JG Ballard: "Galdetegi baten erantzunak"
JG Ballard Zientzia Fikzioaren eremua erruz gainditzen zuen kultuzko idazlea zen. Hala izan behar Ingeles Hiztegietara ailegatzeko, adjektibo bihurturik; Collins English Dictionaryk halaxe dio "ballardian" sarreran: 1) of James Graham Ballard (J. G. Ballard; born 1930), the British novelist, or his works. 2) Resembling or suggestive of the conditions described in Ballard's novels & stories, esp. dystopian modernity, bleak man-made landscapes & the psychological effects of technological, social or environmental developments.
![ballard ballard](https://eibar.org/blogak/volga/images/ballard.jpg/image_preview)
Ezaugarri horiekin guztiekin, ulertzekoa da modernitatearen ondarearekin zer egin ez dakitela dabiltzan belaunaldi gazteek Ballard ikurtzat hartu izana. 2008an Bartzelonan erakusketa-jardunaldi batzuk antolatu ziren, Autòpsi del nou mil-lenni izenpean, idazlearen figura eta lanak aldarrikatzeko. Orduko hartan, Nocilla belaunaldi delakoaren balizko kideak ileetatik elkarri tiraka ibili ziren, nor ote ballardianagoa. Gu gerra guztietara berandu iristen bagara ere, dagokigun ballardismo kuota txikia ere aldarrikatu nahi dugu; eta horretarako, informazio gehigarri modura lotura batzuez gain, JG Ballarden azken ipuin liburutik (War Fever, 1990), umore sotilaz ondutako ipuin bat itzuli dugu.
Loturak:
Egileari buruzko webgune interesgarria
Youtubeko kanala egileari buruz
Ipuina:
GALDETEGI BATEN ERANTZUNAK
1) Bai.
2) Gizonezkoa (?)
3) a/a 3. terminala, Londreseko aireportua, Heathrow.
4) Hogeita zazpi.
5) Ezezaguna.
6) Barnado Doktorea Lehen Hezkuntzako Ikastetxea, Kingston-upon-Thames; Errege-erreformatorioa, Send, Surrey, Bruneleko Unibertsitateko Konputazio-Zientzietako Saila.
7) Zoru-garbitzailea, Mecca joko-aretoa, Leicester Square.
8) Ekidin ahal badut.
9) Sistema-analizatzailea, Sperry-Univac, 1979-1983.
10) Manchesterreko Koroa-Auzitegia, 1984.
11) Iruzur informatikoa eta kreditu-txarteletakoa.
12) Erruduna.
13) Bi urte, Packhursteko Errege-Presondegian.
14) Stockhausen, De Kooning, Jack Kerouac.
15) Une guztietan.
16) Egunean bi aldiz.
17) UNE, herpes, gonorrea.
18) Senarrak.
19) Nire desirarik handiena hura telebistako programa bihurtzea da.
20) 1986ko otsailaren 17an ikusi nuen lehenengo aldiz hildakoa, Londreseko aireportuko kaperan. Lehen lerroko eserleku batean otoitzen ari zen.
21) Garai horretan, 3. terminaleko aire-kontrolatzaileentzako komun matxuratu batean bizi nintzen.
22) 1,73 m., hogeita hiru urte, gorpuzkera mehea, larruazal albinoa, bizar fin eta beltza, istripu bateko zauriren bat bi eskuetan. Lehen begiratuan uste izan nuen terrorista palestinar bat zela.
23) EL AL-eko hegaldi-ingeniari bati lapurtutako uniforme-pantaloiak jantzita zeramatzan.
24) Gelditzen zitzaidan diruarekin itsaski-hanburgesa bat erosi nion solairu arteko kafetegian. Eskerrak eman zizkidan eta, kreditu-txartelik ez bazeraman ere, kutxazain automatiko batetik 100 £ atera zituen hall nagusian.
