Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Sozialdemokrazia

Sozialdemokrazia

Amatiño 2010/10/12 23:20
Zapaterok ez dihardu behar bada asmatzen eta sozialdemokraziak nekez agindu dezake aldaketarik Espainian, Ongizate-Estatuari eusteko gai ere ez da-eta. Baina, Zapaterok, txarrenean ere, Rajoy du aurrean, eskuin peto-petoa alegia. Euskal sozialismoak, aldiz, bera bezain sozialdemokrata –edo gehiago— den abertzaletasun jeltzalea.

“A los socialistas vascos les resultará aun más complicado rentabilizar porque no podrán competir con los jeltzales en socialdemocracia” (Kepa Aulestia. DV, 09.10.10).

Esaldi azpimarragarria, baina ez sozialisten eta jeltzaleen arteko hauteskunde-lehiaz esandakoagatik, bidenabar abertzale sabindarren politikagintza sozialdemokratatzat jotzen duelako baino. Ni beti izan naiz iritzi horretakoa baina, jakina, ez da berdin Luis Aranberrik  ala Kepa Aulestiak esatea.

Ez naiz esaten ari Eusko Alderdi Jeltzalea sozialdemokrata denik. Kepak ere ez du horrelakorik esaten. Jakina, jaiotzez eta garapenez,  “alderdia” kristau-demokrata dena, ez baita alferrik Europako kristau-demokraziaren sortzaileetakoa (1947), gero PPren eraginez bertatik bota (2000) zuten arren. Jakinekoa ere, lau urte geroago (2004) EAJ Europako Alderdi Demokrataren sortzaileetakoa izan zena berriro. Zalantzarik ez beraz, alderdi jeltzalea kristau-demokrata dela sortzez eta, egun, zentruko demokrazia europarzale eta federalistaren bazkide.

Baina behar bada ez da horren ezaguna XIX. mendean sortutako kristau-demokrazia eskuindarra izan zela kulturaz eta moralaz baina ezkerrekoa, aldiz, ekonomiaz eta lan-harremanez. Egia da egungo nazioarteko kristau-demokrazia erabat kontserbadorea dela arlo guztietan; egia den bezala  EAJri  behintzat Rerum Novarum enziklikaren espiritu historikoa dariola oraino.

Izan ere,  historiaren zertzeladak alde batera lagata, zalantzarik ez gero EAJren agintepeko gobernugintza sozialdemokraziaren ildotik abiatu dela azken hogeita hamar urteotan. Eta, Kepa Aulestiaren ustez, honetan bide datza, hain zuzen, euskal sozialisten zailtasuna.

Ze, Zapaterok ez dihardu behar bada asmatzen eta sozialdemokraziak nekez agindu dezake aldaketarik Espainian, Ongizate-Estatuari eusteko gai ere ez den neurrian. Baina, Zapaterok, txarrenean ere, Rajoy du aurrean, eskuin peto-petoa alegia. Euskal sozialismoak, aldiz, bera bezain sozialdemokrata  –edo gehiago— den abertzaletasun jeltzalea.

 Aulestia 600

"Mahai-ingurua". Eskuinean, Kepa Aulestia.  ETB, 1984

Theklan
Theklan dio:
2010/10/19 13:46

Hasieran "Euskal sozialistak" jartzen zuenean uste nuen Ezker Abertzaleaz (Herri Batasunaz) ari zela. Baina ez, antza PSE-EEz ari da. PSE ez dira "euskal sozialistak" ez eta "euskal sozialdemokratak". PSEk gaur egun sozioliberalismoaren aldeko apostua egiten du.

Eta horretan bat nator Amatiñorekin (behingoagatik!). PNV askoz sozioliberal duinagoa da herri honentzat Ares eta Celaa baino.

Amatiño
Amatiño dio:
2010/10/14 02:10

Ez da Ramonet horrelakorik dioen bakarra, oraintsu blog honetan aipatutako Touraine tarteko. Dena den, zuk eskainitako artikulua irakurri ostean zera otutzen zait, besteak beste:

  1. Zer arraio dira "zikloa" eta "agortu" historian? Gauza bat da teoria, filosofia edo joera... eta beste bat bihar goizeko (edo hurrengo legealdietako) gobernugintza.
  2. Auskalo zein ote den "agortuxea" dagoen "zikloaren" alternatiba baina... XXI mendeko sozialismo berriaren eredua ez da gero Venezuela izango, ezta? Ala bai?

C’est peut-être pour cette raison, et par contraste, qu’un nouveau socialisme du XXIe siècle renaît aujourd’hui avec tant de force et de créativité dans plusieurs pays d’Amérique du Sud (Bolivie, Equateur, Venezuela).

