Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Medikuntza, gaixo kronikoak gehitzeko makina

Medikuntza, gaixo kronikoak gehitzeko makina

Amatiño 2009/12/05 12:21
Medikuntzak sekula aurrerapena egin omen du heriotza saihesteko orduan, baina ez horrenbeste erabat osatzerakoan. Hau da, medikuntzak heriotza ekidin arren, eritasuna guztiz sendatzerik lortzen ez duenez gero, gaixo kronikoak eragiteko makina da. Makina ona, segurutik, bizitza luzatzen digun aldetik, baina garestia garestirik bada.

Ekonomia-mota berri bila ari omen garen honetan horra non euskal osasun-zerbitzua ere zaharkitu egin zaigun. Rafael Bengoa Osasun sailburuak esan bezala, sistema duina dugu non oinarritu, baina gauzak zeharo aldatu beharko ditugu. Are gehiago, gure epidemiarik larriena ez omen da gripea, A, B edo Z izan, gaixotasun kronikoena baizik. Gutariko %70k amaituko omen du eritasun kronikoren batekin. Osakidetzak beste ereduren bat asmatu beharko du.

Eta datorkigun laino beltzari erantzun ahal izateko lehen eta behingoz gure mugez jabetu beharko omen dugu. Hau da, Euskal Autonomia Erkidegoko hiritar bakoitza batez beste hamar bider joaten da urtean zehar medikuarengana; suediarrak eta ingelesak sei aldiz joaten diren artean eta greziarrak, berriz, bizpahirutan baino ez.

Hiritar aldarrikatzaile eta eskale onak omen gara, baina pasibo samarrak. Den-dena inork egin diezaigun nahi dugu. Mimatu gaitzaten gura dugu. Ahalik eta ondoen zaindu beharraren beharrez, ondoegi zaindu gaituzte, gaizki erakutsi digute eta ea orain nola arraio ikasten dugun atzera egiten, geure buruaz arduratzen.

Rafael Bengoak esan zuenez, medikuntzak sekula aurrerapena egin omen du heriotza saihesteko orduan, baina ez horrenbeste erabat osatzerakoan. Hau da, medikuntzak heriotza ekidin arren, eritasuna guztiz sendatzerik lortzen ez duenez gero, gaixo kronikoak eragiteko makina da. Makina ona, segurutik, bizitza luzatzen digun aldetik, baina garestia garestirik bada.

Hala ere, aukera-maukeran behar bada Karlos Linazasororen aforismo (Erlea - 1) bi hauetako bat. "Mirari bat gertatzen ez bada behintzat, dena primeran joango da" edo "batzu-batzuk erremediorik gabe hiltzen dira". Nork hauta beza berea.

                                                      

                           Rafael Bengoa Osasun sailburua gripearen kontrako txertoa jartzen

 

Osakidetzaren erabiltzailea
Osakidetzaren erabiltzailea dio:
2009/12/06 01:22

Medikuen burua izanda pentsatzen dut ez duela erreko, ez luke behar; baina modako kontu horrez gain, jakin egin beharko luke pisu larregia ere ez dela ona eta zaindu egin behar luke, horretan ere "txertoa" jarri beharko luke. Eta ez, ikusten denez gizon horrek ez du ez tripa zaintzen ez behar lukeen ariketa fisikorik egiten, baina hori ez ei da modako berbagaia eta inork ez dio ezer esango. Aholkuak saldu egiten ditu, baina...

Amatiño
Amatiño dio:
2009/12/06 02:24

Ez dut sekula Bengoa jaunarekin hitzegin, ez dut uste nere defentsarik behar duenik baina, edozen modutan, ez nator inondik ere zurekin bat.

  1. Ez dut uste gizon hori, itxuraz behintzat, bere soina ez zaintzeaz gainera ariketa fisikorik egiten ez duenaren prototipoa denik.
  2. Ez dut uste nork bere gorputza zaintzea modan ez dagoenik, alderantziz baino.
  3. Honez gero modan ez dagoena da inor kritikatzea norberaren izena ezkutatuz. Gardentasunaren eta sinesgarritasunaren txertoa behar duena zu zeu zara.
Josu Txintxurreta
Josu Txintxurreta dio:
2009/12/06 23:09

Nahiz eta Amatiñok bere puntuetan arrazoia eduki(gehienetan bezala), ñabardura bat gehituko nioke nik, eta "Osakidetzaren erabiltzailea"ren defentsan; ez dut uste bere kritikaren arrazoia Sailburuaren tripan dagoenik. Eta gehienoi bardin zaigu edozein Sailburuk edo politikoren triparen neurria. Baina oso aspertuta gaude politikoek (alderdi guztikoek) iruditan agertzeko daukaten gose horregaz. Eta ez ditugu ikusten ez, bere lana egiten; baizik eta bizikletan ibiltzen, bainu bat hartzen, tarta bat jaten, ardoa edaten, eta orain, txertoa ipintzen. Eta aspertuta gaude zirko horrekin.

Amatiño
Amatiño dio:
2009/12/07 03:17

Josu Txintxurretak politikoen kontra dioenarekin bat etorriko banendi ere, horrek ez luke esangura izango "Osakidetzaren erabiltzailearen" kritika arrazoizkoa litzatekeenik, nere ustez ezezagun hau guztiz beste sintonia batean ari baita.

Baina gertatzen da, ordea, ez natorrela Txintxurretak dionarekin ere bat. Politikoen artean, bestelako lanbide guzti-guztien artean bezala, denetarik dago. Eta "politikoak", "funtzionariak", "emakumeak", "idazleak", "katalanak" eta horrelako generalizazioak lar arinak dira edozein eztabaida seriotan.

Are gehiago, kasu honetan, txertoa hartu ala ez gizartean dagoen eztabaida denez gero, nere ustez, Osasun sailburuak --lan egin eta Osasun plangintza burutzeaz gainera-- telebista aurrean txertoa hartzea bere egitekoetako bat da.

Zirkoa litzateke hori besterik ez egitea. Baina, nik dakidan neurrian, Bengoa jaunak asmatuko du ala ez, baina badaki zertan ari den eta zer egin nahi duen.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Amatiño

Luis Aranberri Mendizabal