Volga Sarietarako deialdia

 

Sarien kontuan egun nagusi den anabasa honi guztiari behin betiko aurre egiteko sortu dira, beraz, Volga Sariak, gaur deitu eta jakinaraziko den data batean publiko egingo direnak.

Sariak

0- Volga Sariek euskal literaturaren alderdi ezberdinak saritzea dute xede nagusia.

0/0- Sari hauek EZ dute euskaraz idatzirik EZ dauden lanik euskal literaturatzat hartuko, salbuespenak salbuespen.

0/0/0- Volga Saria ondoko kategoriatan banatzen dira:

0/0/0/0- Volga Sari Nazional Nagusia, urteko liburu onenari.
0/0/0/1- Rasputin Saria, kritikarik kriptikoenari.
0/0/0/2- Ana Karenina Saria, urteko idazle-irudi erakargarrienari.
0/0/0/3- Libururik eskasenari Krimen eta Zigorra Saria.
0/0/0/4- Liburu transmarikabolloenari Yogurina Viborova Saria.
0/0/0/5- Libururik nazionalenari Transiberiar Saria.
0/0/0/6- Okhrana Saria Urteko euskal liburu espaiñolenari edo frantsesenari.
0/0/0/7- Ibilbide osoari eskainitako merituzko Tolstoi Saria.
0/0/0/8- Eliza Ortodoxoaren Patriarka Saria: muturreko duintasun literarioari.

Epaimahaia

1- Volga Sarien epaimahaia bost kidek osatuko dute, euskararen menperakuntza eta prestigio aitortua duten literatur aditu eta sortzaileen artean aukeratuak izango direlarik.

1/1- Epaimahaia behin osatuta, haren kideen estatusa bitalizioa izanen da, salbu eta idatzizko ukazioa aurkezten bada, eta gainontzeko epaileek legearen arabera hala onartzen badute.

1/2- Sariaren izaera nazionala ziurtatze aldera, EHNA agiriaren jabetza frogatzeaz gain, eta Sariaren aniztasuna finkatze aldera, epaimahaiaren osaketa ondoan zehazten den eran burutuko da:

1/2/1- Bi nafarrek, bi arabarrek eta bi gipuzkoarrek osatuko dute, epaileen kopurua bost baino gehiagokoa izan ezin delarik.
1/2/2- Hiru poetak, bi nobelagilek, literatur kritikari batek, Anariren letrista batek eta kontakizun laburren egile batek osatuko dute, epaileen kopurua bost baino gehiagokoa izan ezin delarik.
1/2/3- Gizonezkoen eta emakumezkoen kopuru berberak osatuko du, epaileen kopurua bost ez besterik ezin delarik izan.
      1/2/3/1- Sexu konputoari dagokionez, euskal jakinduriak akreditaturiko sistemaren arabera, gizonezko homosexuala erdigixontzat hartuko da, hala nola emegixontzat. Emakumezkoa, aukera sexuala edozein duelarik ere, pertsona osotzat hartuko da. Gizon heterosexualak (besteizenez, gixajoa) arrazoi nabarmenengatik zero konputatuko du.

1/3- Aurreko puntuan epaimahaiaren osaketarako zehaztu jarraibide guztiak aintzakotzat hartuta, berau ondoko bost lagunek osatuko dute: Rikardo Arregi Diaz de Heredia, Ibon Egaña, Angel Erro, Juan Jose Olasagarre eta Iban Zaldua.

