Mendeurrenean, kantuzaleak bai, agertoki aproposik ez
Aitor Biain zuzendaria
Ehun urte kantuan betetzen ditu aurten Bergarako Orfeoiak. Ehun urte ez dira, gero, artaleak. Kantu eta musika arloa nabarmen aldatu da azken mendean Bergaran. 1923an 90 kantari inguru zituen Orfeoiak, erdibana emakumeak eta gizonezkoak. Ehun urte geroago 40 baino ez dira guztira: 30 emakume, kostata baina nolabaiteko mailari eusten, eta gizonezkoak, berriz, 10 besterik ez, maldan behera.
Honek Bergarako garai onak goitik behera joan direla esangura al du? Ba, besterik iruditu arren, behar bada, ez. Izan ere, Orfeoia sortu zeneko mendeurrena ospatzeko, berrehun kantari eta musikari (1) baino gehiago taularatu ziren Bergarako pilotalekuan, larunbat iluntzean. Hartara, gizonezkoen ihesa ez balitz, ezin esan zaletasuna urritu denik, egungo zaleek euren aitona-amonak baino anitzagoak direla baizik.
Denon artean ospatu zuten aurreko bi, hiru edo lau belaunaldikoen ekarpen luzea, omendu zituzten ehun urteotan izan diren sei zuzendariak (2) eta, Kontxi Laskurain orfeoiaren lehendakaria tarteko, jaso zuten pilotalekuan gainezka bildutako herrikideen txalo-zaparrada.
Pilotalekuan? Kanturako ez ote honezkero pilotalekua “vintage” samarra? Tira, pilotan egiteko bai, jakina, baina… Orfeoiaren mendeurrena ospatzeko zortzi talde eta berrehun interprete biltzeko gauza den herriak ez al luke behar izango audio profesionalik eta agertoki aproposagorik eskainiko lituzkeen “auditorixoren" bat?
Urteak joan eta urteak etorri, azken berrogei urteotako aldarri berbera.
1) Bergarako Orfeoia, Bergarako Orfeoi Gaztea, Aritzeta Abesbatza, Alai Berri Otxotea, Bergarako Musika Eskolako Abesbatza, Bergarako Musika Banda, Bergarako Orkestra Sinfonikoa eta Cadem Town Sance Studio. Guztira 207 lagun, 108 kantari, 75 musikari eta 24 dantzari. Ea zein herrik eskain dezakeen gehiago.
2) Román Oyarzabal (1883-1971), Miguel González Bastida (1908-1997), Jesús Berroya (1923-2010), Cristina Larrañaga, David Azurza eta Aitor Biain.
EHUN URTE KANTUAN. Goiena telebistaren zuzeneko emanaldia
.
.
