Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Prokrastinatzaile peto-petoak

Amatiño

Prokrastinatzaile peto-petoak

Amatiño 2014/07/15 21:45
Prokrastinatze-txapelketaren bat antolatuko balitz, seguru gero txapela ezker abertzaleak irabaziko lukeela. Ia lau hamarkada daramatza, geroko gerotan, erabaki beharrekoa erabaki ezinik, prokrastinatzen, 1977an hartutako bidea okerrekoa izan zela aitortu nahiezta.

Prokrastinatze* hitza, jatorriz, latina** den arren, ingelesez gaztelaniaz baino askoz ere ezagunagoa eta erabiliagoa da, nahiz azken bolada honetan gurean ere gero eta sarriago entzun. Dena den, hitza berria izango da, baina ez bederen ideia. Axularren "geroko gerotan" aritzea, “prokrastinatzen” jardutea besterik ez zen.

Urteak joan eta urteak etorri, ezker abertzalearen trenak edozenbat egokiera izan du 1977an galdutako erraila berreskuratzeko; eta, geltokiz geltoki, aukeraz aukera, abagunerik gehienei pasa-misi egiteaz gainera, derrigorrez ezin besteko aldaketak onartu behar izan dituen bakoitzean, ez da hala beharrezko onarpena samur aitortzeko gauza izan.

Beti geroko gerotan, beti berandu, beti bai-bainaka, beti egoera onagoren baten zain, beti aldaketa mozorrotuko duen hitz-jario korapilatsuren baten bila, ezelan ere zilegitzat jotzerik ez dagoena zelan edo halan zilegiztatu gurarik. Auskalo gero ezker abertzaleak zein katramila ote duen galtzarbean, baina gaizki eginak behingoz aitortzeko, behintzat, adore gutxi eta ausardiarik batere ez.

Bake-prozesu guztien azpitik eta presoen gizarteratze guztien gainetik, arazorik larriena da ezker abertzaleak ez duela nahi aitortu, 1977ko amnistia ostean zizpei berriro heltzea hanka-sartze historikoa izan zela. Eta horretan jarraitzen du, oraintsu arte gaitzetsi, gutxietsi eta oldartu izan dituen erakundeen onurez baliatuz, beraiek beti izan direla arrazoiaren jabe sasisinetsi gurarik.

Hain zaila al da esatea: “ez, ez zen zuzena izan arrazoi politikoez inor hiltzea?” Edo, “ez genuen asmatu”? Edo, Joseba Urrusolo Sistiagak ETAkide ohiak esan bezala: <<Tiene que haber una forma mínima de decir, ‘lo siento, ojalá no lo hubiéramos hecho'>>

Zeren beldur da ezker abertzalea? Benetan uste al du horrelako aitortzaren bat egingo balu, botoak galduko lituzkeela? Zergatik, zertarako, zeren edo zeinen izenean sekula guztian prokrastinatzen jarraitu?

Behar bada, memoriarik ezaz, arduragabetasunez, ezker abertzalearen zaharrek belaunaldi berriak engainatuko dituzte. Baina euren burua, ostera, inoiz ez!

---oo0oo---

*Procrastinate: To delay (repeatedly and without good reason) in doing some necessary act.

**Cras: Bihar.

--Bihar goizean = tomorrow morning = cras mannana (Berceoren garaiko gaztelania zaharra)

Oier Gorosabel
Oier Gorosabel dio:
2014/07/15 22:37
Mio Ciden bertsuak irakortzen nabil ointxe, eta egixa da: makiñatxo bat bidar agertzen da "cras" hori; ez neban berba horrekin lotzen.
Amatiño
Amatiño dio:
2014/07/15 22:48
Ezagun samarra, eskola-garaian, harako hura: "Cras sea la lid, quando saliere el sol". Alegia, "Bihar bedi gudua, eguzkia atera ostean". Ez al zen Mio Cidena?
Oier Gorosabel Larrañaga
Oier Gorosabel Larrañaga dio:
2014/07/16 14:25
Hain zuzen be. Gaur bertan irakorri juat pasarte hori, parkian: "Cras sea la lid / quando saliere el sol / destos tres por tres / que rebtaron en la cort", Carrioneko infantien eta Roy Diazen arteko dueluan bezperakuak. Bixar izango da bixar, "la sangre ayuso / el cobdo destellando"!

Romanze politta da, eta euskeriakin puntu amankomun asko dittuana; idatziko juat blogian.
jaime
jaime dio:
2014/07/16 19:59
 Erabat ados, 1977ko amnistia osoa zertu ondoren zizpei heltzea izugarrizko hanka sartze izan zen, bai politikoki bai militarki ikusita, sekulako estrategiaren eza gertatu zen. Erakunde armatuko kide edo buruzagiek ez zuten ongi kalkulatu indarren korrelazioa ez eta Europan bizitzen zen une politikoaren eraginaz konturatu ere.
Bestaldetik, ez daiteke arrazoi politikoez inor hiltzea, batez ere Euskal Herria bezalako herri txiki baten biztanle xume bat izanik. Horrelako astakeriak AEB bezalako inperioei erreserbatuak daude. Esaterako, CIAk edota FBIk munduan zehar barreiaturik dituzten espetxe ezkutuak zeinetan jendea torturatzen baita informazio ateratzeko asmoz, eta, vox populi izan arren, Herri demokratikoak isil-isilik daude, txintik ere ez aterata, Etika eta Kristoren arau eta agindu guztiak urratzen ba dira ere.
Nire uste apalaz, hemengo erakunde armatuaren hutsik handiena hasitako gatazka galtzea izan bide zen. Ze, irabazi izan bazuten IRAk Irlanda hegoaldean bezala Herria askatuz edo Francok bezala España osoa “manu militari” bereganatuz, gaur egun heroiak izango lirateke eta hemengo kale batek baino gehiagok euren izen abizenak izango lituzkete polito nabarmenduak.
Bi hitzetan laburbildu zuten erromatarrek horrelako egoera: VAE VICTIS!!!!
     
 
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna: