Etorkinak kanpora
Urtarrilaren 26an Frantziako estatuak migranteak muga pasatzen laguntzeagatik epaitu behar dituen hainbat kideri babesa emateko manifestazioa egin zen Irundik Hendaiara. Han egon nintzen.
Fuera inmigrantes, este apunte en castellano
Hurrengo egunean sustoa eman zigun amak, baina zorionez bideratu da. Otsailean hala moduz ibili ginen, baina martxo hasieran gurean ia bederatzi urte daramatzan Nikaraguako andre gazte bat kontratatu genuen amaren zaintzaile gisa. Ez da lehena izan.
Siriako mediku bat entzun nuen irratian Alemanian hauteskundeak egin ziren egunean. Oker ez banago, Berlinen bizi zen, baita bertan lan egin ere.
Javier del Pinoren asteburuko irratsaioan kontatu zuen, gaztelaniaz, zein gaizki pasa zuen Alemaniako Ekialdean bi ospitaletako lankideekin. Minduta hitz egin zuen, noski.
Egoera salatu zuenean geratu omen zuten jazarpena.
Igande hartan izan zuen lehen aldiz botoa emateko aukera. Kazetariaren galderari erantzunez, sozialdemokraten alde egiteko asmoa zuela esan zuen antenan, nahiz eta erabakia erabat hartu gabe izan oraindik.
Bera bezala 10.000 siriar omen daude Alemanian osasun alorrean lanean, oker ez banago gehienak mediku dira. Erdiak baino gehiagok jada lortua omen dute herritartasuna. 10.000 lagun horiek kanporatuz gero, nola geratuko litzateke osasun sistema herrialdean?
Plataforma sozial batean ikusi dut egoera hori gordinki erakusteko Alemaniako hainbat osasun gunetan egiten ari diren kanpaina. Hots, "bertakoak" soilik geratuz gero zenbat langile egongo liratekeen. Edo hobeto esanda "kanpotarrak" kaleratuz gero zein izango litzatekeen egoera.
Pertsonak munduan libre mugitzeko askatasunaren alde ez bazaude, ea modu berekoia aktibatzeko gai zaren. Nahiz eta jakin, Brexit-a eta Trump dira adibide, badagoela jende asko ez duela buruarekin ematen botoa, tripekin baizik, beren interesen aurka.
