Txaikovskik ez du euskal jarraitzailerik

Euskadiko Orkestra Sinfonikoak Txaikovskiren piano eta orkestrarako lehen kontzertua eskaini zuen atzo, larunbat eguerdiz, Kursaaleko Ganbera Aretoan. Mikel Cañadaren ideiaz eta gidoiaz, hamar urtetik gorako neska-mutikoentzat apropos burutua, Iker Sanchez aritu zen zuzendari, Felix Ardanaz pianoan eta Elixabete Arabaolaza, kontu-kontari, aurkezpen-lanetan. Horrez gainera, dozena erdi gaztetxok ere bertatik bertara parte hartu zuten.

Kontzertu arras polita, txukuna eta ezagunenetakoa musika klasikoaren errepertorioaren baitan. Ezin esan, ordea, jendearen aldetik harrera onegirik izan zuenik. Berrehunen bat lagun baino ez seirehun eserlekuko aretoan eta, oro har, berrogeiren bat haur-edo. Ezin ere esan sarrerak garesti zirenik: 7 euro helduenak eta 3, haurrentzakoak.

Ez dakit arrazoirik duten ala ez azken berrogei urteotan ezer gutxi egin dugula aurrera esan ohi dutenek. Baina 1974an ez genuen Kursaalaren pareko auditoriumik gure seme-alabak eramateko, eta orduan esan izan baligute noizbait joan ahal izango ginatekeela bilobekin Euskadiko Orkestraren kontzertura, Txaikovskiren gaineko saio didaktikoa euskara hutsean entzuteko…batek daki zientzia fikziotzat ez ote genukeen jo izango.

Auskalo lortu ote dugun merezi dugun guztia, baina nago ez garela jabetu ere egiten inguruan ditugun abaguneez. Seguru gero aurkezpena gaztelania hutsean egin izan balitz…