Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Segundo Olaeta eta Pavlovo

Segundo Olaeta eta Pavlovo

Amatiño 2009/01/17 01:41
Segundo Olaetaren oinordekoek Ballets Olaeta zenaren ondare osoa eman diote Bizkaiko Foru Diputazioari. Bataz beste 80 urteko memoria: denetariko dokumentazioa, argazkiak, filmak, grabazioak, koreografia, atrezzoa, 700 inguru jantzi etab. Sekula izan den euskal dantza talderik garrantzitsuenetakoaren altxorra.

Segundo Olaetak 1926 urtean sortu zuen Elai Alai dantza taldea Gernikan eta, gerra-denbora tarteko, Europan zehar egin zituen  hainbat jira. Gerra ostean etxeratu eta Europan zein Ameriketan arituko zen Ballets Olaeta sortu zuen Bilbon eta, 1950eko hamarkadan, dantza-akademia ireki zuen Erzilla kaleko hamaikagarrenean.

Hantxe ezagutu nuen Segundo maisua 1960an.  Nik 15 urte besterik ez nituen eta berak, berriz, 64. Nik orain dudan adin berbera, nahiz eta orduan askoz ere zaharrago iruditu. Garai hartan Bilbon nintzen ikasketak egiten eta, bi ikasurtetan,  astean pare bat aldiz joan izan nintzen bertara.

Gazte-andana dezentea bildu ohi ginen. Auskalo euskal giroa ala euskal dantza ote zen gustukoen genuena baina, dantzaketan jarduteaz gainera, inoiz ere artez arte aipatu izaten ez ziren gaiak gogoan izan ohi genituen. Bilboko urte bi haietan, hantxe baino ez nuen euskaraz hitzegiteko betarik izan.

Olaetatarrak –Bittor eta Lide seme-alabak, batez ere— irakasle berezi samarrak ziren. Saio haiek zer ikusi gutxi izaten zuten Eibarren Gregorio Santa Cruzek egin eragin ohi zizkigun moldeekin. Izan ere, Bilbokoa ez zen dantza-taldea, dantza-eskola baino, eta balleteko dantzari ofizialak ez ginenok inoiz gutxitan egin izaten genuen jendaurrean dantzan. Erzilla kalean ariketa zen nagusi, pausuak behin eta berriz errepikatu beharra, estiloa zaindu eta landu beharra,  beti ere “bailarinak” jantzita eta ispilu aurrean. Barra erruz eta etenbako soin-ariketa, izerditan blai amaitu arte, gimnasiarik zorrotzena bailitzan. Eibarko Deportivoan, ostera, lan-taldea, ahalik eta azkarren errepertoria ikasi eta plazara.

Ez dakit ezer ganorazkorik ikasi ote genuen Olaetanean baina pasatu oso ondo pasatu izan genuen. Nere lagun-giroan adarra jotzen zidaten dantza-akademiara joateagatik, baita gaitzizena jarri ere: Paulovo, Anna Pavlova dantzari errusiar ospetsuaren gogoraziotan. Oraindik ere Paulovo izaten jarraitzen dut garai hartako lagun bilbotarren artean.

Geroztik 47 urte joan dira. Berrogeita zazpi urteko egoerak, irizpideak, ikuspegiak, joan-etorriak, jokamoldeak eta oroitzapenak. Auskalo jaio ote diren berriak, baina beti geratuko zaizkigu olaetatarrak.

  Victor Olaeta (1922-2007). Atzean, aita Segundoren argazkia

 Lide eta Victor, ezker-eskuma

Photograph:Anna Pavlova dances The Dragonfly. Anna Pavlova

oier
oier dio:
2009/01/18 11:15

Joño! Hori ere bai? Gregoriokin ibili ziñala banekixan baina Olaetakin ez! Oso ona! Olaetatarren ondarea oso interesentia omen da bai. Arana Martijak eta Lide Olaetak Elai Alairen inguruan idatzitako liburuak oso argigarriak dira. Pozteko albistea, zalantzarik gabe. oier.

ramon
ramon dio:
2009/01/18 13:41

Sekulako enbirixa sanua eman dostak. Historia txikiko,idatzi ez diran horietakoak, bizibeharrekoak baizik, horietako protagonista izandakoa haiz, gainera goitizen "divo" eta guzti. Benetan zorionak¡

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna:
Aurkezpena

Amatiño

Luis Aranberri Mendizabal