Aurkezpen gisa

 Oraingoz, atal hauek izango ditu inoizkariak:

-Elkarrizketak atalean literaturarekin edo artearekin zer ikusia duen jendearekin hitz egiten saiatuko gara. Egin den hizkuntzan eskainiko da elkarrizketa: euskaraz burutu bada, euskaraz; ingelesez izan bada, ingelesez, etab.

-Inoiz idatziko ez nukeena: sekzio honetan, edozein testu onartezin onartuko da, egileak ziurtatuta daukalarik testu hura inoiz ez dela beretzat inoiz, inon, inola, inork aipatua izango. Egileak askatasun osoa du, beraz, bera ez den idazlea izateko, gorroto duen estiloa argi uzteko, antipoetika adibidetzeko, ez dakit zer parodiatzeko, jolaserako, gazte zeneko testu arnegatu eta irakurrezina agertzeko...

-Kritikak atalean liburuen kritikak argitaratuko ditugu, noski. Azken aldiko nobedadeen artean (eta zaharrago batzuen artean ere bai) zenbait aukeratu eta zoriz banatuko ditugu (gutxi gora-behera) VBko idazkuntza-batzordeko partaideen artean.

-Irakurri gabeko liburuen kritikak: egunkarietako eta unibertsitateko kritikoek halakoak egiten badituzte, zergatik ez Volgako Batelariak-ek? Guk, behintzat, abisatzen dugu eta, gainera, ez dugu sosik kobratuko. Edonola ere, ziurtatzen dugu atal honetan agertuko diren liburuak ez ditugula irakurri, eta kritika egiteko bakarrik oinarrituko garela liburuaren kontrazaleko edo hegaleko informazioan, aurkezpen-ekitaldiari buruzko albisteetan, egileari egindako elkarrizketetan, beste kritikarien iruzkinetan, etab. Eta, batzuetan, ezta horretan ere.

-Testuak atalean literaturaren inguruko gogoetak, burutazioak, itzulpenak, etab. eskainiko ditugu. Sorkuntza lanak izango dira, baina, oro har, ez-fikziozkoak, aukera hau guztiz baztertzen ez dugun arren.

-Volgako Batelarien ukaseak: erredakzio-batzordearen ohar kolektibo eta jakingarriak plazaratuko ditugu atal honetan, aurkezpen hau bezalako testuak alegia.

Volgako Batelariak aldizkariak kolaborazioak onartuko ditu, helbide honetara bidaliko direnak: hepzagoi@vc.ehu.es . Dena dela, kolaborazio bat argitaratua izateko erredakzio batzordearen onespena jaso beharko du lehenago.

Inoizkariko artikuluei erantzuna eman ahal izango zaie blog honetan bertan, baina beti ere erantzuna izen-abizen errealez edo ezagunez sinatuta badator. Baldintza hori ez bada betetzen, edo betetzen ez dela susmatzeko arrazoirik balego, aldizkariak ez du argitara emango.

Bide batez: inoizkari honen aurkezpen publiko eta nazionala apirilaren 6an egingo dugu, asteazkenarekin, arratsaldeko 21:00etan, Gasteizko Gora tabernan (San Frantzisko kantoia 1, alde zaharra). Bertan egongo gara erredakzio batzordeko kideak, pintxoak banatuko dira, eta, amaitzean, DJ saioa DJ Ilun (Zaldunbiderekin). Ezin duzu huts egin!