Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Nire aukera besterik ez da

Nire aukera besterik ez da

Amatiño 2015/07/15 22:45
“Euskal Herriak erregula, sor eta atxiki ditzake bere telebista, irrati eta prentsa propioa, eta, oro har, bere helburuak lortzeko behar dituen giza komunikabide guztiak” (Gernikako Autonomia Estatutua, 1979 - 19/3. araua). Baina, jakina denez, euskal erakundeek irrati-telebista baino ez zuten sortu.

“Euskaldunon Egunkaria” sortu zeneko 25. urtebetatzea dela-eta, ezinbesteko ospakizunez eta balantzez gainera, berriro berpiztu da orain hogeita hamar urte loratu zen eztabaida: egunkaria bai, baina, publikoa ala pribatua? Ni beti azaldu nintzen egitasmo publikoaren alde. Bistan da ez zidatela jaramonik egin. Ezta egin beharrik ere, jakina!

Egitasmo publikoen alde egoteak ez dakar ekimen pribatuen kontra egon beharra. Esan gura duena da, oinarrizkotzat jotzen diren gizarte-zerbitzuetan xahutu beharreko diru publikoek kontrol publikoa eskatzen dutela, hezkuntzan, osasungintzan, polizian zein komunikabideetan. Horrek ez du esan nahi zilegi ez denik eskola, ospitale, segurtasun edo komunikabide pribaturik. Horrek esan nahi duen bakarra da, diru publikoak, lehen eta behingoz, zerbitzu eta azpiegitura publikoei erantzun behar diela eta gero gerokoak.

Duela hogeita hamar urte inguru, Euskal Telebista eta Euskadi Irratia egitasmoen publikotasuna normaltzat jo zuten edozenbat “aurrerakoi” euskal egunkari pribatuaren alde eta publikoaren kontra azaldu ziren. Ez zuten sekula, nik uste, aurkako jarrera horren zio objektiborik jendaurrean arrazoitu.

Hogeita hamar urte geroago, epika eta lirika guztien gainetik, nik, aukeran, nahiago Euskadi Irratiaren eredua. Inor gutxietsi gabe, produktu homologagarriagoa iruditzen zait, profesionalagoa eta anitzagoa.

Beste modu batez esanda, nik, aukeran, nahiago Euskadi Irratiaren langile izatea, dagoen egunkari pribatuarena baino. Eta, aukeran, nahiago irrati horren entzule, egunkari horren irakurle baino.

Baina aukera bat besterik ez da, nahiz inork jaramonik egin ez. 

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Amatiño

Luis Aranberri Mendizabal