Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Eibarko periferiatik

Mikel Larreategiren bloga

"Aizkorri gainari" Eusebio Igarzabalek jarritako bertsoak

Mikel Larreategi 2018/10/22 15:56
Arantzazu edo Urbia ingurura joaten naizenean txikitako oroitzapen bat etortzen zait burura: igande goizean gosaltzen nengoela, Arrate Irratia jarrita, bertan jartzen zuten bertso-sorta bat

Bertso-sorta hori igandero-igandero jartzen zuten goizetan Arrate Irratian. Estrofa solteak nituen buruan baina bertso osoak ez. Pare bat aldiz irratia jarri dut igande goizetan baina ez dut bertso-sorta entzun... Beraz, asteburuko irteeraren ostean, Arrate Irratira idaztea erabaki nuen ea han pistarik ematen zidaten. Berehala erantzun didate Arratetik bertso-sortaren MP3arekin, hango Agurtzaneren hitzetan "Oker ez banabil, Eusebio Igarzabalen bertsoak dira, Aitzgorri gainari jarritakoak."

Hemen, Arrate Irratiaren eskutik, bertso horien letra eta MP3a.

Igande goiz bateko
nere mendi jira
bertsoz eman nahi nuke
Euskal Herrira.
Ohetik jeiki eta
juan naiz tranbira
bertan Zegamak duen
goiko geltokira.
Handik Aizkorrira
eguzki dirdira
jarri naiz begira
Andraiztik Urbira
oraindik gauz ederrak
ikusten dira!

Behelainoak joan dira
norabait igesi
eguzkian indarria
danean hasi.
Besteak beste gauz bat
nahi nuke bereizi:
behi ardi eta behor
nola diran bizi:
dana jaten hasi
han ditut ikusi
ta egin dit grazi
pentsatzen naiz hasi:
gizonak hori ezin
al du ikasi?

Mendiak edertasun
asko du beregan
hango pake giroa
zein ederra dan:
birigarroak kantuz
ta enarak hegan
halako bizi poz bat
ohi dute eman!
Ta abereak han
portatzeko eran
gutxi gora beheran
zer pentsatu dedan:
ez dakidala gu zer
abere geran

Gipuzkoako gain hau
ikusmiren jabe
aurrean Arabako
lautada berde
eskubira Bizkaiko
mendiak han daude
ezkerrera Nafarro
zu ere hor zaude
danak bertan gaude
ez da mila alde
ta egin dut galde:
zer hau baino hobe?
Ametsetan jardun naiz
lo hartu gabe

Ordu erdi bat pasa
bokadilo janez
begieri atsegin
ona emanez
zerua ederra da
esaten dutenez
hau baino ederrago
nere ustetan ez
eta zorionez
egin diot promes
edo behintzat ames
banaiz osasunez
berriro aurki arte
agur esanez

 

 

Bihotzeko fonoteka

Mikel Larreategi 2018/08/05 21:05
Horixe du izena Euskadi Irratiko saio batek. Azkenaldian udan behin eta berriz nire bidean gurutzatzen da saio hau. Zergatik? Ez dakit ba...

Ez zaizue inoiz gertatu zerbait behin eta berriz zuen bidean gurutzatzen deneko egoera hori? Ba azken uda hauetan behin eta berriz gurutzatu da Euskadi Irratiko saio hau nire bidean.

Webgunean ikusi daitekeenaren arabera, badirudi udako programazioaren barruan bakarrik ematen dutela saioa, eta izan ere udako programak bakarrik aurkitu ditut EITB Nahieran.

Lehenengo kontaktua uste dut Mikel Iturriaren bloga irakurrita izan nuela orain dela urte batzuk. Ondoren, urte hartan bertan, kotxean nonbaitera nindoala tokatu zitzaidan programaren zati bat entzutea. Beste uda baten, lagun bati Twitterren ikusi nion programa horretan izango zela, eta gero abuztu hartan berriz ere tope egin nuen programarekin kotxean. Aste honetan ere kotxean egin nuen topo programarekin.

Programaren mekanika erraza da: gonbidatuak bere bizitzaren errepaso bat egiten du gustuko dituen edo bere bizitzan esanahiren bat izan duten 10 kantarekin. Ordubete inguruko saio atsegina da mota askotako musika entzuteko.

