Volgako Batelariak Durangoko Azokatik zuzenean
Volgako Batelariak
2008/12/08 21:08
Work in progress ariketa bat eginez, hementxe gaude Volgako Batelariok (Uxue Apaolaza salbu), 2008ko abenduaren 8ko 21:13etan, zuzenean, Durangoko Plateruenetik, sinadura egun gogor baten ostean, geure betebeharrari muzin egin gabe, jakin badakigula asko zaretela gure berri izan nahi duzuenok (hemendik besarkada handia gure fan zenbatezinoi). Editore inportante batek (baina zein ez den holakoa?) esan omen duen moduan, Volgako Batelariok geure burua "nabarmentzera" etorri gara Azokara, baina sakonean inork gutxik ulertu duen mezu batzuk zabaltzera etorri gara: hurrenez hurren, a) euskal literaturaren merkantilismoa salatzera, b) iraultzaren subjektuaren dekonstrukzioa egiterat, c) Juanjo kidearen "T" nobelan agertzen den modaren aldarria berraldarrikatzera, d) Cobrador del Frac-en estilora, euskal literaturak zor digun guztia kobratzera, ez baita gutxi, e) gure literaturgintzak behar duen korbata (eta palestino (eta arrosatasun)) dosia ziurtatzera. Oraintxe bertan ateratako argazki batzuen bidez (haietako batek jasotzen du artikulu hau zintzilikatzearen une historiko zehatza), izanen duzue honen guztiaren froga bat-batekoa.
EGUNERAKETA (2008-XII-9, 13:00)
Hemen duzue gaurko Berrian atzoko ekintxari buruz atera duten laburra.
Klaro. Jakina, ze uste zenuen, azken batean, postindependentistak garen arren, euskaldunak gara, koadrilan egiten dugu (ia) guztia. Hala ere, euskalduntasuna ez bada koadrilismoa behintzat gainditzeko ahaleginean, bakarkako ekintza kamikaze batzuk, suizidak noski, prestatzen ari gara, edozeinek ulertuko duenez, non burutuko diren zehaztu ez badezakegu ere.