Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Pilotoa nagusi

Pilotoa nagusi

Amatiño 2008/01/21 09:30
“Hegazkina airean dela aginte osoa pilotoarena da. Berari baino ez dagokio erabateko aginte-makila. Telebistan ere beste horrenbeste behar du izan, programa airean dela aginte guztia errealizatzailearena da”. Hauxe, orain 25 urte Alemaniako Oihan Beltzean izandako telebista-ikastaroan, behin eta berriz jartzen ziguten adibidea, eta ikastaro hartaz gogoratu naiz Iberiako pilotoak aurreko asteartean Loiun egindako maniobraren berri jakiterakoan.

Adorea behar da gero, lurrartu aurreko azken segunduan, 60 tonako Airbusaren goiari eutsi eta bat-bateko haize zurrunbilotik ihes egiteko. Baina, jakina, pilotoak ondotxo zekien berak besterik ezin zuela erabaki. Une hartantxe ez zegokiola Iberiaren Administrazio Kontseiluari iritzia eskatzerik, ez zuzendari nagusiari galdetzerik, ez Loiuko kontrol-torreari jaramon egiterik, ez sindikatuak zer esango zain egoterik.

Ez da huskeria. Izugarri garrantzitsua da une oro jakitea nori dagokion erabakitzea. Edozein gizartek, ganoraz funtzionatuko badu, argi eta garbi jakin behar du noiz eta zertaz nork erabaki behar duen. Hain zuzen ere, zenbaitek besterik uste arren, demokrazia ez da guztia denon artean erabakitzea proposatzen duen sistema, nork zer erabaki behar duen aldez aurretik denon artean adosten duena baino.

Gai batzuk denon artean erabaki beharra dago, beste hainbat gauza denon artean hautatutako ordezkarien artean eta beste zenbait, berriz, denon artean hautatutako ordezkariek euren artean aukeratzen dituzten arduradunen artean besterik ez.

Eta hau ez da honela bart gauean --auskalo nori komeni izan zaiolako-- asmatutako jardunbidea, edozenbat mendetako zibilizazioaren ondorena baino. Aldagarri dela? Jakina, baina denon artean.

 Deia, 2008.01.21

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna: