Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Zelten eguzki-behatokia: "Es lo que toca"

Zelten eguzki-behatokia: "Es lo que toca"

Amatiño 2017/10/20 00:05
Oranteko San Benito (Jaca) ermitan ez dago taldeka sartzerik, banan-banan baino. Bost minuturo, barruan dagoen erromesa atera egiten da eta atarian zain dagoena, sartu. Horrela, etenik gabe, errenkada luzean, goizeko 9etatik amaitu arte.
 Zelten eguzki-behatokia: "Es lo que toca"

Barrutik, bost minutuz

Egunak joan eta egunak etorri, egunero, goiz eta arratsaldez, astegun buru zurian nahiz jaian, atezaina da Antonio Javierre auzo-alkatea. Aurten, dagoeneko, ia 7.000 bisitari hartu ditu. Zergatik egiten ote duen galdetu eta, berak erantzun: “Es lo que toca”.

Ez dago deirik, ez programarik, ez iragarkirik, ez bertso-paperik. Albistea ahoz aho sakabanatzen edo barreiatzen da han-hemenka, eta gero eta gehiago dira San Benito ermitara hurreratzen direnak bost minutuko sartu-irtena egiteko. Ez dago sarrerarik erosi beharrik, ez txanponik utzi beharrik. Joan, txanda hartu, zain egon eta, halakoren batean, sartu. Kontu izan, sei lagun bertaratuz gero, gutxien-gutxienez ordu erdiko egonaldia izango dela.

Baina… zer egiten du bisitariak ermita barruan bost minutuan, ipurtargitan, bakar-bakarrik? Ba… ezer ez edo nahi duen guztia: egon, pentsatu, hausnartu, asmatu, bururatu, oldoztu, gogoeta egin, otu izan, "motxila" hustu,  barre, negar, damutu, kokildu, aspertu…

Jatorriz, eraikina zaharrenetakoa da, hiru mila urte bai, Brontze Arokoa edo. Zelten eguzki-behatokia izan omen zen. Ia mila metroko garaiera du munoak, nondik ikusten diren Jazetaniako berrogeitaka herrixkak, Sabiñanigotik Leireraino.

Batere ohikoa ez den arren, aldarea mendebaldean du jarria eta sartaldera jotzen duen horman itsu-leihoa dago, nabarmen aldrebes samarra dirudien arren, apropos egina dagoena, martxoko zein iraileko ekinozioak eta udako solztizioa neurtzeko. Urtean behingo su eta guztiko erromeria, martxoaren 20an ospatu izaten da.

Indar teluriko guztiak bertan biltzen omen dira. Magiazko lekua, magiazkorik bada, gezurra dirudien arren abian dirauena. Zergatik? Zertarako? "Es lo que toca".

Iluntzean

San Benito ermita, Oranteko munoan (967 m.), zelten eguzki-behatokia izan zena

Ermita

Ekialdera ematen duen sarrera. Barruan, ilunetan, bakar-bakarrik... nor bere kasa!

Leihoa

Iluntzean, urriko eguzkiaren azken errainu goriak, itsu-leihoan barrena sartu ezinik

Gurutzea

Jacaldeko sakana, Orantetik ikusia. Barrenean, Pirinioak

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Amatiño

Luis Aranberri Mendizabal