25) Sinetsita nengoen Nat Westeko kontu-gordailuetako kode informatikoetara sartzen lagunduko zidan figura mesianiko baten aurrean nengoela.
26) Ez zen egon ezein sexu-jarduerarik.
27) Richmondeko izotz gaineko patinaje-pistara eraman nuen, non, berehala, sei jauzi hirukoitz egin baitzituen. Patinaje artistikoan izena ematera animatu nuen, Europako Txapelketan eta Seuleko urrezko domina batean pentsatuta, baina bera izotz gainean itzelezko espiral bikoitzak marrazteari ekin zion. Azaldu nion horiek ez zeudela txapelketarako figura derrigorrezkoen artean eta berak esan zidan espiral horiek ADN sintetikoaren patroi bat irudikatzen zutela.
28) Ez.
29) Ulertarazi zidan harreman garrantzitsuak zituela Gobernuko goi-mailetan.
30) 17B suitea, Londreseko Penta Hotela. Komuneko zoruan lo egin nuen.
31) Oxford Street, Knightsbridge eta Earls Courteko kutxazain automatikoak.
32) Gutxi gorabehera 275.000 £ hiru astetan.
33) Bideo pornoak. Kamera Klimax eta Electric Blue-rekin bereziki interesatu zen.
34) Ia egunero.
35) Horditzen zenean. Betiereko bizitzaren oparia zekarrela zioen.
36) Penta Hotelean, Torvill eta Dean izotz-dantzariei aurkezten saiatu nintzen. Berak Burtsako eta Royal Society-ko kideak ezagutzeko interesa baino ez zuen.
37) Adin guztietako emeak.
38) Talde-sexua.
39) Marie Drummond, hogeita bi urte, salmenta-laguntzailea, HMV Records; Denise Attwell, hogeita hamazazpi, ikerketa-gainbegiralea, Geigy Farmazia-Industria; Florence Burgess, berrogeita hamabost, diakonoa, Elkarte Biblikoaren Liburutegia; Angelina Gómez, hogeita bost, azafata, Iberia; Phoebe Adams, berrogeita hiru, misilen aurkako gurutzatua, Orange kanpamentua, Greenham Common.
40) Batzuetan, haren iradokizunei jarraiki.
41) Ez asegarria.
42) Eiakulazio goiztiarra, inpotentzia.
43) Sexu-aldaketarako ebakuntza aholkatu zidan.
44) National Gallery, Wallace Collection, Museo Britainiarra. Jesusen, Zoroastroren eta Buda Gautamaren irudikapenaren gainean jakin-mina berezia zeukan eta antzekotasunei buruzko komentarioak egiten zituen.
45) Gerentearen baimenarekin, NE barrutia, British Telecom.
46) Antena, Postetxeko Dorreko teilatuan jaso genuen.
47) 2500 kHz.
48) Orion konstelaziorantz.
49) Beraren ahotsa entzun nuen, antza denez Betelgeuse izarretik igorria orain dela 2000 urte.
50) Londres osoan eta hego-ekialdean telebistako seinalea hartzeko arazoak.
51) Lehen postua telebistako audientzia-indizeetan, Coronation Street, Dallas eta Dinastia elkarrekin gaindituta.
52) Ohiko gonbidatuen artean Diana printzesa, Charles printzea eta Billy Graham doktorea zeuden.
53) Wembleyko Konferentzia-Aretoa alokatu zuen.
54) «Hilezkortasuna Gizaldiaren Zerbitzura.»
55) Gonbidatuak Zientzietako, Politikako, Elizako, Indar Armatuetako eta Ogasuneko jendea ziren.
56) Ordainketa oparoak.
57) Mayfair eta Regent Street-eko kutxazain automatikoak.
58) Diruari estimu handia zion, baina ez zen batere inpresionatu Torvill eta Dean-en irabaziez mintzatu nintzaionean.
