Mende erdi luze kantatzen

Aurreko igandean, Victoria Eugenia antzokia bete zuen Urko abeslariak. Ia berrogeita hamar urte joan dira bere aurrenengo bakarkako kontzertua eskaini zuenetik, Trinitate Plazan, 1974ean. Baita urte bi geroago kaleratu ere lehen diskoa: “Sakonki maite zaitut Euskal Herria”, non bildu zituen, Guk euskaraz, zuk zergatik ez eta Herriaren alde zein Agur Euskal Herriari (Gauden euskaldun) kanta euskaltzale beroez gainera, Maite, maite, maitea bezalako balada erromantiko ezagunak edota Usurbilgo Eliza moduko tinko eta zindoak. Hauek eta gehiago, hogeitaka guztira, gogorarazi zituen Urkok igande iluntzean.

Gauza asko gertatu dira Urkok Miguel Hernándezen poemak musikatu eta Paco Ibañezekin batera gaztelaniaz kantatzen zuenetik. Lehen eta behingoz, gau eskolara nahiz  barnetegira joan eta euskaraz ikasi. Eta, geroztik, hamasei inguru disko argitaratu, denetariko kantez, Aresti, Artze, Bergamin, Gandiaga, Iparragirre, "Orixe",  Zulaika eta beste hainbaten olerkiak, tarteko. Eta, horrez gainera, hori guztia gutxi balitz bezala, berrogeita hamar urte luzez musikatik bizi izaten iraun. Ez da, gero, euli-kaka.

Duela zenbait urte Urkok nolabaiteko harrobia “aurkitu” zuen Donostialdeko herri-olertiaren baitan, eta, segurutik, bera izan dugu, alor honetan, berreskuratzailerik arrakastatsuena. Baina, oraingo honetan Joseanek gogoratu nahi izan du Artillero dale fuego delakoari-eta muzinik egin beharrik gabe, bere errepertorioa nabarmen oparo eta naroagoa dela. Alegia, berandu baino lehen, lepoan zeraman harlauza astuna astintzeko ordua zela.

Jose Bergaminek esan bezala, ¿que no soy de este tiempo?

ETBk konzertu osoa grabatu zuen. Urkok audientzia handiak bideratzen omen dizkio.

* Aingeru Bengoetxea kazetaria antolatzaile zela

** “Los corsarios” taldean