Angel Erroren paradisua

Iragarri bezala, Volgako Batelariren batek inoizkarian kritika bat plazaratu aurretik, Audenen galdetegiari erantzungo dio, txintxo-txintxo. Hona hemen lehenengoa, Angel Errorena hain zuzen ere. PARADISUA

Paisaia: Hiritarra, urrunean mendi elurtuak.

Klima: Hotz eta bero erteuroparra.

Hizkuntza: Etxean edozein. Harreman sozialetarako, hizkuntza hil bat, arrazoi nabariengatik noizean behin aldatu beharko zena.

Biztanleen jatorri etnikoa: Erdiak islandiarrak, erdiak nubiarrak. Baina gaur egun ez zaigu inori nabaritzen.

Pisu eta neurriak: Sistema metriko dezimal gutxi gorabeherakoa.

Erlijioa: Gehiegi zehaztu gabe, musikaren bidez baino ez zen adieraziko sentimendu erlijiosoa.

Hiruburuaren dimentsioak: 20.000 biztanleko 20 auzo ez hurbilegiak.

Gobernu modua: Hilurren dauden erien artean, bat hautatu diktatore.

Natur energien iturriak: Zaborra.

Jarduera ekonomikoak: Gehienbat, aisialdira zuzendutako artisautza (telebista polikromatuak, entziklopedia eskuz idatzi eta ilustratuak, film emanaldi bakoitzerako pelikula bera generoz eta azpigeneroz aldatzea,...).

Garraiobideak: Biplazakoak gehienez.

Arkitektura: Neobarrokoa, baina barroko protestantearen errebisio bezala ulertuta.

Altzariak eta etxeko tresnak: Bi altzaria, pertsona bakoitzeko. Bi ohe, bi orratz, bi pantaila, bi ispilu. Badaezpada.

Janzkera formala : Beroki luze ireki entailatua. Beltz edo gorria. Barruan edozein Schubertek edo Beethovenek eramanen luketena. Les femmes, George Sandek jantziko lukeena.

Hedabideak: Sexua.

Monumentuak: Estatua biluziak, ez nahitanahiez marmolezkoak.

Dibertsio publikoak: Zinema epikoa ilargian proiektatua (azkenaldian oso modan), filosofia eztabaida antzuak (norberaren existentzia demostratu edo/eta gezurtatu, esaterako), imposibilia edo adynaton txapelketa telebistaratuak.