Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Merkatua

Amatiño

Merkatua

Amatiño 2011/05/03 23:42
Ehun eta hogeita hamar urtez gaztelania hutsean argitaratu ostean, Kataluniako La Vanguardia egunkaria bi hizkuntza-bertsiotan kaleratuko da gaurtik aurrera. Artur Mas lehendakariak adierazi duenez “és una decisió de transcendència històrica”; honek frogatzen omen du “que no és del tot cert que el català retrocedeixi” eta Godó Taldearen erabaki hau “és una gran aposta per aquesta Catalunya que volem viure amb normalitat de cara al futur”

Nik egunero kafesnea gosaltzen dudan tabernan lau egunkari aurkitu izaten ditut: hiru gaztelaniaz eta bat euskaraz. Azken bi urteotan, behin izan ezik, ez dut sekula euskarazkoa hartzeko zain egon beharrik izan. Joan eta hartu, beti aukeran, eskueran, nahiz eta bezerorik gehien-gehienak euskaldunak izan. Erruduna, errudunik bada, ez da inondik ere egunkaria, are gutxiago tabernaria, gure gizartea baino, gure merkatua alegia.

Katalunian, barrena egunkari bi daude katalan hutsez –El  Punt eta Ara-- eta gaur arte bat baino ez –-El Periódico— bi bertsio paralelotan, katalanez zein gaztelaniaz. Aurrerantzean La Vanguardiak beste horrenbeste egingo du, eta ez azken bolada honetan iritziz aldatu delako, gizarteak horretara behartu duelako baino. Edo, hobeto esan, gizarteak baino gehiago, merkatuak horretara eraman duelako.

Gurean gizartea eta merkatua esparru arras berdinezak dira. Gizartea aldarrikatzailearen –-eskubidea dugu— eta merkatu kontsumitzailearen –-ordaindu egin behar dut--  arteko zubigintza ez  da ezelan ere koherentzia-eredurik erakusgarriena. Euskal komunikabideak nahi ditugu, jakina, baina eduki edukitze aldera, ez kontsumitu ditzagun.

Erdal bertsiorik gabeko euskal produktuak nekez kontsumitzen ditugu eta, ene irudiko, guztiz ezinezkoa litzateke aldi berean erdal bertsiorik eskainiko luketen euskal produktuen iraupena*. Onartu edo ez, aitortu zein ez, gure aukerak esan gabe doaz.

La Vanguardia Bartzelonan katalanez kaleratzea, Gipuzkoan El Diario Vasco euskaraz azaltzea bezainbatekoa da. Zenbaitek pentsa dezake hau ere noizbait helduko dela, urte-kontua besterik ez dela. Ez dakit ba urte-kontua baino, jarrera-kontua ez ote den.  Sasi-aurrerakoitasunaren aitzakiaz errazegi egin ohi diogu muzin merkatuari, merkatua gu geu garena sekula onartzeke.

                                          lavanguardia

                         Katalanez estreinako argitara emandako alearen lehen orrialdea (2011-05-03)

 

*Hala ere, hamabost egun barru izango da liburu-dendetan Andu Lertxundiren nobela berria, “Etxeko hautsak”, eta euskarazko eta gaztelaniazko edizioak aldi berean argitaratu eta plazaratuko omen dira..

 

Amatiño
Amatiño dio:
2011/05/04 20:42

Eskerrik asko zure ekarpen berriarengatik.

Errua gutxitan izan ohi da osoa parte bakar batena. Hala ere, nik nonbait dut neure burua behar beste egiten ez dugula uste dugunon taldean eta zuk, aldiz, errudunik nagusienak besteak --erakundeak-- direla uste dutenen artean. Segurutik zuk nik baino jarduera kementsuagoa izango duzu eta horrek ematen dizu nik nire baitan aurkitzen ez dudan barne-segurtasuna. Zorionak.

Hala ere, nik gizartea (erakundeak tarteko) aipatu lekuan zuk gizarte gabeko erakundeak dituzu gogoan. Ez duzu gero pentsatuko erakundeak pertsonarik gabeko makina automatikoak direnik, ezta?

zakarias aiztierdi
zakarias aiztierdi dio:
2011/05/04 13:56

beti bezala, errua euskaldunona. bada ez, Amatiño, ez behintzat errua osoa. Gaztelaniaz bizitzea normaltzat duen gizartea da gurea, ezerk gutxik eragiten diona euskaraz bizitzera. Hasi euskararen ustezko eta benetan halakoa ez den ofizialtasunetik, eta euskaraz bizitzeko jasan behar diren istilu eta ezerosotasunetatik jarraituta. Garunean sartuta dugu euskara bigarren mailako zerbait dela, baina ez guk hala nahi izan dugulako, gure kulturaren aurkako zapalketak honaino ekarri gaituelako. Euskara normalduko bada, egiten diren ekintza positibo guztiez gain, gure egoera mixerableaz kontziente egingo gaituen lanketa egin behar da (eta zure testua zentzu horretan ere badoa), baina errudun nagusiak behar bezala identifikatuz. eta horiek instituzioak dira, guztion hizkuntza oemn den euskararen ofizialtasuna bururaino ezarri behar duen lehena bera da. barka gaizki esanak. aioo

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna: