Xabiroi, Angoulême-ko komiki-azokara
La cárcel de papel-en bidez jakin dut Ikastolen Elkartearen Xabiroi aldizkaria hilaren 26tik 29ra egingo den Angoulême-ko komiki azokan izango dela, Europako komiki azokarik garrantzitsuenean alegia.
"La cárcel de papel"-en Euskal Herriko Ikastolen Konfederazioa aipatutako azokan izango dela besterik ez dio, eta azokaren web gunean bilatuta aurkitu dudan bakarra da Euskal Herriko Ikastolen Konfederazioa argitaletxeko egile batzuk bertan egongo direla : Raquel Alzate, Marko Armspach, Edorta Arregi, Harkaitz Cano, Dani Fano, Iñaki G. Holgado, Olliver Gileron, Juan Luis Landa, Joxean Muñoz, Manu Ortega, Patxi Pelaez eta Asisko Urmeneta. Guztiak ere Xabiroiko marrazkilari edo gidoilariak direnez, argi dago Xabiroi aldizkariarekin zerikusia duten zerbaitegatik doazela azokara. Baina aldizkaria aurkeztera, aldizkariari buruzko erakusketa bat antolatzera, lehiaketetako baten parte hartzera, aleak sinatzera edo zertara doazen ez dut inon aurkitu. Norbaitek zeozer gehiago baleki...
Kaixo blog hau irakurtzen duzuen guztioi!
Xabiroiko koordinatzailea naiz, eta bertan parte hartzen duen komikigileetako bat. Saiatuko naiz e-gorrek egindako galderari erantzuten. "Xabiroi" ez doa komiki azokara, oraingoz ez behintzat, baina egileetako batzuk bidaia egingo dugu azokara eta akreditazioak eskatu genituen horretarako. Azokako antolatzaileek akreditazioa eskatu duten egileen zerrenda interneten publikatu, eta La Carcel de Papelekoek bertatik atera dute informazioa. Baina Xabiroik ez du inolako presentzia "ofizialik" izango. Goazen egileok dauzkagun harreman profesionalak zabaltzen saiatuko gara, besterik ez, aurten ez da Xabiroiren aurkezpenik izango. Aldizkaria eramango dugu, eta gure lana erakutsiko dugu, baina goizegi da guretzat kalean bi zenbaki besterik izanda, nolabaiteko presentzia ofiziala izateko. Angulemako azoka helburu izan behar du guretzat, baina ez orain. Sentitzen dut desilusionatu bazaituztet. Aurrerago, bi urteren buruan agian, saiatuko gara han aurkezpen bat egiten, edo, laguntzen bagaituzte, erakustoki bat ipintzen. Hala bedi!
Eskerrik asko bihotzez gure lanari ematen diozun oihartzunagatik,
Dani
E, GOGORATU!!... OTSAILEAN "XABIROI" LIBURUDENDETAN SALGAI! Lehenengo, bigarren eta hirugarren zenbakiak.