Proportzioa gorde beharra
Jakina gero askatasun-sistema nagusi izan arren jendea preso sartzerik badagoela, baina giza-eskubideek eskatzen eta legeriak arautzen duten proportzioa gordez gero. Esaterako, inori ez zaio bururatzen Guantanamok ezelango proportziorik gordetzen duenik.
Aldi berean, segurutik gutako inork ez dio Israeli bere burujabetza defenditzeko eskubiderik ukatuko, baina gutako gehienontzat Gazan gertatu berri dena guztiz proportzioz kanpokoa izan da.
Gurera etorriz, inor gutxik ukatzen du poliziak makila-salda zabaldu dezakeenik… proportzioz zabaltzen duen artean, noski. Eta zentzu honetan bat gatoz AHT Gelditu plataformarekin, egurra ematerakoan Ertzaintzari proportzioa eskatu dionean. Eztabaida izan daiteke proportzioa gorde ote duen ala ez, baina ez proportzioa gorde beharraz.
Hala ere, AHT Gelditu mutu geratu ohi da ETAren sarraski, mehatxu, bortizkeria eta erailketen aurrean. Ez dakigu plataformakoei proportzionatua iruditzen ote zaien ETAren jarrera baina, beti ere, komenigarri litzaiguke jakitea.
Eta, hain zuzen ere, ezker radikalak ez du sekula ETAren jokabidea salatu eta, honez gero, ez dut nik behintzat euren salaketa zehatzik itxaro. Baina gehiegi ote litzateke ezker abertzaleari galdetzea ETAren ekintza armatuak, gaur gaurkoz, euskal gizartearen egoera, premia, aldarrikapen eta gurariekiko proportziorik gordetzen ote duen?
Noski ETAren ekintzak gaitzesgarriak direla. Ezeren aurretik hori.
Baina, ezker abertzaleko zenbait kidek "kondena" hitza esplizituk erabili ezak ba al du zerikusirik Ertzaintzak Urbinan egindako indarkeria erabat desproportzionatua dela esatearekin? Noizko salatuko ditugu giza eskubideen urraketa guztiak? norbaitek eman behar du lehen pausoa, ETA eta inguruari uti beharrean hori egiten, zergatik ez bake bidetik goazenok? Asko aurreratuko genuke.