"OVNI" komikiaren erreferentzia
Irudia: Fabrice Parme
Plater hegalari bat izorratu da espazioan. Gidaria, alien bat, Lurra planetara iristen da plater hegalaria kontrolatzeko ahaleginean, baina atmosfera zeharkatzea eta lurraren kontra talka egitea gehiegi izan da ontziarentzat. Plater hegalaria deseginda dago. Aliena Lurrean harrapatuta dago, gainera, dinosauroen garaian. Gizakiak teknologia garatu arte itxaron beharko du espazio-ontzia konpontzeko eta alde egiteko.
(e-gorren oharra: Lewis Trondheim-en gidoia eta Fabrice Parme-ren irudiak dituen OVNI komikiaren komentario honekin, luxuzko beste kolaboratzaile bat estreinatzen zaigu blogean: Willy Roa Euskadi Irratiko Norteko Ferrokarrila saioaren zuzendaria eta nire lankidea Elhuyar Fundazioan)
Azken batean, aliena historiaren lekuko bilakatzen da komiki xelebre honetan. Marrazkiak umeentzako modukoak dira, bai, eta umeentzako komikia da (edo izan daiteke). Baina komiki askotan gertatzen den bezala, bigarren irakurketa bat ere badu. Historian zeharreko bidaian pertsonai ezagunak azaltzen dira, barrea eragiteko moduan. Pitagoras eta Jesukristo, besteak beste.
Hala ere, istorioak baino gehiago formatuak egiten du xelebre komiki hau. Ez dago hitzik. Bi orriko marrazki osoak dira, esan daiteke ez dela biñetarik, eta orri baten bukaera hurrengoaren hasiera da. Komiki hau orri erraldoi bakar batean antolatuta dago, nahiz eta liburu-formatua dela eta, orrialde-pare bakoitzean marrazki erraldoi horren zati bat besterik ez dugun ikusten.
Bestalde, ez da istorio bakarra. Lurra jo bezain pronto, alienak hamaika bide hartzen ditu aldi berean, eta bide bakoitzak berezko bukaera batera eramaten du; hiltzera, gehienetan.
Egia da ez duela komikiaren mundura iraultzarik ekarriko, baina formatua behintzat neurri batean bada orijinala. Oso komiki plastikoa da, umeentzat zein helduentzat egina, eta oso atsegina ikusteko. Luze jotzen du marrazki bakoitza ikusteak, eta, beraz, bada irakurlea harrapatzeko modukoa.
| Fitxa |
|---|
|
Izenburua: OVNI Gidoia: Lewis Trondheim Irudiak: Fabrice Parme Argitaletxea: Glénat Urtea: 2006 ISBN: 84-8357-009-2 |
Irudia: Fabrice Parme
Aupa Willy, eskerrik asko komikia uzteagatik, asko gustatu zait! Eta esker onez, lehen bi orriak eskaneatzea pentsatu dut artikuluan azaltzen duzuna hobeto ulertzen laguntzeko. Hor ikusten da nola alien-ak lurra jo eta gero, bere abenturak ramifikazio ezberdin mordoa hartzen doazen. Zuk esan bezala, gehienek heriotzera daramate, eta bide gutxi batzuk soilik pasatzen dira hurrengo orrira. Lurraren historia osoa erakusten digu, eta gizateriaren historiaren pasarte eta toki esanguratsuenak ere bai, alien-a horietako askoren lekuko baino areago protagonista eta kausa ere bihurtuz. Horrela, guiño piloa daude, eta oso jostagarria egiten da irakurketa.
Niri oso komiki? orijinal eta sinpatikoa iruditu zait, edozein adinentzat gomendagarria, ze niri ez ezik lau urteko seme Ximuni ere asko gustatu zaio eta asko disfrutatu dugu oherakoan elkarrekin ikusten.