Ni ez naiz oso musikazalea izan ezta musika asko erostekoa edo kontzertu askotara joatekoa, baina irratsaio horietako gonbidatuen ariketa egin dut: 10 kanta aukeratu, nire bizitzan zehar esanahiren bat edo momenturen bati lotuta daudenak. Bateron bat kanpoan utzi dut, eta besteren batzuk "fusionatu" egin behar izan ditut 10 horietan sartzeko. Youtube erabili dut bilduma egiteko, hemen duzue nahi baduzue.

 

100 mendiak: 2017ko igoerak

Mikel Larreategi 2018/04/04 21:05

2016 urte bukaeran Mendiak izeneko Android aplikazioa argitaratu genuen lanean (orain iphone bertsioa ere badugu). Alde batetik aplikazio hori probatzeko aitzakiarekin, udan egin genuen Mittagskogel 2000korako igoerarekin eta bestetik urte hasieran jakinarazitako erabakiaren ondoren beste zerbait egiteko gogoa sartu zitzaidan eta mendira gehiago joaten hasi nintzen. Lehen asko jota Kalamuara edo Arratera joaten nintzen batzuetan, ez askotan egia esan.

Ordutik aurrera gehiago ibiltzen hasi nintzen: Salbadorrera, Txontatik Ipuruara, Sosolara edo Asua Errekan gora. 2017an Eibarko Klub Deportiboko Mendi Taldearen irteera batzuetara joaten ere hasi nintzen.

Lanean Asierrek komentatu zuen 100 mendien lehiaketa egiten hasi zela eta aste honetan komentatu digu bere hirugarren urtearekin hasi dera Luzuero igoz.

Hori ikusita, nire 2017ko mendien zerrenda ateratzea erabaki dut. 20 baino gehiago igo ditut, batzuk errepikatuta gainera, baina beno 20 bakarrik kontatuko ditut (zerrenda guztia mendiak.eus webgunean ikusi daiteke):

Asier, 2017an txartelak pare bat lekutan bakarrik utzi ditut, argazkiek balio didate froga gisa, ezta? 2018an zehar txartelak utziko ditut.

Arastortz: mendi-gailurra eta bertako buzoia 1978-2018

Mikel Larreategi 2018/02/26 08:00
Arastortzeko gaina Ataunen dagoen mendi bat da, Aralar mendizerrako eta Intzartzuko Haitzen parte da. Orain dela 40 urte aitak eta amak buzoia jarri zuten bertan.

Buzoia

Berrogei urte pasatu dira aitak eta amak Arastortzeko gainean buzoia jarri zutenetik. Etxeko argazki-album zahar horietako baten betidanik ikusi izan nituen argazkiak, baina inoiz bertan izan gabe nintzen.

12

Iazko aste santuan anaia eta biok igo ginen bertara, gutxienez buzoia ezagutu nahi izan genuen. Bi mendi-txartel utzi genituen bertan: bata buzoiaren behealdean. Buzoiak piramide itxura du eta beheko aldean hutsune bat dago, hutsune horretan ikurriña eta Gernikako Arbolaren irudi bat daude. Txartel bat hortxe utzi genuen, Gernikako Arbolaren gainean eta Lazkaoko lagun batek klubera itzuli zuen aste pare baten buruan gurasoak zorionduz. Txartela amak gorde zuen.

Bigarren txartela buzoi barruan zegoen larunbatean hara joan nintzenean. Behealde horretan goitik jeisten den tiradera bat du buzoiak eta han barruan gordeleku bat. Bada guk 2017ko apirilean utzitako bigarren txartela hantxe zegoen:

 Apirilean buzoian utzitako bi txarteletako bat hantxe aurkitu dut

Hemen 2017ko apirilean tontorrean buzoiaren ondoan anaia eta biok ateratako argazkia:

Anaia eta biok Arastortzeko gainean

Aurten buzoiaren 40. urteurrena ospatzen dela-eta bertara joan nintzen otsailaren 24an, larunbata. Urteurreneko eguna astelehena izanda, ezin joan bertara eta eguraldiaren aurreikuspenak onak zirela-eta larunbatean bertaratzea erabaki nuen. Eguraldi bikainarekin, giro ezinhobea zegoen tontorrean. Larrunarri / Txindoki eta Aralar zuri-zuri zeuden. Aratz eta Aizkorriko mendizerra osoa ere zuri ikusten ziren, elurrez estalita.

