Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Harrikadak / Bilboko Kafe Antzokia itxi du Udalak hilabete baterako

Bilboko Kafe Antzokia itxi du Udalak hilabete baterako

Mikel Iturria 2009/01/09 17:33
M-Clan taldearen kontzertu egunean aforoa bikoiztu egin omen zuen Bilboko aretoak. Ados. Hankasartzea da. Baina noiz hasi behar dute Udalek horrelako aretoak mimatzen?

Bazkalostean ari nintzen Radio Euskadi entzuten, Roberto Mosoren musika saioa, hain zuzen ere. Eta hor entzun dut, pasadan, hilabetez egongo dela itxita Bilboko Kafe Antzokia erabaki administratiboa zela medio. Ez nuen ezer ulertzen, baina burura etorri zaidan lehen gauza izan da: hauek ere krisiaren eragina pairatzen ari ote dira?

Gero, ordenagailuaren aurrean jarri naiz, eta jakin dut zabalduren bidez zer gertatu den. Horrela kontatu du eitb.com-ek:

“Bilboko Kafe Antzokia itxita egongo da hurrengo hilabetean, 2008ko martxoaren 2an jarritako helegite baten harira, baimendutako edukia gainditzeagatik. Izan ere, M-Clanek jo zuen gau hartan eta baimenduta dagoen jendearen bikoitza zegoen momentu horretan Kafe Antzokian. Itxieraz gain, zigor ekonomiko bati aurre egin beharko dio lokalak”.

Dirudienez, ez da itxitako areto bakarra. Lau omen daude (edo egon daitezke) egoera berean. Berehala etorri zait gogora duela aste batzuk Diego A. Manrique kazetariak Madrilgo Udalak zuzeneko musika programatzen duten aretoei buruz idatzitako zutabe bikain hura, La ciudad bajo asedio. Hona parrafo bat:

"Askok uste dugu rocka, jazza eta antzeko musikek tamaina txikiko edo ertaineko aretoak behar dituztela, lasaitasun giroan talde edo solistekin gozatzeko tokiak, kopa eskuan dugularik, inolako eserlekuari lotu barik. Ekimen pribatuko lokalak, udalaren ulermena merezi dutenak, baita gehiago ere (salbuespen fiskalak?). Edozein hiriko kultur ehunaren zati dira eta zaindu beharko lirateke, ez jazarri. Eta jazarpena egon badago: adibidez, Madrilgo udaltzainen astakeria, djen poltsak arakatzen disko piraten bila!"

Artikulu horrek hurrengo astean izan zuen segida ederra, Las canciones del Gran Bilbao artikuluak Álvaro Heras Gröhl kazetariak Bilboko rock historia biltzen duen liburua baitzuen hizpide.

Bukatzeko, Athletic taldearen Estadioa itxiko lukete maila bereko lege haustura egingo balu? Erantzuna denok dakigu.

patxi lurra
patxi lurra dio:
2009/01/10 18:49

Tenplua profanatzen ausartu diran horien izena da. Zenbat gara? 4, 1, 3, 5 , 7?

Iban Zaldua
Iban Zaldua dio:
2009/01/10 04:21

Ai, ene, eta ni The Smithereens taldea bertan ikusteko desiatzen nengoela... Kaka zaharra...

ROBERTO
ROBERTO dio:
2009/01/10 02:44

Nahiago dut gaizki ez pensatzea: mugak jarri behar dira eta segurtasun arauak beharrezkoak dira (Hemengo zenbait areto txikitan ikusten diren jendetzak ez dira ikusten Europako egoitzetan). Baina hilabete bateko itxiera guztiz gehiegizkoa dirudi.Ez litzateke nahiko izango isuna bat? Ezinezkoa al da salgai dauden sarreren kopurua kontrolatzea?. Martxoan gertatu bazen hori zergaitik horrenbeste denbora halako neurri bat hartzeko? Egia da: honelako lekuak babestuta egon behar dira eta sartezen garenok ere bai.

bertol
bertol dio:
2009/01/10 18:37

Azken aldian Kafe Antzokian sartutako jendea asko kontrolatzen zutela iruditzen zitzaidan, inoiz ikusi ez ditudan neurriak hartuz; argi dago orain zergatik. Egia esateko, zenbait kontzertu interesgarri galduko ditugu itxita egongo den hilabete honetan, baina nork daki irakurri dudanez Udaletxeak nahi izanez gero urte betez itxi zezakeen Antzokia eta hilabete bakarrean geratu da (eskerrak). Animoak Kafe Antzokia aurrera ateratzen duten guztioi, eta lasai azterketak eta gero guztiak berriro ere han izango gara :)

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Mikel Iturria aka Iturri, irundar bat eibarnauta elastikoarekin agit&prop egiten.

Pedradas, en castellano

Kontrakoa esaten ez den bitartean, blog honen edukia ondorengo Creative Commons lizentzia honen pean dago:

Somerights20

Stat counter