Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Planto egiteko aukera galdu

Planto egiteko aukera galdu

Amatiño 2010/06/28 23:41
Etenik gabeko jarduna da gero Munduko Futbol-Txapelketa dela-eta igande arratsaldeko bi partidetan gertatua. Alemania eta Ingalaterraren artekoan erreferiak ez zuen goltzat jo ate-barruan nabarmen sartu zen baloia eta, Argentina eta Mexikoren artekoan, aldiz, epaileek ez zuten nonbait ikusi 210 herrialdetako ehundaka milioi lagunok telebistaz ikusi ahal izan genuen jokoz kanpoko jokaldia. Harrezkero erabat suspertu da futbolean ere gutxieneko teknologia-baliabideak ezarri beharra.

Ni ez ninduen ordea Johannesburgoko teknologiarik ezak harritu, Mexikoko jokalarien etsipenak eta erreakzio faltak baizik. Eta ez naiz kirol-erreakzioaz ari, protesta-erreakzioaz baino. Nik ordenakotzat dut neure burua baino ez dut uste estadioaren monitorean golaren zilegitasunik eza horren garbi bertatik bertara ikusterik eduki izan banu Mexikoko jokalariek bezain geldo eta otsein geratuko nintzatekeenik.

                                                  

 Ondo dago, bai, beste zenbait kiroletan (saskibaloian, hockeyan, beisbolean, rugbyan, tenisean edo Formula 1an,  esaterako) honez gero erabiltzen den teknologia aldarrikatzea, baina auskalo ez ote litzaigukeen zilegi mexikarrei ere amorru apurtxo bat gehiago eskatzerik.

Seguruenik ez du batere zentzurik 32 kameradun telebista-sistemaren baliabideei muzin egitea, eta izugarria da gero mundu guztiko milioika ikusentzuleren aurrean horrelako erridikulurik egitea, baina nago ez ote zuten mexikarrek sekulako aukera galdu mundu guztiaren aurrean ere euren interesak defenditzeko.

Izan ere, zer gertatu ote zitekeen jokalari guztiek –erreferiarekin alferrik eztabaidatu beharrean— zelai erdian eseri izan balira eta, besoak luzatuz, atzamarrez monitorea erakutsi izan baliote? Zer gertatu ote zitekeen isilik-misilik planto egin izan balute? Estadioko monitore-irudiak tarteko, ez dut uste arbitroa partida mozten ausartuko zenik.  Mundu guztiko telebista-irudiak lekuko, nekez gero FIFAk Mexiko zigortu ahal izango.

Gerrak (eta grebak) ahalik eta gutxien egin behar dira. Eta, egitekotan, zer irabazi dagoenean batez ere.

 

 

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Amatiño

Luis Aranberri Mendizabal