Ditugun argazkien arabera, orain dela 40 urte ere elurra zegoen Txindoki eta Aralarren, agian aurten gehiago.

1978ko eta 2018ko argazkiekin, muntaia bezalako bat egin dut, gutxi gora behera leku beretik ateratako bi argazkiekin, ikusi:

Argazki batetik bestera 40 urteko aldea dago

Hemen, beraz, nere omenaldi txikia orain dela 40 urte Arastortzeko gainean buzoia jarri zutenei, amari, aitxari eta Eibako Klub Deportiboko hainbat laguni. Zorionak!

Informazio eta argazki gehiago:

Bigarren bertsoaren perfekzioa

Mikel Larreategi 2018/01/16 20:45
Aurten Bertsolari Txapelketa Nagusia jokatu da. Bertan ikusitakoei buruzko komentario batzuk hemen.

2017ko udazkenean zehar Euskal Herriko 17. Bertsolari Txapelketa Nagusia jokatu da Euskal Herri guztian zehar. Inoiz idatzi izan dut hemen nire bertso-zaletasunaz.

Aurten gainera, lana dela eta, Txapelketari lotuago egon naiz, www.bertsozale.eus eta www.bertsoa.eus atarietan lanean izan gara eta. Agian hori dela-eta zuzenago jarraitu ditut txapelketako saioak, dela telebistaz edo www.bertsoa.eusen bidez egin dituzten zuzeneko jarraipenei esker. Gainera Barakaldoko BECen jokatu zen final nagusian egoteko aukera ere izan nuen, azken orduan anaiak lagatako sarrerei esker. Lehenengo aldia izan zen bertan eta esperientzia polita izan zen. Norbaiti txapelketa ondorenean irakurri nion bezala, zaila egiten da bertsolariek inprobisatu egiten dutela sinistea. Benetan lan ikaragarria egiten dute hitzak, errimak eta doinuak lotuz ikus-entzuleen gozamenerako.

Aurtengo txapelketan zehar bertso eder asko entzun dira. Asko asko gustatu zaizkit eta beste batzuk gutxiago. Baina artikuluaren izenburura etorriz bigarren bertso batzuen perfekzioa nabarmendu nahi dut.

Txapelketetako ariketa bat izan ohi da bertsolari guztiak banan bana aurrekoaren lana entzun gabe gai baten aurrean kantatzen jartzea, kartzelako lan gisa ezagutzen den hori. Hiru bertso kantatu behar izan dituzte horrelako egoeran oraingo txapelketan.

Egoera horretan Maialen Lujanbiok txapeldunak kantatu dituen hiru bertso ekarri nahi ditut hona, beren perfekzio edo perfektutasuna nabarmentzeko. Asko gustatu zaizkit hirurak eta idatzita jasotzea merezi dute. Idatziz ere zaila ematen du horrelako bertsoak idazteak, ba pentsatu inprobisatuz egindakoak direla eta 13.000 lagunen aurrean. Hotzikara emateko modukoa!

Lehenengoa Irunen bota zuen, finalaurrekoetako lehenengo itzulian "Dena ondo zihoan argia piztu den arte" gaiari erantzunez:

Estali arte izan dugunak
nahiko irri nahiko broma
ahorik aho pasa dugunak
gin-tonic barruko horma.
Bular parea zut neukan eta
zuk eman didazu forma
galtza estuak nebilzkin arren
ez takoi eta ez gona.
Hau ta hura naiz, hartzen ari naiz
zenbait botika, hormona
gizona eta andrea nauzu
ez andrea, ez gizona
Nere inon ez egon nahia ote
da zure ezinegona.

Doinua: beste bateko inularretan
Bertsoaldi osoa ikusi

Donibane Lohitzunen jokatu zen finalaurrekoen bigarren itzulian hauxe bota zuen "gezurra esan duzu, baina merezi izan du" gaiari erantzunez:

Ume umetik aditu nuen
nik Europa bat bazala
desertuaz gain ba omen zela
itsaso uhinen kresala
agurtu nuen familia ta
gurtu egin nuen Ala
ia Afrika dena pasatu
aroak joan ahala
polizi andreak eskatu zidan
adina esan nezala
ez sinestuta miatzen dizkit
haginak eta azala
arretaz baina zaintzen gaituzte
animaliak bezala

