Nestor Basterretxea, lehendakariorde
Intxixu
Ez dut sekula ahaztuko. 1980an izan zen, Eusko Jaurlaritzaren lehen legealdian. Ramon Labaienen ardurapeko Kultura Saila hasia zen lehen oinarriak jartzen. Artean egitasmoak baino ez ziren gero sortuko eta gorpuztuko ziren Euskal Telebista, Euskadi Irratia, Euskadiko Orkestra, HABE etab.
Eta lehen altzariak egokitzen ari ginen goiz batean, harraboska eta zalapartaka sartu zen Oteiza zena, mehatxuantza orroa eginez: “He venido con el colchón, y no saldré de aquí hasta que Garaikoetxea nombre a Néstor vicelehendakari de Arte y Estética, del que penderán todos los demás departamentos!”.
Oteizaren ideia, ona zein ez, nabarmen ulerterraza zen. Haren ustez, Garaikoetxea lehendakariaren agintea ez zegoen zalantzan, baina agintaririk gorenaren eta jaurlaritzako sailburuen artean, buruzagia behar zen ipini, artearen eta estetikaren nagusitasuna indarrean jarriko zuena. Nestor Basterretxea Arte eta Estetika lehendakariordea alegia, hezkuntza, garraio, ekonomia, ogasun, herrizaingo, industria eta bestelako sailen gainetik egongo zena.
Oteizaren proposamena ez zen mamitu. Sarri pentsatu izan dut, ordea, zer gertatuko ote zitekeen ideia “iraultzaile” hura ezarria izan baledi.
Auskalo Nestorrek berak onartuko ote zukeen. Batek daki onartuz gero zer gertatuko ote litzatekeen. Baina, zer gerta ere, seguru gero ezin izango genukeela ikusi gaur egun Bilboko Arte Ederretako Museoan dagoen erakusketa osoa.
Nestor Basterretxea, Idurmendieta baserriko lantegian (Hondarribia, 1977)