Infoxikatuta

Igandean aipatu nuen bezala, astelehenean hasi nintzen lantoki berrian. Ondorioak ateratzeko unea ez da hau (badakizue, lehenengo egunetan ez zara ezertaz enteratzen eta egoera horretan nago ni une honetan). Gainera, etxeko ordenagailua gaur arratsaldera arte ez dut jasotzerik izan. Gauza batzuekin borrokan aritu ondoren, kezkagarriena izan da konprobatzea ehundaka lotura nituela irakurri gabeak bloglines-en eta gehienak antzarak perratzera bidali ditut.

Berrehundik gora jario izatera iritsi naiz eta garbiketa egiteko garaia da. Pixkanaka pixkanaka abiatu naiz eta jada lortu du ehun eta laurogeira jaistea jario kopurua, baina oraindik gehiago murriztu beharra dago.

Azken hiruzpalau asteetan, gainera, aste egunetan oso gutxitan erosten dut prentsa. Nazkatuta nagoelako berri, albiste eta abarrekin. Badakit ni jakinaren gainean egon gabe ere, munduak bere martxa penagarria jarraituko duela, baina haize freskoa behar dut bolada batez.

Ikusiko dut zenbat denbora pasatzen dudan desinfoxikatzen.