Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Montserrateko Andra Mariak har gaitzala altzoan

Montserrateko Andra Mariak har gaitzala altzoan

Amatiño 2019/10/24 17:10
Urteak kunplitu ahala, begiak lausotzen ari zaizkidan neurrian, gero eta ilunago ikusten dut nik Kataluniaren konponbidea. Nago, nekez atonduko dela ezer, Kataluniak zezena adarretatik oratuko duen liderrik aurkitzen ez duen heinean eta, Espainian, gobernu sozialistak ahul jarraitzen duen artean.

Kataluniako korapiloa nabarmen estutu zen Alderdi Popularrak Konstituzio Tribunalera eraman zuenean, 2006an, Kataluniako zein Espainiako parlamentuek eta katalanen erreferendumak onartutako estatutua. Gero gerokoak. Hamahiru urte geroago, ez Konstituzio Tribunalak eta ez Alderdi Popularrak ez dute hausnarketarik txikiena egin, orduko aukera hura hankaz gora botatzeari leriokeen erantzukizunaz.

Nahita ere, Pedro Sanchezek ezin izango lioke Kataluniari  eskaini, orain, Zapaterok orduan proposatu zuen aterabidea, gaur eguneko Kongresoaren indar-oreka nabarmen kontrakoagoa izateaz gainera, hobetzeko batere itxurarik sumatzen ez delako.

Zaharrok badugu atzera begiratzeko tentaldia eta aurreko hamabost egunetan Bartzelonan igarotako gertakariek ikaragarri gogorarazi didate 1968ko maiatzean Parisen izandako gatazka.

Segurutik, Parisko eta Bartzelonako auziak berdinezak dira jatorriz, baina bietan elkartu ziren, ezustean, ikasleak eta langileak, bietan suspertu zen ustekabean barrikadetako bortizkeria, bietan antolatu zen gatazka, gidari argiegirik gabe eta erakundeetako agintarien noraezaz, eta, orduan bezala, oraingoan ere, hauteskundeak etorriko dira ondotik...

Ez dakit zer jazoko ote den Espainian azaroaren 10eko hauteskundeetan, baina zehatz jakina da zer pasatu zen Frantzian 1968ko bozketetan. Beroaren beroaz sekulako iraultza etorriko zelakoan, ezkerrak aulki erdiak baino gehiago galdu zituen eta eskuinak izugarri irabazi. Jokoan zeuden eserlekuetatik, eskuina ehuneko laurogeiaz jabetu zen eta ezkerrak ehuneko hogei baino ez lortu.

Oraingoan zer gertatuko ote den? Auskalo! Erantzuna, azaroaren 10ean. Montserrateko Andra Mariak har gaitzala altzoan.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna:
Aurkezpena

Amatiño

Luis Aranberri Mendizabal