Doinua: lurraren pean sar nindaiteke
Bertsoaldi osoa ikusi

Behin Barakaldoko finalean, goizeko kartzelakoan "atetik sartu zarenean isildu egin dira denak" gaia jarrita, hauxe kantatu zuen:

Jada ez dira ez larogeiak
baina neri errepara
azala zimel kolore zuri
ai inork ez nau anpara!
Badakizue ze hauts horizta
sartu ohi den zainetara
haren bila-ta harekin beti
berdintsu zein eratara
Hainbeste oker egin dut hemen
hau jakina ez al da ba?
Burua makur ta lotsaz gorri
jo dut etxeko aldaba
Amari hainbeste gauza lapurtu
nizkion lehen eta hara:
Zure pitxirik ez dakart baina
hemen da zure alaba.

Doinua: kintak jarrita ondorenian
Bertsoaldi osoa ikusi

Eta Aitor Mendiluzerekin egin zuen buruz-burukoan, "bada ordu erdi auto bera atzetik duzula" gaiarekin hauxe:

Miribillako rotondan
errekarriz errekarri
bezelaxe egin ditut
mila buelta errukarri.
Geratzen dira kotxeak
ta gu begira elkarri
beraiek "etorri" esan
ta guk "dirua ekarri"
Nahi bezelako bezero
atseginik ez da sarri
ta askotan gisan orain
autoan estu ta larri.
Ertzain auto bat atzetik
eta sirenak aldarri.
Baietz bera libre utzi
ta neri isuna jarri.

Doinua: norbere mundu intimo
Bertsoaldi osoa ikusi

Irakurtze hutsarekin egoera irudikatzea lortzen dut. Ikusi egiten dut mugako polizia haur bat miatzen. Ikusi egiten dut ertzain autoa segika duen kotxea. Igarri egiten da mahai horretako isiltasuna...

Uste dut ez duela merezi komentario gehiago egiteak, ezta? Bideoetan ikusten den publikoaren eta beste bertsolari batzuen aurpegiei begiratzea besterik ez dago. Adibidez Irungo bertsoaren ostean emakume bat agertzen da txaloka eta buruarekin ezetz egiten. Sinistu ezin izango balu bezala. Eta buruz-burukoan botatakoan ostean Aitor Sarriegiren aurpegiak ere horixe dio.

Aurtengo txapelketako ale ederrenak eta finaleko bertsoaldi guztiak Bertsoa.eus atarian dituzue. Zorionak Bertsozale Elkarteari egin duen lan guztiagatik.

2017ko eta 2018ko Xakearen Legeak euskaraz

Mikel Larreategi 2017/11/11 08:40
Aurrekoan egin nuen bezala, 2017ko uztailaren 1ean indarrean sartu diren Xakearen Legeak euskaraz argitaratu ditut. Eta baita 2018ko urtarrilaren 1ean sartuko direnena ere.
Hemen duzue itzulpena, jatorrizko ingelesezko testuarekin parekatuta, OpenOffice eta PDF formatuentan. Bertsio honek 2017ko uztailaren 1etik 2017ko abenduaren 31ra arteko indarraldia du:
2014ko Legeen bertsioa ere kontsultatu dezakezue hemen:

 

Itzulpenaren inguruko komentarioak, hobekuntza-proposamenak edo akats-zuzenketak egiteko erabili erantzunen formularioa edo idatzi mezu bat larreategi a-bildua eibar.org helbidera.

EITB Nahieran ikusi Kodin

Mikel Larreategi 2016/11/28 09:45
Kodi Media Center bat edukitzeko software bat da. Zure 'media' eduki guztia (bideoak, irudiak, audioa, ...) toki batetik atzitzeko programa bat da, zure ordenagailuan instalatu daiteke eta HDMI kable batekin telebistara lotu. Gainera Interneteko hainbat zerbitzu (Youtube esaterako) erabiltzeko aukera ematen du telebistatik irten gabe. Kodin EITB Nahieran zerbitzuko bideoak eta audioak nola erabili azalduko dut hemen.

Plugina Kodin erabiltzeko prest
Plugina Kodin erabiltzeko prest

Orain dela hilabete batzuk azaldu nuen hemen nola ikusi ditzakegun EITB Nahieraneko bideoak tvalacarta pluginaren bidez Kodin. 

