Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Nire azken zikloa

Nire azken zikloa

Amatiño 2017/02/13 15:35
Argindarraren, kimikaren eta errekuntzako motorraren zikloak gaina jo omen zuenean jaio nintzen ni, II. Mundu Gerra amaitu eta Hiroshima birrindu zen urtean. Gaztetan ezagutu nituen hegazkigintzaren gorakada, espazioaren konkistaren ataria eta petrolioaren lehen krisialdia. Gizondu nintzen --eta aitondu naiz-- Informazio eta Komunikazio Teknologiekin batera, eta, segurutik, sekula amaitzen ezagutuko ez dudan garai berriren baten hastapenetan nago. Etorkizuna heldu da eta ni banoa. Dena zuentzat.

Urteak joan eta urteak etorri, belaunaldiak joan eta belaunaldiak etorri, teknologia eta ekonomia zikloak joan-etorrian jardun ohi dira, sarritan askorik jabetu ere jabetzen ez garen arren. Bost uhin nagusi izan omen dira azken 200 urteotan.

Ciclos tecnológicos y económicos

Industria Iraultza hasi zen lurrun motorraz eta ehungintzaz. Ondoren etorri zen burdinaren nagusitasuna eta trena. Gero, ordea, argindarra, kimika eta errekuntzako motorra. Atzetik, hegazkigintza, espazioa eta petrokimika. Oraintsu, Informazio eta Komunikazio Teknologien uhina.

Aipatu uhin horien inguruan izan dira, tarteka marteka, 20-30 urteko ziklo emankor samarrak eta ondoko gainbeherada nabarmenak: Ondorengotza Gerra, 29ko kraka, II Mundu Gerra eta petrolioaren lehen krisi latza. Orain, badirudi, 2008ko krisialdia gainditzen-edo dihardugula, behingoz... Zer etorriko ote da gero?

Auskalo, ziklo berririk ezagutzeko aukerarik izango ote dudan. Hasierarik, behar bada, bai. Baina, amaierarik... amaierarik ez, behintzat. Eta hogei urte barruko hurrengo zikloa? Ezta hurrik eman ere gero.

Etorkizuna helduko da eta ni ez naiz egongo. Ez da sentsazio batere triste edo penagarria. Baina bai, ostera, arraroa.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira lau gehi lau (idatzi zenbakiz) ?
Erantzuna:
Aurkezpena

Amatiño

Luis Aranberri Mendizabal