Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Dirua ez da dena, baina...

Dirua ez da dena, baina...

Amatiño 2013/11/07 23:40
Valentziako telebistarenak egin du, hogeitalau urte antenan iraun ondoren. Arrazoirik nagusiena dirurik eza omen da. Generalitateak ez bide du egitasmoari eusteko beste diru. Segurutik dena ez da horren erraza, horren sinplea, horren bakuna; izango da, bai, arrazoi konplexuagorik baina, zer nahi delarik, egia ere bada hedabide garestirik baldin bada egungo gizartean, telebista dela txapeldunena.

ETB plazaratu baino hiru hilabete lehenago dozena erdiren bat lagun alemaniar Oihan Beltzeko bainuetxe batean bildu ginen telebista-kudeaketaren nondik norakoaz jabetzen hasteko. Hamabost eguneko ikastaro trinkoaren azken egunean, psikologiantza landu zuen irakasleak agindu zigun txosten laburra idaz genezan, Ramon Labaien Kultura sailburuari ikastaroaren berri eman ahal izateko. Baita guk, arrapaladan, hiruzpalau orrialdeko idatzia prestatu ere.

Haatik, txostena arretaz-edo irakurri ostean, orrialde bakarreko laburpena egingo ote genuen galdetu zigun psikologoak.. Eta guk, jakina, otsein asko, egin egin genuen.

Orrialdea irakurri eta… “politikariak irakurle eskasak” omen direnaren aitzakiaz, paragrafo bakarrean laburbiltzeko gauza ote ginen erronka jo zigun. Hamabost eguneko ikastaro trinkoa paragrafo battoan? Zergatik ez? Eta paragrafo soila moldatu genuen.

Harako paragrafoa begiztatu ahala bota zigun, ordea, behar bada Labaien "ministroak" bizpahiru lerrotan aurkeztu beharko zukeela telebista-egitasmoa Gobernu-bileran eta, segurutik, biziki eskertuko ligukeela nolabaiteko laguntza... Eta bizpahiru lerrotara ekarri behar izan genuen ekarri beharrekoa.

Hala ere, eta... Labaienek Eusko Legebiltzarrean esaldi bakarra adierazteko baino aukerarik izango ez balu…? Eta zorioneko mezu mamitsua itxuratu genuen, hamabost eguneko ikastaroaren laburpen gisa.

Eta Labaienek azken unean eta belarrira esan behar izango balio Garaikoetxea lehendakariari, hitz bakar batez, zer den telebistan funtsezkoena? Eta artikuluak, aditzak, izenlagunak eta izenondoak kendu ostean, izen miresgarria besterik ez zitzaigun geratu, hamabost eguneko ikastaroaren muina laburtu beharraren beharrez: DIRUA.

 

MOELLER

Herr Heinrich Möller, "Management for Television" (1982) ikastaroaren arduradun nagusia

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna:
Aurkezpena

Amatiño

Luis Aranberri Mendizabal