Mastadiaren harbidea

Mastadiaren bidea (Etsaut, Aspe harana, Biarno) granitozko hormatzarrean mailuka irekitako estrata da. XVII. mendean otu zitzaion Louis XIV. errege frantziarraren gobernuari, Arras basoetako zuhaitz-enborrak Baionako ontzioletaraino eraman ahal izateko, maldan behera lehenik eta almadiatan gero.

Horman zeharreko “zauria” egiteari XVII. mendean ekin zitzaion arren, enbor-garraiorik joriena XVIII. mendean barrena bideratu zen eta, zer gerta ere, bi mende haietako frantziar itsas-armadaren mastarik lerdenenak biarnotarrak izan ziren. Bizpahiru mende geroago, lanbide haren lekuko geratzen da, egun, mendizaleek nahiz turistek bertatik bertara zeharkatu edo bisitatu ahal duten harbidezidorra.

Haran-magaletik goiengo basoetako lehen bi bordeetaraino berrogei minutu besterik ez da behar, horman zehar kilometro eta erdi baino ez den arren. Ez da inondik ere bide zaila, bai ordea, itxuraz batez ere, arriskutsu samarra, beherantza sumatzen den 150 metro inguruko amildegiaren sakonak atzera egiten du-eta.

Goiza joan-etorrian pasatzeko ibilaldi polita. Argi ibili, ordea! Utikan, bertigorik dutenak.

Horman zehar nabarmen ageri den "zauria"

Ez da aproposena bertigorik dutenentzat

Mailuz, zizelez eta laztabinez irekitako harbidezidorra