Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Zaharra berri

Zaharra berri

Amatiño 2014/01/29 00:15
Aukeran, Pier Paul Berzaitzek proposatu unibertsoari bizpahiru kanta arrunt ezagun falta izan zitzaizkion, igandean, Victoria Eugenia aretoan bildu zen entzulegoaren odola pitin bat berotzeko. Memoria da zaharron altxorrik handienetakoa eta memoriak, memoria izango bada, zaharra berri eskatzen du gehienbat.

Egunsentiaren kantak1

Joxan Goikoetxea, Alain Griffin, Pier Paul Berzaitz, Erramun Martikorena, Josune Marin, Magali Zubillaga, Estitxu Pinatxo, Txema Garces eta Oriol Flores

Ageriko Joxan Goikoetxea eta ezkutuko Jose Angel Arbelaitzen eskutik, “Egunsentiaren kantak” deitu saioa burutu zuen Pier Paul Berzaitz zuberotarrak, hiru kantariren eta bost musikariren laguntzaz. Hots, Erramun Martikorena, Magali Zubillaga eta Estitxu Pinatxo, batetik; eta Joxan Goikoetxea (soinua eta teklatua), Alain Griffin (flauta, txirula eta...), Josune Marin (gitarrak), Txema Garces (baxua) eta Oriol Flores (bateria eta perkusioa), bestetik.

Ahots zoragarriak eta musikari iaioak. Kantaldi politta, goxoa, txukuna eta atsegina; baina ez, behar bada, nabarmen bihozkoia. Ohiko zenbait kanta guztiz ezagun falta izan zitzaizkion, jendearen barne-muinak errotik hunkitu ahal izateko.

Pier Paul Berzaitz omen da, azken berrogei urteotan, abestirik gehien idatzi duen euskal kantaria. Baita, segurutik, euskal kantu-antologia ondoen ezagutzen dutenetakoa ere. Ezin ba maisuak egin hautuari kontuak eskatzen hasi; baina, hala ere…

Behin adin batetik aurrera emakumerik gehienak ilehori samarrak direnez gero, auskalo zein ote bertaratu zirenen batez besteko adina; baina, gizonezkook behintzat,  guztiak ere burusoilak edo ile urdinduak, hirurogei urtetik gorakoak, hamarretik bederatzi.

Nago, adinekook, aukeran, ez ote dituzten (ditugun) maiteen kanta guztiz ezagunak, sarri errepikatzen direnak alegia. Memoria da zaharron altxorrik handienetakoa eta memoriak, memoria izango bada, zaharra berri eskatzen du gehienbat.

Egunsentiaren kantak3

Taldekideak, brankaz

Egunsentiaren kantak4

Popaz

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Amatiño

Luis Aranberri Mendizabal