59) Lotura kimikoaren izaerarekin tematuta zegoen.
60) Beraren ondoan, tribunan, honakoak zeuden eserita: 1. Erreginaren oposizioaren burua. 2. Royal Society-ko presidentea. 3. Canterbury-ko artzapezpikua. 4. Errabino Handia. 5. Diners Club-eko presidentea. 6. Ingalaterrako Bankuaren presidentea. 7. Ogasuneko Langileen Federazioaren idazkari nagusia. 8. Hertz auto-alokairuko presidentea. 9. IBM-ko presidentea. 10. Estatu Nagusiaren burua. 11. Henry Kissinger jauna. 12. Ni.
61) Adierazi zuen giza plasma germinalean barruratutako ADN sintetikoak zahartze-prozesua geldituko zuela eta giza bizitza ia mugagabe luzatuko zuela.
62) Agian milioi bat urte.
63) Iragarri zuen Diana printzesa hilezkorra zela.
64) Harridura/Sinesgaiztasuna.
65) Aisia-industrian inbertsio handiak egiteko aholkatu zion audientziari.
66) Libra esterlinaren balioa 8,75 $-etaraino igo zen.
67) Estatu Batuetako telebista-kateak, Time, Magazine, Newsweek.
68) Bigarren Etorrera.
69) Hirugarren Munduaren jarrera ezkorraren aurrean etsipen handia hartu zuen.
70) Kremlina.
71) Gurutze-misil baten buru bihur nadila nahi zuen.
72) Nire desilusio geroz eta handiagoa.
73) Ezinegon sexuala.
74) Richmond-eko patinaje-pistan denbora gehiegi ematen nuelako kexatzen zen.
75) Errege izendapena.
76) Libra esterlina 75,50 $-etaraino goratu zen.
77) Andrew printzea. Behin eta berriro.
78) Injekzio bat testikuluetan.
79) Albo-ondorioak inpotentzia iraunkorra eta antzutasuna ziren. Hala ere, hilezkortasuna ziurtaturik zegoenez, ondorengoak izatea ez zen beharrezkoa izango eta ugaltzeko grina atrofiatuko zen denborarekin.
80) Sexu-aldaketarako ebakuntza serioski hausnartu nuen.
81) Hilezkortasunari buruzko Gobernuaren Liburu Zuria.
82) Hamaika urtetik gorako populazio maskulino guztiaren testikulu-injekzio derrigorrezkoa.
83) Smith & Wesson bat, hogeita hemezortzi kalibrekoa, kanoi motzekoa.
84) Guztiz niri bururatuta.
85) Richmond-eko patinaje-pistan ordu asko, ADN patroiak, arrakastarik gabe, ezabatu nahian.
86) Westminster Aretoa.
87) Aldez aurretik pentsatuta. Zalantzatan jarri nituen beraren benetako motiboak.
88) Erailketa.
89) Ez nintzen Atzerriko Aginteko agenteek erosia ez bultzatua izan.
90) Ernegazioa. Londresko aireportuko nire komunera itzuli nahi izan nuen.
91) Diana printzesaren eta Nevadako gobernadorearen artean.
92) Honela mintzo zen Zaratustra-ren klimaxean.
93) 2,17 m.
94) Hiru tiro.
95) O taldeko odola.
96) Ez zuen eternitatearen gainontzeko denbora nire konpainian eman nahi.
97) Heriotzara zigortuta, ziegan Canterburyko artzapezpikuaren ordezkari bereziaren bisita jaso nuen.
98) Jainkoaren Semea hil egin nuela.
99) Pixka bat herren zebilen. Esan zidan, preso kondenatua nintzen aldetik, ni bakarrik egon nintzela injekzio esterilizatzaileetatik kanpo, eta nire oraingo betebehar bakarra nazioaren jaiotza-tasaren lehengoratzea zela.
100) Bai.
JG Ballard, Gerra sukarra, 1990