Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Nafarroa is different

Nafarroa is different

Amatiño 2015/07/22 00:05
Zergatik, Euskal Autonomia Erkidego abertzalean, lehendakari ez abertzalea normaltzat hartu beharreko aniztasunaren adierazgarri da eta, Nafarroa ez abertzalean, ostera, lehendakari abertzalea kontu handiz hartu beharrekoa? Euskara, politizatu behar ez den guztion ondarea baldin bada Gasteizko legebiltzarrean, zergatik abertzaleena baino ez da Iruñekoan?

Ohiko gutxi dago aspaldiotan Nafarroan eta, zenbat buru hainbat aburu, bi dira, besteak beste, niri jaramonarazi dizkidaten zertzeladak.

Batetik, galtzaileen nahiz irabazleen artean zein sarri azpimarratu den gobernu-buruaren abertzaletasuna, abertzaleak nagusi ez diren Nafarroan. Etsairik amorratuenak ez ezik, Uxue Barkosek berak ere sentitu du nolabaiteko kontraesan hori aitortu beharra, Don Bildur uxatze aldera edo.

Ez deritzat txarto, baina bai ordea esango, begirunez esan ere, nik ez dudala gogoratzen Patxi Lopezek, Ajuria Eneko lehendakaritzaz jabetu zenean, pareko kontraesan arriskutsurik azpimarratu zuenik, alegia: buruzagi ez abertzalea gizarte abertzalearen lehendakari.

Beste bat, dezente harritu nauena, zera izan da: euren burua objektibo samartzat duten hainbat politika-analistarengan, nafar gobernu berriaren euskara-egitasmoak sortarazi duen mesfidantza. Llabur-labur esanda, hainbatek sumatu du euskara sustatzearen aldeko jarrerak kinka larrian jartzen duela Uxue Barkosek agindutako zentzuzko oreka.

Ez dakit nik zein litzatekeen politika-analista profesional horien ustez hizkuntza-programa “zentzuzkoa eta orekatua”, baina kazetari horiei irakurri edo entzunez gero, espainiar hiritar arruntak pentsatu lezake euskara Euskal Autonomia Erkidegotik abertzaleok inportatutako produktua baino ez dela, edo, behar bada, Podemos-en hautesleak UPNrenak baino euskaldunagoak direla.

Ea ulertzen dudan. Euskal Autonomia Erkidego abertzalean, lehendakari ez abertzalea normaltzat hartu beharreko aniztasunaren adierazgarri da eta, Nafarroa ez abertzalean, aldiz, lehendakari abertzalea errezeloz hartu beharrekoa? Euskara politizatu behar ez den guztion ondarea bada Gasteizen, zergatik abertzaleena baino ez da Iruñean?

jaime
jaime dio:
2015/07/23 17:10
Orain dela hogeita hamarren bat urte edo, euskararen egoera gaia zelarik, EAEko aldizkari batek baieztatu zuen Baztango euskaldun gehiengo handiak – nafarreraz mintzatzen zenak hain zuzen ere – UPN alderdi espainolista jaio berriari ematen omen zion bere botoa. Artikulu berean euskaldun zahar haiek batuaren aurka jartzen ziren laborategiko hizkuntza zela argudiatuz. Jakina, iritzi honek, UPNko erdal bezeriaren onespen eta txaloak merezi zituen. Bazekiten alderdiko buruzagiek zeinen arriskutsu gerta litekeen euskararen batasuna.
Beste horrenbeste ikusten genuen Iparraldean, Xiberuko herrialdean hain zuzen ere; hango üskaldünek, beren botoak frantses alderdiei ematen zizkietenek, mespretxuz hitz egiten zuten batuari buruz euskaldun berriak arbuiatuz.
Lerro hauek idazten dituenak ere, bereak eta bost entzun – eta irakurri – behar izan zituen 1980. hamarkadan EAJren “Euzkadi” aldizkarian batuaren aldeko jarrera plazaratzeagatik. Hura iskanbila! Batua ETAren mintzoa zela, euskalkien desagerpena nahi zela, alderdikide jatorrak bizkaieraz berba egin behar zuela… Gainera ergelkeri guzti hauek Inperioko hizkuntza ederraz dotore idatziak!
Ez dago dudarik, Herri batu bat nahiez gero beharrezkoa da mintzo batua, baina, zenbat gara Euskal Herri batua nahi dugunok?
P.S.
Lehenengo batean, “independente” hitza “Euskal Herri batua”ri eransteko dudatan izan naiz, baina, Bilderberg kluba, FMI, Trilaterala, BCE, Carnegie group, Rockfeller, Rothschild eta Henry Kissinger hilezkorraren akorduan, “independentzia” hitza traste zaharren ganbaran utzi dut mendeetako hautsak estali dezan.
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna: