Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Liburuak ere badu historiarik

Liburuak ere badu historiarik

Amatiño 2020/10/18 09:00
Irene Vallejok gaia ezagutzen du, gogotik maite eta pilpiraz idazten, erraz, argi, garden eta… gazte. Ondorioak, nahitaez, ona baino ezin du izan. “El infinito en un junco”, fikzio-tankerako edo narrazio-moldeko saiakera, hainbat nobela baino entretenigarriagoa da eta edozenbat historia baino adierazgarriagoa.

Gizakiaren bilakaera konplexuaren arrakasta ulertarazteko orduan,  mintzaira, kultura eta maitasunaren hirusta aipatu ohi da oinarrizkotzat. Eta, segurutik, hiruek balio dute “homo sapiens” gizabanakoaren azken 200.000 urteotako biziraupena adierazteko. Baina, Irene Vallejo azpimarratzen saiatzen denez, egun ezagutzen dugun giza-zibilizazioa nekez gerta zitekeen inoiz, liburu-tramankulua sekula asmatu izan ez balitz. El infinito en un junco (Siruela, 2019) tramankulu horren loriazko historia  da eta, pasaian,  liburuaren oda eta ereserki.

Ikaragarria, gero, zein datu-pila eta bibliografía aberatsa. Batetik, Niloko papiro-xafletatik (zabal asko) Gutenbergen galaxiarainoko (llabur oso) hiru mila urteko abentura. Baina, beste hiru mila aurretik, alfabetoaren asmakizun geldoa. Hondarrik gabeko itsaso sakon eta ilun horretan murgiltzea, arrantzan egitea eta, kontsumitzaile arruntaren gustura, otzaratan laburbiltzea, ez da gero gau erdiko ahuntzaren eztula, nahiz dena eurozentriko samar gertatu. 

Liburuaren mapa edo ibaia,  zuhaitz baten adarrak bezain jori zabaltzen eta barreiatzen da orrialdeetan zehar, eta horren informazio-uholdeari aje-izpiren bat leporatzekotan, badirudi, testuari berari darion zenbait autu-mautu tarteko, egileak ekineran uste baino informazio gehiago bildu ahal izan duela eta, ezin jakin, ez ote duen denboraz mozteko besteko adorerik izan, ala ez duen, beti, non sartzen edo ezartzen egoki asmatu.

Edozein modutan, berriketabako liburua, saiakera-generoa ezohiko irakurleen artean barreiatzeko balio izan eta izango duena.

Oharra: Bada sareetan bideoa, non Irene Vallejok berak saiakerari dagokiokeen hainbat burutapen labur egiten duen, argitalpenaren sustatze aldera. Ez dut liburuan, zehatz, parekorik aurkitu. Hobe horrela.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Amatiño

Luis Aranberri Mendizabal