Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Volgako Batelariak / (Euskal) Estilo-Ariketa (VIII): Iritzi-zutabe eusko-internazionalista

(Euskal) Estilo-Ariketa (VIII): Iritzi-zutabe eusko-internazionalista

Volgako Batelariak 2009/06/01 17:44
Zortzigarren estilo ariketa honetan kazetaritzara jo nahi izan dugu, bertan, bizitza bera bezain efimero, literaturarik onena akaso lantzen ari direlako hainbat zutabegile begizorrotz bezain ipurtarin, eta seguruenik, akaso beharrik gabe, ezkerra eta abertzaletasuna (shaken, not stirred) XXI. mendean, XXII.ean kasik, kokatzen ari baitira, garai bateko zilborrismoa bazter utzita, nazioen kontzertuarekin harmonian.

ARROTZ ESNEA

Diyarbakir hiri kurduko erretoki batean dugu hitzordua egina. Herri hau, Euskal Herria bezala, askatasuna ukatzen zaien herri guztiak bezala, matriarkatuaren arauetan irmoki errotua egon denez, emakumezkoak bere kabuz libre ibil daitezke haien artean, hara-hona samurretan, estatubatuar estatuko morroien so gupida bakoen mende. Elkarrizketatu behar dudan emakumea, aktibista bera, nire aurrean dago, puntual etorrita. Nik andrez jantzi behar izan dut, Mahroub-i arazorik ez ekartzeko.

         Grabagailurik gabe, koaderno batean notatzen ditut berak esandakoak, eta bihotzean ere grabatu egiten zaizkit imintzio esanahitsuak, begirada arakatzaileak, eskua altzora eramateko modu babeslea, amatiarra.

women

         Zerbitzaria mahaira hurbildu eta Mahroubek, bero sapa uxatzeko, bigarren tea eskatu du, eta niretzat esne basokadatxo bat, seguruenik herrialde oprimituen erro komunetik edoski nahia sumatu didalako, egarri asegabea.

         Mahroubek jarraitu du hitz egiten; askatasun osoz espresa dadin uko egin diot enbaxadak eskainitako itzultzaileari, eta elkarren hizkuntza ez dakigun arren ez dugu zubirik behar, begiradek osatzen dute zubi premiazkoa, sufrimenduz eta amorruz betetako begirada eztiek. Mahrouben soak orain horman gora egin du, suspirio bat boteaz, etsiturik, Bilboko edozein taberna zulotan telebista tresna lo-eragilea legokeen toki berdinera, baina hemen eroritako heroi baten margoak hartzen du tokia: bizarduna, gaztea, kopeta estalirik, metraileta bat eskutan. Etorkizunaren oroi-minak hartu nau eta etxekotu.

         Kalean behera gizon tropel bat jaisten ari da, herri bat abian, Mahroubek zerbait azaldu nahi didala ematen du, beldurra igo zaio begitartera, nigatik lasaitu dadin esan nahi diot, ehunka besok hilkutxa bat daroate airean, altxatzekoa egin du; nik, eskua berearen gainean jarrita, eutsi diot. Malko bat isuri zaio masailean behera, gure gainean dagoen gaztearen erretratuan begia itzali eta sabelalde handituxea seinalatu duen bitartean. Dena ulertu dut.

etiketak: Testuak
Dani Irigoien
Dani Irigoien dio:
2009/06/13 22:13

Beste estilo-ariketa baterako proposamena: "kronika autobiografikoa: Oi ze malerusa ni-poliziek torturatu naute jaun epaile". Horrekin ere jendea barrez lehertuko litzake, seguru.

Dani Irigoien
Dani Irigoien dio:
2009/06/13 22:06

Hau grazia egiteko asmoarekin idatzia al dago?

Zaila da zinismoaren eta sarkasmoaren arteko muga markatzea...

Volgako Batelariak
Volgako Batelariak dio:
2009/06/15 03:10

Planteatu dituzun zalantzei erantzuna Rafael Reigek eman zizun hemen.

Ez horregatik.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Volgako Batelariak / Бурлаки на Волге

Literatur inoizkari kosakoa / Казацкий литературный журнал

Moñoñotasuna, zurikeria, bertso-kitsch-laritza, biktimismo orokortua, produktu literario paketatua, euskararen kalonjeen (uler bedi: irakurle militanteen) nagusitasuna, plastidekor-idazleak, malditismo faltsuaz mozorrotutakoak, laurogeiko hamarkadaren (eta aurreko ia guztien) nostalgia... horiek guztiak gaitzesten eta gaitzetsiko ditu inoizkari honek, eta  beldurrik gabe salatuko. Akaso ez dira salagarri eta denbora galduko dugu, baina esan bezala, gogoak ematen dizkigu hala egiteko, dibertitu nahi dugu, eta dibertituko gara. Nahiz eta, funtsean,
eta inork sinesten ez gaituen arren, oso jende serioa garen.

Uxue Apaolaza, Rikardo Arregi Diaz de Heredia, Ibon Egaña, Angel Erro, Juanjo Olasagarre eta Iban Zalduak osatzen dugu kontubernio hau. Erantzunak ongi etorriak izango dira (edo ez), baina beti benetako izen-abizenez sinatuta datozen heinean, eta kolaborazioak ere onartuko ditugu.

Azken erantzunak
Beti geratuko zaigu Symborska, bai (eta ezagutzen ... Juan Garzia Garmendia, 2019/03/22 08:45
Ziurrenik ez naiz ni egokiena poesia liburu batez ... Iban Zaldua, 2013/02/19 18:09
Iruditzen zait, erabat, gehiegi puztu den liburu ... Josu Lasa, 2013/02/16 01:18
12. oharraren parentesia itxita egonda ... Angel Garcia Etxandi, 2013/02/08 21:17
Hori, hori! Txus Imirizaldu, 2013/01/10 14:45
Ez naiz filologoa ezta kritikoa ere, ... Koruko Heras, 2013/01/09 11:19
Aurreko erantzunaren argigarri eta emendagarri ... Iñigo Roque, 2013/01/08 10:46
Fikzio bat da liburua, Iban, baina ez nuke ... Iñigo Roque, 2013/01/07 12:53
Zuen arteko iritzi trukaketa hilaren 12an amaitu ... Angel Garcia Etxandi, 2012/07/30 02:05
Beñat eta Iban. Eztabaidarako gai interesgarriak ... Ibai Atutxa, 2012/07/12 19:44