Han egindako lanetik abiatuta EITB Nahieranen APIa egin nuen eta EuroPython 2016n Bilboneta UEUk antolatutako Software eta Teknologia Librearen III. Euskal Mintegian Donostian aurkeztu nuen.

Azken honetan, Igor Leturiak galdetu zidan eta APIa erabiltzen zuen Kodirako pluginik bazegoen, eta ezetz esan nion baina APIak erabiltzen zituen tresna guztiak (HTMLa parseatzea, URLak sortzeko javascript kodea, eta abar) tvalacarta pluginean integratuta zeudela.

Hala ere interesgarria iruditu zitzaidan ideia eta asteburuan prestatu egin dut plugina. Pluginaren kodea GitHuben dago eta instalazio-argibideak ere hantxe jarri ditut: zip-a deskargatu, Kodira kargatu eta kitto. Kodi arduratuko da dependentziak instalatzeaz.

Momentuz oinarri-oinarrizko gauzak egiten ditu: telebista eta irrati-programa guztien zerrenda erakutsi eta ikusteko aukera eman. Momentu batzuetan geldo dabilela igartzen baduzu, APIa doako zerbitzari baten ostatatuta dagoelako da.

Plugina probatu edo hobekuntzaren bat proposatu nahi baduzu, eskertuko dizut! Idatzi hemen komentario bat edo ireki ticket bat GitHuben.

Eibar inguruan oinez: Untzaga - Urki - Lekamendi - Txonta - Arane - Errekatxu - Portalea

Mikel Larreategi 2016/10/17 10:00
Urki eta Txonta arteko bidean zehar, Eibarren beste ikuspegi bat eta askok ezagutzen ez duten inguruan zehar ibiltzeko aukera izango dugu.

Untzagan hasiko dugu ibilaldi hau, jubilatu-etxearen ondoan. Bi aukera ditugu hemen: eskilara mekanikoak erabiltzea, ala oinez Txaltxa Zelaiko parkean zehar igotzea. Goazen tokitik goazela, Armagin kalearen hasieran dauden eskilara mekanikoetara iritsiko gara. Eskilara horiek ala arruntak igota Urki kalera iritsiko gara, Cepa taberna ondora. Han hilerriraino joango gara eta espaloiari jarraituz Jose Antonio Iturrioz kalean zehar Arrateko Amaren ikastetxeraino helduko gara.

Aldapari jarraitu eta Urki kurutzekuako etxeak eskuman utzita, autopista gaineko zubia gurutzatuko dugu. Hementxe hasten da Txontarainoko bide ederra. Lekamendi baserria pasatuta, beste pare bat txabola ere ikusiko ditugu eta baita Eibarren beste ikuspegi bat ere. Tekniker alde baten, Legarreko dorrea bestean, eta Jardineta-Urkizu-Azitain inguru guztia ikusteko aukera.

Pixka bat aurrerago, jada ia Txontan gaudela, pagadi txiki bat ikusiko dugu bide bazterrean.

Pagaditxo bat Urki eta Txonta artean
Pagaditxo bat Urki eta Txonta artean

Pagaditxo bat Urki eta Txonta artean
Pagaditxo bat Urki eta Txonta artean

Pistatik jarraituta, Txontatik Salbadorrera doan bidearekin bat egingo dugu. Bertan ezkerrera egin eta Txonta kaleraino jeitsiko gara. Han, ezkerrera egin eta Galizia pasealekuan zehar Arane kaleraino iritsiko gara. Han, zuzen jarraituko dugu Arane eta Errekatxu arteko errepidetik. Errekatxura iristean, eskumara egin eta Portalea kultura etxera iritsiko gara.

Eibar inguruan oinez: Jardineta - Sakun - Miraflores - Arrajola - Sosola - Amaña

Mikel Larreategi 2016/10/14 17:00
Iparraldean orain ere, Arrajola eta Sosola baserrien arteko bide zoragarrian zehar.

Ignazio Zuloaga institutuan hasiko dugu ibilbidea, eskilara mekanikoen ondoan. Eskilarak igo eta Sakunetik zehar bidean gora eginda Arratera doan errepidera helduko gara.

Errepidea gurutzatu eta Miraflores kalean gora egingo dugu etxeetara iritsi arte. Bi etxeen artetik pasatzerakoan aurrera doan bidea hartuko dugu beherantz doana ezkerrean utzita. Pistari jarraituz Arrajola baserrira iritsiko gara.

