Mendi-pistarik ikusgarrienetakoa

Batez beste %6,75eko aldapa ez da, behar bada, sekulako aldatsa (1), baina luze egiten da, zer esanik ez hasi eta buka basabide latza denez eta, horrez gainera, harri-koxkorra nahi baino sarriagotan. 

Segurutik, Aragoiko Pirinioetako txirrindu-zidorrik (2) ikusgarrienetakoa (3) da,  Aisa eta Villanuako haranen (Aragon ibaia) artean. Gainez gain, iparrera begira eta Sallerri goia (2.016 m.) inguratu arte, eskuinaldean Collarada (2.886 m.), Colladareta (2.729 m.) eta Lecherines (2.344 m.) tontorrak; ezkerraldean, ostera, Bisaurin (2.670 m.) gailurra; eta, aurrez aurre, Aragoi eta Biarnoaren arteko muga ikustezinarenak egiten, Llena del Bozo (2.566 m.), Llena de la Garganta (2.599 m.) eta Aspe (2.645 m.). Haran barrenean, berriz, han behean, Estarrun erreka Napazaleko lautadan eta, erdi ezkutuan, Igerreko (4) sakana. Sekulako ikuskizuna, ikuskizunik bada.

Eskumuturretako mina 

Goitik behera, beste 16 km., Borauko errepideraino, pedalei behin ere eragin beharrik gabe. Ez uste, ordea, nozitu beharrekoak nozituak direnik ordurako, edota jaitsiera amama izango denik. Hamasei kilometroak beherantz, mendi-pistan, abiada nabarmenaz, balaztaka, harri solte irristakor eta labainetan, “aldats” suerta daitezke.

Biharamunean, giharretako lar tentsiorik ez behar bada, baina ipurdiko eta eskumuturretako minberak, gogoratzeko bestekoak.

1) Puy de Dôme mitikoak 13,3 km. ditu, batez beste %7,7ko aldatsaz.

2) Sarreran langa dago eta autoz igotzeko baimen berezia eskatu behar da.

3) Udaberrian euri dezente egin du ingurumari honetan eta gogotik berde dago.

4) Beinke, adierazgarria benetan, makinatxo bat leku-izenen euskal kutsua.

Maldan gora, ekialderantz, Collarada (2.806 m.) eta Colladareta (2.729 m.)

Mendebaldean, ezkerrean, Bisaurin (2.670 m). Eskuinean, aurrez aurre, Llena del Bozo (2.566 m.), Llena de la Garganta (2.599 m.) eta Aspe (2.645). Eskuineko malda berdexkan, mendi-pista begi bistan. Eta barreneko haranean, berriz, Napazaleko lautada.

.