateke haren argazki sortarekin erakusketa egitea, bai.

Bukatzeko hona hemen Jon, laster batean Donostian aritzekoa den Fitorekin.

Egile eskubideak: Jon Iraundegi

Argazkia: Irutxuloko Hitza

En castellano

Gaurko Irutxuloko Hitzan irakurri dut atzo kiskali egin zela Urgullen dagoen Guardetxea. Pena handia hartu dut, tokia zoragarria izatez aparte, Donostian gelditzen den auto-kudeatutako gune bakarrenetakoa delako.

Informazioa aipatu komunikabidetik kopiatuko dut:

"Urgulleko Guardetxean sutea izan zen atzo eta barrualdea erabat deseginda geratu da. Eraikin zahar hau azkenaldian Donostian kontzertu gehien duen aretoetako bat da. Hortaz, bertan ezingo dira gaurko programatuta zeuden kontzertuak egin. Datozen hilabeteetan ere, zaila izango da egitea".

"Suak Urgulleko guardetxea harrapatu zuen atzo goizean. Suhiltzaileek argitu bezala, ‘guardetxetik kea ateratzen ari zenaren abisua jaso genuen eta sugarrek eraikina kiskaltzen ari zirela topatu genuen bertara hurbiltzean’. Abisua, 8:45etan jaso zuten eta denera, bi kamioi eta beste bi auto abiatu ziren sutea itzaltzera. 13 pertsonek parte hartu zuten eta hiru bat ordu behar izan zituzten suarekin amaitzeko. Bertako altzari guztiak suntsitu dira, batik bat, bertan zeuden musika instrumentu eta tresna elektronikoak".

"Sutearen arrazoiei dagokienez, berriz, ezer gutxi argitu da, itxura guztien arabera, nahita sortutakoa dela ematen badu ere. Antza denez, suhiltzaile eta udaltzainek sua bi gunetan hasi dela esan dute. Era berean, gasolina arrastoak ikusi omen dituzte. EAJko bozeramailea, Xabier Ezeizabarrena, izan da kalteak ikusten".

Eguneratzea 20:30etan: apunte hau gazteleraz jartzeaz aparte, beste kontu batzuk gehitu dizkiot biharko pedrada honi. Guardetxearen egoera tamalgarria lotzen dut Orfeoiaren mega-proiektu berriarekin.

Eguneratzea: martxoak 15: gaurko dv-n notizia on bi.

Baga: Udalak eraikina berrituko duela.

Biga: sutea ustekabekoa izan zela, ez zuela inork piztu.

En castellano

Gozoak jarri dira batzuk, sarrera erosi ondoren, Viña Rock jaialdia Villarrobledotik Benicàssimera eraman dutela jakiterakoan. Eta arrazoi dutela uste dut. Dena den, sarrera itzultzeko prest agertu dira antolatzaileak.

Batzuk gogoratuko zarete iaz arazoak egon zirela Soziedad Alkoholika kartelean jartzeagatik (Ramoncínek zuzenean aritzeko izan zituen prolemak ahaztu gabe).

Aurtengo kartelari erreparatuz gero, hanka sartzea gustatuko litzaidake, baina beldur naiz ez ote diren iazko kontuak errepikatuko.

Martxoaren 25eko eguneratzea: azken aste hauetan zenbait gauza aldatu dira eta beste batzuk beti bezala jarraitzen dute.

a) Villarockbledo sortu da Villarrobledon. Ikus gaztelerazko apuntean nola haserretu diren bertakoak Matarile antolatzaileekin jaialdiaren lekualdaketagatik.

b) Manu Chao egongo da Benicàssim-en.

c) Negugorriak.net webgunean irakurri dut AVTk eskatu duela ez uzteko SAri eta fmri parte hartzen aurtengo edizioan.