Arrajola eta Sosola arteko harrizko bidea

Arrajola eta Sosola arteko bidea

Hesia gurutzatu eta handik gutxira beste hesi bat ikusiko dugu. Bidea utzi eta bigarren hesi hau gurutzatu egingo dugu, bidezidor hestu baten zuhaitzen artean errekasto batera iritsi arte. Bidezidorra jarraituko dugu basoan zehar, harrizko bide eder baten zehar. Euria egiten duen egunetan erreka urez beteta egoten da.

Eibar iluntzean, Arrajola eta Aritxuleta arteko bidetik

Iluntzea Eibarren Arrajola eta Aritxuleta arteko bidetik

Bidean zehar beste hesi batera helduko gara, Sosola baserritik gertu. Han baserrira doala dioen kartelari jarraitu eta eraikin baten ondotik pistara helduko gara Sosola baserria ondoan dugula. Pistan zehar Amaña auzora jaitsiko gara.

Eibar inguruan oinez: Azitain - Altzubarren - Agarre - Naiorbe - Asua Erreka - Barakaldo

Mikel Larreategi 2016/10/12 17:00
Gaur iparraldean ibiliko gara, Azitaindik gora jarraituz.

Azitaingo gasolindegi ondoan hasiko gara, Barrena kalean zehar, Lidl supermerkatua dagoen etxeetatik aurrerantz sahiesbidera iritsi arte. Han, sahiesbide gainetik La Salle ikastetxera doan bidea hartuko dugu.

Behin ikastetxea pasatuta, ezkerreko pistatik jarraituko dugu industrialdera joan beharrean. Pistatik zehar Altzubarren baserrira eta haren ondoko frontoira iritsiko gara. Frontoia pasatuta, garbigunea ere pasatu egingo dugu eta berehala bidegurutze bat aurkituko dugu: eskumara beherantz doan bidea hartuta industrialdearen goiko aldera eta Arrateko bidera iritsiko gara. Ezkerreko bidea hartuko dugu, gorantz doan pista.

Pistari jarraituz, bidegurutze bat ere hartu gabe, Agarre gainekoa eta Agarre azpikoa baserrien sarrerara iritsiko gara. Bertatik Eibar luze-luze ikusi dezakegu Ego ibaiaren ibarrean.

Agarre eta Azaldegi baserri ingurua Iparragirretik
Agarre eta Azaldegi baserri inguruak Iparragirretik

Pistatik jarraituko dugu Azaldegi gainekoa eta Azaldegi azpikoa baserrietan zehar, Naiorberaino iritsi arte. Hemen, baserria pasatu eta berehala beherantz doan bidea hartu behar dugu. Gipuzkoako Itzuliaren GRaren marka gorri-zuriak ikusiko ditugu eta eurei jarraitu behar zaie. Bidea beste baserri batera helduko da, eta baserriaren bi eraikinen artetik doa beherantz. Txakur nahiko zaratatsuak aurkituko ditugu bertan, baina normalean lotuta egon ohi dira beraz, lasai pasatu ahal baduzue.

Mendi bidean zehar, inguru eder batetik Asua baserrira helduko gara. Hemen bi aukera ditugu: ezkerrera egin eta pistatik zehar Txarakua deritzon ingurunetik sahiesbideraino iritsiko gara. Baserria ezkerrean lagata beherantz doan mendi bidea hartuta (berriz ere GRaren marka gorri-zuriak dituena), Asua Erreka kalera iritsiko gara sahiesbidearen azpitik pasatuta, eta bertatik Barakaldo kalera.

Inguru hau oso ederra da, batez ere Naiorbetik Asua Erreka kalerako bide guztia. Basoa da, eta inguru benetan ederra herrigunetik bertan. Agarretik Naiorbera doan bidetik ikusten den Eibarren ikuspegia ere ederra da benetan.

Aurkezpena

Mikel Larreategi

Mikel Larreategi Arana

(Eibar, 1981). Informatikaria ikasketa eta ofizioz, CodeSyntaxen egiten dut lan Eibar.ORG bezalako webguneak egiten. Ikastolan nengoela xakean jokatzen hasi nintzen eta horretan jarraitzen dut.

Flicker-en
www.flickr.com
Elementos de erral Ir a la galería de erral
Twitterren