Etxepare Institutuko nazioarteko katedren zerrenda

“Koldo Mitxelena” katedra. Chicagoko Unibertsitatean ezarriko da, eta negoziazioak nahiko garatuta daudela dirudi honezkero. Hizkuntzalaritza Aurreindoeuroparra eta Koktelgintza Aurreratua (vodkaren konbinatuen arloan, bereziki) izango dira bertan eskainiko diren ikasketa espezializatuak. Abiatzeko hitzaldi-zikloa Joseba Lakarra irakasleak emango du; Juan Martin Elexpuruk konfirmatu du jada bere presentzia, campuseko sarreran, Iruña-Veleia auziaren inguruko pankarta batekin.

“Karmele Jaio” katedra. Benaresko unibertsitatean sortuko da (Uttar Pradesh, India), eta haren aztergai nagusiak Eguneroko Bizitzaren Oinarrizko Psikologia Ebolutiboa eta Euskal Inteligentzia Emozionala (I eta II) izango dira. Rio do Janeiroko “Paulo Coelho” katedrarekin neba-arrebatuta egongo da, eta kolaborazio horrek, dibisak ez ezik, oso bibrazio onak produzituko dituela espero du Aizpea Goenagak, Etxepare Institutuko zuzendariak.

“Joseba Sarrionandia” katedra. Katedra hau ibiltaria izango da, eta aleatoriotasuna izango du ezaugarri nagusitzat, hau da, munduko unibertsitate ezberdinetan joango da aleatorioki ezartzen, aurretik sorpresazko matrikulazio-kanpaina laburrak bultzatuko direlarik. Jorratuko diren gaiak, halaber, anitzak izango dira, eta urtez urte joango dira aldatzen zozketaz: ipuingintza fantastikoa, poesia soziala, saiogintza konprometitua, helduentzako haur eta gazte literatura, espetxe-segurtasunaren hastapenak… Cervantes Institutuaren diru-laguntzak eskuratzeko dokumentazioan “Jon Juaristi” katedra bezala izendatuta agertuko da beti.

“Arantxa Urretabizkaia” katedra. La Sorbonne-n fundatuko litzateke, Iritzigintza Orokorra eta Geriatria  Literarioaren espezialitateen inguruan. Hondarribiko udalak ordainduko du, antza denez, haren kostuaren zati bat, katedrari izena ematen dion idazleak Alarde garaietan Parisera eskola batzuk ematera joateko konpromisoa hartuz gero.

“Pako Aristi” katedra. Etxepare Institutuak ez daki oraindik katedra hau zein unibertsitatetan fundatuko den, ezta bertan zeri buruzko mintegiak eskainiko diren, baina guztiz premiazkoa ikusten dute Institutuko adituek, idazlearen hurrengo intziri-artikulua saihesteko bidean (ezin izan ditugu konfirmatu, ordea, “Edorta Jimenez” katedra baten inguruko zurrumurruak).

“Imanol Galfarsoro” katedra. Durhameko Unibertsitateko Filosofia sailak eta British Encryption Service-k, elkar hartuta, “Imanol Galfarroso” katedra abian jarri dute, puntako filosofoen testuak euskara baturrora itzultzeko asmoz: hitz joko, anakoluto, puntuazio mistiko edo orozizekizazio pribatiboaren bidez, literaturaren errefutazioa burutzeko eta nazioarteko eta garaiarteko ezkerraren norabide eta helmuga ezinbestekoa Euskal Gatazka (Azka-Tag) dela frogatzeko. Volgako Batelari guztiok izena emanda gaude, bekadun.

“Koldo Izagirre” katedra. Leningradeko unibertsitatean zabalduko da, Hizkuntzen Heriotza Konparatuaren ikerketen koordinaziorako nazioarteko zentro profetiko-apokaliptiko gisa. Katedraren titularra aukeratzeko modua izango da bere berezitasun nagusienetako bat: postua emango zaio soilik hura eskuratu bezain laster katedrari uko egiteko prest dagoenari. Froga guztiak gainditu ondoren hautagaiak postuari eustea erabakiko balu, automatikoki autosuntsituko litzateke (katedra).

“Kirmen Uribe” katedra. Hau ere, ezinbestean, Manhattango New Yorkeko unibertsitatean ezarriko da, “Bernardo Atxaga” katedra (dena delakoagatik) iraungitzen den unetik bertatik, eta haren gaia Euskal Literatura eta Hizkuntza izango dira, orobat, Ornitologia Poetikoarekin batera. Baina, “Bernardo Atxaga” katedrak ez bezala, ez du irakasle berezirik edo berririk kontratatuko, idazle gazteak emango baititu eskola guztiak (urteroko sarrera-errezitaldia salbu, Jon Kortazarrek eta Mikel Urdangarinek osatutako bikoteak performatuko duena).