Amatiño
Amatiño dio:
2010/10/15 20:47

Ni, eztabaidatzeko prest... baita arrazorik ez dudanean ere. Hori ez da arazoa, nire kasuan behintzat. Kontua da ordea:

  1. Ez dakidala funtsean zer ari garen eztabaitzen. Hau da, ez dakidala benetan zertan ez gatozen bat, plano ezberdinetan dihardugu-eta.
  2. Badakit, ordea, zuk nahi zenukeela (sarriegi gertatzen den bezala, ez zara ez aurrena eta ez salbuespena) nere blogean zuk jarritako puntuaz eztabaidatu, eta ez nik nere jatorrizko iruzkinean aztertu nahi nuenaz. Eta halakoetan sekulako alferkeria etortzen zait, zer esango dizut ba... Nik nere gaiekin eta erritmoarekin nahiko eta sobera bai baitaukat, inoren larrainean sartu beharrik gabe.
  3. Dena den, ez dut erabat ulertzen Chavez bezalako tipoak defenditzeko argudioen artean "egoera hobetu... analfabetismoa gutxitu..." eta horrelakoak baino ez aipatzea. Ez duzu gero pentsatuko Francok analfabetismoa gehitu zuenik, lanpostuak murriztu eta Euskal Herria pobretu zuenik ezta?
  4. Ulertu ere ez dut ulertzen zergatik aipatzen den horrenbeste Venezuela eta Chavez, eta ez, ordea, Lula. Dezente "gorriagoa", nabarmen duinagoa eta emaitza onuragarriagoez zentzu guztietan. Nik, behintzat, bietako bat etxera eramatekotan, ez nuke zalantzarik izango. Ezta bigarren eskuko autoa nori erosi ere.

Badakizu Xenpelarrena, "Errenterian bizi naiz eta, egin zaidazu bisita". Esaidazu non bizi zaren, idatzi itzazu zurean nahi dituzun gaiak eta, interesgarri iruditzen bazaizkit, sartuko natzaizu eztabaidan. Baina mesedez, ez neri inoren artikuluekin erantzun.

Gorka Bereziartua
Gorka Bereziartua dio:
2010/10/15 16:25

Barka "ukaezina da" erabili izana. "Ukaezina iruditzen zait" jarri izan banu eztabaidatzen jarraitzeko prest egongo zinateke?

Bestalde, "herriaren onetan aginteaz jabetu eta demokrazia gerorako uzten dutenak nahiago urruti" diozu. Venezuelaz ari bazara (ni hala ari nintzen, ez dakit Castro nondik azaldu den), uste dut konparazioa iraingarria dela. Chavezek zenbat hauteskunde irabazi ditu eta zenbateko gehiengoarekin?

Baina tira, batzuei diktadore deitzea oso merke ateratzen denez... Beste artikulu interesgarri bat, Pascual Serranorena, "Frantzian zen, ez Venezuelan": http://www.pascualserrano.net/noticias/era-en-francia-no-en-venezuela

Gorka Bereziartua
Gorka Bereziartua dio:
2010/10/13 22:47

Artikuluan diozunarekin ez du zerikusirik, baina sozialdemokraziari buruz ari bagara, ni Ramonetekin nago (http://www.alternatives.ca/fra/journal-alternatives/publications/nos-publications/articles-et-analyses/articles-de-l-exterieur/article/social-democratie-fin-de-cycle?lang=fr) eta ziklo hori agortuxea ikusten dut alde guztietan, ñabardurak ñabardura.

Gorka Bereziartua
Gorka Bereziartua dio:
2010/10/15 01:33
  1. enari erantzunez: ez, noski, eta dena erlatibizatu daiteke solipsismoraino, baina ukaezina da sozialdemokraziak errepresentatzen zuen "hirugarren bide" hori ez dela gehiago aurkezten ahal politika neoliberalen alternatiba gisa (ez dakit inoiz modu sinesgarrian lortu duen); azken bi hamarkadetako historiak zerbait erakutsi badu, izan da liberalismo basatienaren aurpegi humanoko aldaera baino ez dela. Eta hori bada kontuan hartzekoa bihar-etziko gobernugintzan.
  2. enaz: Venezuelaren mamua ateratzea oso erraza da. Baina adibide horri helduz: XXI. mendeko sozialismoak Hego Amerikan esan nahi badu herritarren bizi-baldintzak hobetzea, analfabetismo-tasak errekor denboran gainditzea... etab. zergatik ez? Noski, Europan bestelako helburuak izan beharko lituzke, baina ez naiz aurreiritzi baten erruz modelo oso bat baztertzearen aldekoa.
Gorka Bereziartua
Gorka Bereziartua dio:
2010/10/19 13:32

Aiba, nire azken erantzuna desagertu egin da, baita zurea ere. Teknologia berri hauekin ezin zara fidatu gero... Bueno, badaezpada berriz jarriko dut:

Esaten nuen, afera ez dela kasu honetan bigarren eskuko autoa nori erosi, autoak edateko behar duena nori merkeago erosi baizik.

Eta esaten nuen, baita ere, gaitik urrundu garela, bai, baina elkarrizketak horretan desberdintzen direla monologoetatik.

Eta bukatzeko, egun ona pasatzeko opa nizun; gaur ere berdin.

Amatiño
Amatiño dio:
2010/10/15 02:26
  1. Zuk diozuna "ukaezina" baldin bada, nekez jarraitu ahal izango dugu eztabaidatzen. Sentitzen dut baina ni eszeptiko samarragoa naiz, behar bada ia berrogei urte joan direlako Xabier Mendigurenek "Europako ezker berria" idatzi zuenetik hona.
  2. Eta barkatu, nik ez dut "Venezuelaren mamua atera", Ramonetek lasai asko aipatu eta zuk espanturik gabe gomendatutako eredua besterik ez baita. Nik, aukeran, herriaren onetan aginteaz jabetu eta demokrazia gerorako uzten dutenak nahiago urruti, Franco eta Fidel tarteko.
  3. Segurutik sozialdemokrazia ez da sistemarik sozialena, baina gutxienez demokrazia da.

Izan ongi.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Amatiño

Luis Aranberri Mendizabal