Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Urte biko haurraren hiztegia

Urte biko haurraren hiztegia

Amatiño 2008/08/17 23:26
Ekonomiak eta erraztasunak dezente baldintzatzen omen dute hizkuntzaren erabilpena. Seguru egia dena. Nere bilobarik zaharrenari entzun besterik ez dago. Oraindik 23 hilabete baino ez ditu eta harrigarri gero zein hitz urriz konpontzen den nahi duena adierazteko eta zein ondo dakien erraztasunaren araberako hitz-aukera egiten.

Erarik errazena asmatu behar hori arlo bitan nabarmentzen da batez ere. Batetik, a- hizkiaren aldeko postura nabarmena eta, bestetik, elebitasunaren bidegurutzean beti ere hitzik errazenaren aukera. Errazago nonbait “Ako” edo “apopo”, “Urko” eta hipototamo” baino; “aua”, “ura” baino eta “no”, “ez” baino.

Hona besteak beste, munduan barrena konpontzeko oraingoz erabiltzen dituen laurogei inguru hitzak:

Aditzak

Hartu. Apurtu. Api (jaiki). Aupa (jaso). Etori (etorri). Kantzi (jantzi). Kendu. Ñan (jan). Sato (salto egin). Txalo (txalotu).

Jan-edanak

Aua (ura). Araiña (arraina). Koko (txokolatea). Ogia. Txitxia (okela). Buur (yogurra). Tita (galleta).

Senideak

Aita/aitato. Ama. Aittitta. Amama.

Lagunak

Abie (Xabier). Ako (Urko). Ate (Ander). Ane. Ana. Bon (Ibon). Burre (Idurre). Iane (tia Ane). On (Jon). Malen. Mami (Mikeldi). Nai (Unai). Nene (Irene).

Animaliak

Apopo (hipopotamoa). Ata (artza). Araiña (arraina). Buaubuau (txakurra). Mia (katua). Pipi (txoria). Koko (kokodriloa).

Hainbat

Aboia (abioia). Amoia (kamioia). Argia. Haria (harea). Harria. Gol (baloia). Kaka. Makiña (Debabarrenaren kale-garbigailua). Mamaua (mantekadoa). Miñ. Txii (txiza). Tata (zapata). Tete (txupetea).

Esaldiak

Abe (a ver).  Agur. Aki (hemen). Alli (han). Apapa (kanpoan/kanpora). Hamen (hemen)

Han. Hau. Bai. Bat (bi, hiru, lau, bos, sei, zapi, koki eta… hamar). Bapo (amaitu da). Ni. No (ez). Ako (asko). Kasko (eskerrik asko).

Kopinak

Api (Epi). Kaillu (Caillou). Kity. Pi (Pirritx). Po (Porrotx). Pipo (Pintxo). Maia (erlea). Mini (Mickey Mouse).

Malen

 

 

 

 

 

Malen, Debako San Roke egunean

 

 

 

 

 

 

 

Amatiño
Amatiño dio:
2008/08/26 20:18

Bai, behar bada, hik diñuan moduan, "aua" ez dok erderian eragina. Izan be, "hipopotamo" adierazteko "apopo" esaten dauanak ez jok erderian eraginik bihar "ura"ri "aua" esateko.

markos zapiain
markos zapiain dio:
2008/09/01 12:29

Amatiño, seguru "Mickey" esan guran dioela "Mini"? Litekeena da Minnie Mouse bere kabuz ezagutu izana eta Mickey ikustean Minniez oroitzea. "K" beharrean "n" ez du beste inon erabiltzen. Uste dut ume guztiek dutela P T eta K herskariak erabiltzeko joera, Malenengan ere nabarmena: zortzi barik koki, jantzi> kantzi, koko...

asier
asier dio:
2008/08/26 13:49

Zerrenda politta batu dozu. Geuk be egin genduan, lehelengo Maddikin (http://eibar.org/blogak/sarasua/archive/2005/03/13/80) eta gero Manexekin (http://eibar.org/blogak/sarasua/archive/2007/08/07/231). Neskak azkarraguak dira :-) "AUA" (ura) horrekin zalantzan ibili naiz beti. Erderian eragina da? Seguru? Izan leike, jakiña, baina ez dakat hain garbi. Izan be "agua" zailagua da "ua" baino. "ua" berbian aldaera bat be izan leike "aua". Ezagutzen ditturazen ume gehixenak esaten dabe "aua", "ua" be esan arren.

Josu
Josu dio:
2008/08/31 22:49

Umea hitz horiek esaten imaginatzen ari nintzen eta, bukaeran... bapo! Zure bilobaren lehen hiztegian egon behar zuen, noski!

Ana
Ana dio:
2008/09/02 19:02

Mikeldi adierazteko "Mami" esaten badu, zergatik Mickey adierazteko ez du "Mini" esan behar?

Amatiño
Amatiño dio:
2008/09/01 17:51

Batere zalantzarik gabe, Mickey ikusten duenean "Mini" esaten du. Auskalo zergatik, behar bada bereizten ez dituelako, biak bat iruditzen zaizkiolako. Baina egia ere bada beretzat bietarik ezagunena eta usuena Mickey dela, eta ez Minnie. Horixe berberori galdetu nion bere amari eta...

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Amatiño

Luis Aranberri Mendizabal