FTI-Antzerkiola Imaginarioa Erakusleihoan
Datorren ostegunean,urriaren 20an, arratsaldeko 19:30etan, Ernest Lluch-Amarako Kultur Etxeko areto nagusian FTI-Antzerkiola Imaginarioa taldearen bisita izango dugu. Sarrera doakoa izango da eta ERAKUSLEIHOA programaren baitan gauzatuko da.
Ez dakit jakingo duzuen (donostiarrek seguruenik bai, baina kanpotarrek ez), kultur etxea Anoeta Estadioaren barrualdean dagoela. Areto nagusia, hain zuzen ere, 7 eta 8 ateen artean, Bakearen Usoaren parean dago kokatua.
Taldeko dramagile eta ikerlaria den Jon Gerediagak idatzitako lehendabiziko poema liburutik sortutako irakurketa drama da Fitola balba, karpuki tui. Bere hitzez gain, irudiak, musikantak eta aktoreen ekintzak baliabide poetikoak bihurtzen dituen lana da hau.
lagunen ausentziaz beteriko ohe hutsa
eta ohearen parean
hamaika gizaseme isil eta ilun
infinitorantz zihoan ilara batean
ohea betetzen zuen ausentzia horri
azken hitzak esateko txandaren zain.
Fitxa teknikoa:
Testua: Jon Gerediaga.
Aktoreak: Miren Gaztañaga, Ander Lipus eta Alex Gerediaga.
Musika: Aitor Agiriano.
Eskenografia: Aritz Merino.
Bideoa: Aritz Merino eta William Miller.
Zuzendaritza: Alex Gerediaga.
Ekoizpena: FTI-Antzerkiola Imaginarioa.
Azaroaren 17an, berriz, Harkaitz Cano, Patxi Santamaria eta Itziar Lamuedra etorriko dira "Ahulkiak" errezital antzeztua eskaintzera. Harkaitzek idatzitako testua du oinarri, idazleak berak eta aipatutako beste bi aktoreek taularatuko dutena.
Abenduaren 15ean Larrujolearen semena ikuskizuna eskainiko dute Josu Martinezek eta bi Txaberrek (Larreategi eta Fernandez). Martinez ezaguna da blogari izateagatik, baina ez dakit esaterik ba ote dagoen nor den bera. Artista ganberroa eta gaztea da. Hori bai.
Beno ba, animatu eta ea jendea agertzen den "Fitola balba, karpuki tui" emanaldian. Hurrengo biei buruzko informazio gehiago, unea iristerakoan.