1/3/1- Volgako Batelarietako epaimahaiak koskorretan paratzen zaiona erabakiko du literatur irizpideei batere jaramonik egin gabe, eta, adibidez, saria liburu jakin batekin lotuta doala eman dezakeen arren, epaimahaiak pertsonalismo osoz joka dezake eta saria ibilbide edo figura bati eman, nahiz eta epaiaren aktan kontrakoa aitortu (edo ez).
1/3/2- Volgako Batelarietako epamahiak amigismoz erabaki dezake sarien epaia.
1/3/3- Volgako Batelarietako Sariei ezin izanen zaie uko egin. Baldin eta norbait uko egitera ausartuko balitz euskal literatura autonomikotik lekutua izanen da, eta itzultzeko erreabilitazio prozesua egin beharko du:
       A-Bertsolaritzaren goraltze ekitaldi batean parte hartu beharko du.
       B-Buenismoaren aldeko manifestu bat sinatu beharko du.
       C-Euskal Gatazkari buruzko ipuin edo poema edo saioa idatzi beharko du, originala eta berritzailea izanez.
       D-Euskadi Sarietako epaimahai izan beharko du eta, lana egin ondoren, urkabe batean lotuta egongo da bizpahiru egunez, laido kolektiboaren mende, Zarautzen, Susa argitaletxeko egoitzaren parean.
   Hala ere, erreabilitazio prozesu honetan parte hartu nahiko ez balu zuzenean Sakhalingo uhartera herbesteratua izanen litzateke.

Kontuan hartuko diren lanak

2- Aurreko urtean argitaratu euskarazko lan literarioak dira sarigarriak, ez guztiak noski, baizik eta arrazoi batengatik ala besteagatik epaimahaikoen belarritara iritsitakoak, goiti beheiti ez halabeharrez irakurritakoak. Izan ere, azken batean ez dute zertan aurreko urtekoak izan behar zehazki, baizik eta baita aurreko edo etorkizuneko urte batekoak ere.

Epai irizpideak

3- Kategoria bakoitzerako egokien iritzitako lanari esleituko zaio saria, beti ere ondoko baldintzak kontuan hartuz:

3/1- Egilea gure adiskidea den ala ez.

3/2- Egileari zerbait zor diogun ala ez (batez ere dirua denean).

3/3- Argitaletxea zein den.

3/4- Azalaren itxura eta (balego) hegaleko argazkiaren edertasuna.

3/5- Kontrazaleko testuaren edukia edo desedukia.

3/6- Prentsari eginiko adierazpenak, aurkezpen egunekoak batik bat (Hasier Etxeberriak Sautrelan nola tratatu duen har daiteke aintzat, halaber).

3/7- Egileak euskal literatur kanon piramidalean daukan behin-behineko kokapena, Richter eskalaren arabera neurtua.

3/8- Liburuek meritu hobeagorik ez balute, epaimahaiak, ultima ratio bezala beti ere, bere gain har dezake liburu sarituak irizpide literarioen arabera aukeratzeko eskuduntza.

Sari emanaldiaz

4- Ez da Sarietara aurkeztu beharko, liburuak ondasun publikoak dira, eta iritzi publikora irekiak, hortaz ezin zaio Sari hauetako bati ere uko egin, ez onarpena eman. Sari hauek indefektiblementean emantzat jotzen dira epaimahaiaren ebazpenarekin batera.

4/1- Aurreko puntuaren salbuespen bakarra, epaimahaikoek hala erabakiko balute, Sari emanaldira agertuta, haiei pertsonalki jakinaraztea litzateke. (edo Eliza Ortodoxoaren Patriarka Saridunak, bere ahalguztiduntasunean, bere borondatea egin dezake eta saria ez onartu, baita Sari honen hurrengo deialdirik ez dadila egon ere)

Azken xedapenak (but not least)

5- Edozein pertsonak erosi edo sobornatu ahal ditu epaimahaikideak. Onartuko diren sobornoak hauek izango dira: euroak, sexua edo droga ezlegalak. Ez dira euskal sukaldaritza zahar edo berriarekin zerikusia duten sobornoak onartuko, ezta beste sukaldaritzekin zerikusia dutenak ere.

5/1- Edozein epaimahaikidek erosi edo sobornatu ahal ditu beste epaimahikideak. Onartuko diren sobornoak sobornatzailearen eta sobornatuaren artean zehaztuko dira.